O Faamanuiaga o Tofotofoga, Aoaiga, ma Sauaga

Na malamalama lelei Peresitene Polika Iaga i faamoemoega e faavavau o le Atua, ma na ia faaaogaina lenei malamalamaaga i faigata na tutumau ai o ia ma isi o le Au Paia. Na saunoa mai Peresitene Iaga e faapea: “Ua ou faalogo i le tele o tala e uiga i o latou puapuaga ona o Keriso. Ou te fiafia e faapea atu ou te lei oo lava i se tulaga ua ou faamatala atu ai o’u puapuaga ona o Keriso. Na ou olioli i le tele o mea faapena, ae ua tele taimi ua ou faatusatusaina ai puapuaga lava latou, i o’u lava lagona faapea ma le toatele, i se tagata o loo ia ofuina se ofu tuai ma masaesae, ae ua sau se isi tagata ma tuuina atu i ai se ofu fou ma matagofie. O le faatusatusaga lenei ua ou faia pe a ou mafaufau atu i mea ua ou puapuagatia ai ona o le Talalelei—ua ou tuuese ai le ofu tuai ae ofuina se ofu fou” (DBY, 348).

Aoaoga a Polika Iaga

E suesueina ma tofotofoina i tatou e le Alii ina ia mafai ona tatou faamaonia atu lo tatou agavaa mo le mamalu selesitila.

Ole nuu o le Atua Silisiliese e tatau ona tofotofoina. Ua tusia o le a tofotofoina uma lava i latou e pei ona tofotofoina o Aperaamo [vaai MFF 101:1–4]. Afai e valaauina i tatou ina ia tatou o atu i luga o le mauga o Moria ina ia tatou ositaulagaina nisi o mea e pele ia i tatou, o le a leai se afaina; e mafai ona tatou faia e pei lava o soo se isi mea. Ou te manatu e i ai se avanoa mo le Au Paia ina ia latou oo uma ai i tofotofoga o loo latou moomoo pe naunau foi i ai. O lea la afai o loo ia te oe le malamalama o le Agaga Paia, o le a mafai ai ona e iloaina lelei o tofotofoga i la le tino e matuai talafeagai lava (DBY, 346).

O loo tatou i ai nei i se aso o le tofotofoina ina ia faamaonia ai i tatou pe tatou te agavaa pe leai mo le olaga a sau (DBY, 345).

O tagata atamamai uma o e ua faapaleina i pale o le mamalu, tino ola pea, ma le ola e faavavau e tatau ona latou pasia soo se tofotofoga faatulagaina mo tagata atamamai uma ina ia ui ai, ina ia maua ai lo latou mamalu ma le faaeaga. O faigata uma e oo mai i tagata faitino o le a faatagaina ona oo mai i luga o nisi, ina ia saunia ai i latou e olioli i le afioaga o le Alii. Afai tatou te mauaina le mamalu lea na mauaina e Aperaamo, e tatau foi ona tatou faia mea uma na ia faia na faapea ona ia mauaina ai. Afai tatou te saunia ina ia avea i tatou faapei o Enoka, Noa, Mekisateko, Aperaamo, Isaako, ma Iakopo, po o a latou fanau faamaoni, ma Perofeta ma Aposetolo faamaoni, e tatau ona tatou pasia le malamalamaaga, ma mauaina le malamalama, atamai, ma faaeega na o le a saunia ai i tatou e ulu atu i le malo selesitila o lo tatou Tama ma lo tatou Atua … . Soo se tofotofoga ma mea na outou oo i ai ma outou pasi mai ai e moomia lea mo lo outou faaolataga (DBY, 345).

A faapea e tatau ona faaopoopo atu o tatou olaga i se afe tausaga, e mafai lava ona tatou ola ma aoao ai. Soo se tulaga lava e suia tatou te pasia e moomia lea mo le malamalamaaga ma faataitaiga, ma mo le sauniaina ina ia olioli i le taui ua saunia mo e faamaoni (DBY, 345).

Ana fai e le agasala ia Atamu, ma ana fai o le a faaauau ai pea lea augatupulaga i luga o le fogaeleele, semanu latou te leiloa le agasala, po o le oona mai le suamalie, semanu latou te leiloa foi le amiotonu, ona o le mafuaaga faigofie ma manino, soo se aafiaga lava e mafai ona atoatoa lona faataunuuina ona o lona tulaga faafeagai. Afai e mafai e le Au Paia ona latou iloatinoina mea e pei ona i ai pe a valaauina i latou e pasia ia tofotofoga, ma latou puapuagatia ona o osigataulaga, o le a latou faailoaina atu ia te i latou faamanuiaga silisili e mafai ona tuuina atu ia te i latou. Ae o le tuuina o i latou i le umiaina o mataupu faavae moni ma olioliga moni, e aunoa ma se faafeagai, ma o le a latou leiloaina le olioli, o le a latou leiloaina foi le fiafia. Latou te le mafai ona latou iloa le malamalama mai le pogisa, aua e leai so latou malamalamaaga i le pogisa ma faapena foi ma le iloaina o le malamalama. Afai latou te lei tofoina le oona, e mafai faapefea ona latou iloaina le suamalie? Latou te le mafaia [vaai MFF 29:39] (DBY, 345–46).

O i tatou o tagata sili ona fiafia pe a tatou mauaina mea na e tau o tofotofoga; aua o iina o le a matuai faulai ai le Agaga o le Atua i luga o e faamaoni [vaai 1 Peteru 3:14] (DBY, 347).

Ou te faapea atu i le Au Paia o Aso e Gata Ai, na o le pau lava la tatou mea e fai o le aoao lea e uiga i le Atua. Tuu pea tagata pepelo e faaauau ona latou pepelo, ma tuu pea tagata tauto e faaauau pea ona tauto, ma o le a latou oo atu lava i le faatafunaina. E na o le pau le mea tatou te faia o le o agai i luma ma luga, ma tausia pea poloaiga a lo tatou Tama lo tatou Atua, ma o le a ia faatoilaloina lava o tatou fili (DBY, 347).

Ua tatou pasia le tele o mea matautia faapena, e mafai ona tatou faapea ane, o puapuaga, e ui lava ona e malamalama uma uso o le Ekalesia, ou te le ta’ua lea upu o puapuaga i mea na oo ia te au, aua o mea uma na ou pasiaina o se olioliga ma se fiafiaga lea ia te au; ae foliga mai ua tele mea ua tatou ositaulagaina, ma pasia le tele o faigata o tofotofoga ma faaosoosoga; e leai se masalosalo i lea mea. E tatau ona tatou puapuagatia i faaosoosoga, i le tele pe itiiti ifo, ma ua tatou taliaina ma le fiafia le aveina o a tatou meatotino e tagata leaga. Na ou oo foi i ai, pe faalima ae ou te lei malaga mai i lenei vanu, na tuua mea uma na faamanuiaina ai au e le Alii e tusa lea ma mea o lenei lalolagi, aua o le nuu sa ou nofo ai sa tele ai au meatotino (DBY, 347–48).

O tofotofoga, e faamanuiaina ai o tatou loto, o le alii ma le tamaitai e fiafia i le agaga o la tatou lotu e leai ni o latou tofotofoga; ae o le alii po o le tamaitai e taumafai e ola e tusa ai ma le Talalelei a le Alo o le Atua, ae o le taimi foi lava lea e tasi o loo pipii atu ai i le agaga o le lalolagi, e i ai ona tofotofoga ma faanoanoaga tiga, ma o le a faaauau ai pea ona ia te i latou (DBY, 348).

Aveese ia le amo a le tiapolo, ae ia amo le amo a Keriso, ma o le a e faapea mai o lana amo e faigofie o lana avega foi e mama ia. Ua ou iloa lenei mea ona o mea na ou oo i ai (DBY, 347–48).

E fesoasoani le Alii i e le usiusitai ina ia lotomaualalo e ala lea i le aoaiina o i latou ma faatagaina i latou ina ia faasauaina.

A tatou tilotilo atu i le Au Paia o Aso e Gata Ai, tatou te fesili ifo, e i ai ea se mafuaaga o lo latou sauaina? Ioe, pe afai latou te le usiusitai. E i ai ea se mafuaaga e aoaiina ai se atalii po o se afafine? Ioe, pe afai latou te le usiusitai [vaai MFF 105:6]. Ae a faapea la o loo latou usiusitai i soo se mea e manaomia mai e o latou matua, e i ai ea la se mafuaaga o le aoaiina o i latou? Afai e i ai, ou te le malamalama la i lona aoaoga. E lei mafai ona ou iloa se mafuaaga e aoaiina ai se tamaitiiti usiusitai, e lei mafai foi ona ou iloa se mafuaaga ua aoaiina ai e le Alii ni tagata ua atoatoa ona usiusitai. Pe na aoaiina ea nei tagata? Ioe, ua aoaiina (DBY, 350).

O i latou o e ua liliuese mai poloaiga paia o le a fetaiai ma tofotofoga ma o ni tofotofoga moni lava. O le a latou lagonaina le toasa o le Silisiliese i o latou luga. O i latou o loo fifilemu pea ma o ni fanau lelei o le a latou mauaina ni faamanuiaga silisili a le Atua lo latou Tama. Ia fifilemu pea, ma ia tuu atu lo outou faatuatua i le Alii Silisiliese [vaai MFF 101:16] (DBY, 351).

Ua le mafaitaulia le silisili o o tatou faamanuiaga e ala mai i sauaga ma faamasinoga le tonu ua tatou puapuagatia ai, nai lo sauaga e mafai ona tatou maua pe ana faapea o loo tatou tumau ai pea i o tatou fale ia na tuliesea mai ai i tatou—pe ana tatou faatagaina i tatou lava ina ia faia a tatou faatoaga, togalaau, faleoloa, fale gaosi mea, masini ma mea uma na tatou umiaina muamua (DBY, 346).

O le a sauaina e amiotonu e i latou o e amioleaga, ae o le a taitaiina pea e le Atua Ona tagata, ma o le a agai pea i luma Lana galuega.

Aua nei i ai se fefe, aua afai e moni le afioga a le Alii, o lea e ao ai ona tofotofoina outou i mea uma; po o le fiafia, ma tatalo e le aunoa, ma faafetai atu mo mea uma, e tusa lava po o le gaoia o a outou meatotino, aua o le aao lava o le Atua o loo taitaiina ai i tatou, ma o le a faaauau pea ona faia. Ia faapaiaina alii ma tamaitai uma taitoatasi i luma o le Alii, ma mea uma taitasi ua saunia e le Silisiliese e ao ona faapaiaina mo lo latou lelei (DBY, 347).

Na taitaiina e le [Atua] ona tagata i vaega eseese o le Iunaite Setete, ma o le tamatamai lima o le tauemuga sa tusi atu ia i latou… . O loo i ai le fuafuaga a le Alii i lenei mea. Atonu tou te fesiligia po o le a lana fuafuaga. Ua outou iloa uma e tatau ona mama uma le Au Paia, ina ia ulu atu ai i le malo selesitila. O loo faamaumauina faapea na faaatoatoaina Iesu e ala lea i puapuaga [tagai Eperu 5:8–9]. Aisea e tatau ai ona tatou manatunatu mo sina taimi faapea e mafai ona tatou saunia e ulu atu i le malo o le malologa faatasi ma ia ma le Tama, e aunoa ma lo tatou pasia o na puapuaga faapena? (DBY, 346).

E le mafai ona faaatoatoaina ia Iosefa, e tusa lava pe ola o ia mo se afe tausaga, pe ana fai na te le mauaina ni sauaga. Ana fai na ola o ia mo le afe tausaga ma taitaiina nei tagata, ma talai atu le Talalelei e aunoa ma ni sauaga, o le a le faaatoatoaina lava o ia e tusa lava foi pe na o le [tolusefulu valu] ona tausaga. E mafai ona outou taumateina mai, ina ua valaauina nei tagata ina ia latou ui atu i nei faigata ma puapuaga, ma tuliesea mai o latou fale, ma fasia, ma faatapeapeina, ma faatoilaloina, ma valitaina, ae o loo alualu pea i luma le Silisiliese i lana galuega ma le saosaoa uiga ese (DBY, 351).

Soo se taimi lava e te faasaua ai i “Mamona” o lena ua e tuleia i luma; e te le faaleagaina lava. O le Alii Silisiliese lava ia na faatulagaina (DBY, 351).

Ana fai tatou te le tauaveina le lima uamea o faasauaga, semanu o mataupu faavae o loo tatou talitonu i ai, lea o loo faatosina mai ai le lelei ma le leaga i luga o le fogaeleele ma talanoa ai le toatele ma aofia ai manatu o tagata, e taliaina e le fiaafe o i latou o loo manatu eseese nei i ai (DBY, 351).

O taimi uma latou te taumafai ai e faasaua mai ma taumafai e faatoilaloina nei tagata, ua latou siitia foi i tatou, ma faavaivaiina i latou lava, ma faamalosia ai le Au Paia o Aso e Gata Ai. Ma o soo se taimi lava latou te taumafai ai e faaitiitia lo tatou faitau aofai, latou te faateleina ai. A latou taumafai e faaleagaina le faatuatua ma le mama o nei tagata, o le Alii lava ia na te faamalosia tulivae ua vaivai, ma faamautuina le le mautonu i le faatuatua ma le mana i le Atua, i le malamalama, ma le atamai. O le amiotonu ma le mana o le Atua e faateleina i nei tagata e faatusatusa atu i ai i le taumafai malosi foi o le Tiapolo e faatamaiaina i latou (DBY, 351).

Afai tou te le faia fua i matou, o le a matou auina atu alii faifeautalai i tuluiga uma o le lalolagi, ma faapotopoto mai Isaraelu, po o fea lava le mea o loo latou i ai; ma afai tou te faasaua mai ia i matou, o le a matou faavave ona fai, aua e le o i matou o ni tagata atamamai pe a tuua i matou, ma ua matou masani i le tau le momoe, na o sina taoto lava, ma sina malologa. Afai tou te le faia fua i matou, o le a matou auina atu alii faifeautalai ma le toafilemu; ae afai tou te faasaua mai ia i matou, o le a faateleina lo matou naunautai i le talaiina atu o le Talalelei (DBY, 351).

Fautuaga mo Suesuega

E suesueina ma tofotofoina i tatou e le Alii ina ia mafai ona tatou faamaonia atu lo tatou agavaa mo le mamalu selesitila.

O le a sou manatu aisea ua taua ai e Peresitene Iaga lenei olaga “o se aso o tofotofoga”? (Vaai Aperaamo 3:22–26.) E mafai faapefea e tofotofoga ona saunia i tatou e ulu atu i le malo selesitila?
Aisea e moomia ai le iloa lelei o malosiaga feteenai o le lelei ma le leaga?(Vaai 2 Nifae 2:11–14.)
O le a sou manatu aisea na matuai faafetaia ai e Peresitene Iaga ia tofotofoga na mauaina e ia ma isi o uluai Au Paia? O faapefea ona fesoasoani tofotofoga ia te oe ina ia avea oe ma se Au Paia lelei o Aso e Gata Ai?
O le a le uiga o le “tauaveina o le amo a Keriso”? (Vaai Mataio 11:28–30.) E faapefea ona fesoasoani le tauaveina o le amo a Keriso ia i tatou ina ia tatou olioli ai pe a tatou feagai ma tofotofoga? (Vaai foi Mosiah 24:13–15.)

E fesoasoani le Alii i e le usiusitai ina ia lotomaualalo e ala lea i le aoaiina o i latou ma faatagaina i latou ina ia faasauaina.

Aisea e aoaiina ai i tatou e le Alii i nisi o taimi? (Vaai foi MFF 101:2–8.) O le a le taua o lo tatou tali atu i le aoaiga? E mafai faapefea e le aoaoina sao o lenei mataupu ona fesoasoani i matua ma fanau ina ia atinaeina ai ni aiga lelei?
Na saunoa mai Peresitene Iaga e faapea “ua le mafaitaulia le silisili o faamanuiaga o le Au Paia e ala mai i sauaga ma faamasinoga le tonu [na latou] puapuagatia ai … nai lo puapuaga e mafai ona [latou] maua ina ia maua ai … mea uma sa [latou] umiaina muamua.” Aisea e avea ai ma se faamanuiaga silisili le faasalaina ona o le le usiusitai nai lo le faatagaina ina ia tumau ai pea i le filemu ma le tulaga o le agasala?

O le a sauaina e amiotonu e i latou o e amioleaga, ae o le a taitaiina pea e le Atua Ona tagata, ma o le a agai pea i luma Lana galuega.

Na saunoa mai Peresitene Iaga e faapea o le a faasalaina i latou e le usiusitai, ae na ia saunoa mai foi e uiga i tagata usiusitai—e pei o Iesu Keriso, Iosefa Samita, ma faifeautalai—o e na faasauaina. E tusa ai ma le saunoaga a Peresitene Iaga, aisea e faatagaina ai e le Atua tagata amioleaga e faasaua i tagata amiotonu?
Na saunoa mai Peresitene Iaga faapea o sauaga e faasaga i le Ekalesia o le a faatupuina ai le “televave”o le galuega a le Alii. O le a se mea o loo tau mai e lenei mea ia i tatou e uiga i le mea e tatau ona tatou faia e tali atu ai i osofaiga e tetee mai i le upu moni? O le a se mea e mafai ona tatou aoao atu i a tatou fanau ina ia faatoilaloina ai faasauaga?