O Tusitusiga Paia

I afiafi uma, sa taina ai e Peresitene Polika Iaga le logo o le faigalotu ma faapotopoto lona aiga faataamilo ia te ia e pepese ma faalogo i fautuaga, aoao i le finagalo o le Atua, ma faia tatalo faaleaiga. Sa ia talitonu i le aoaoina o tusitusiga paia ma faatusatusa “o se faasino ala o loo faasino maia le ala e ao ona tatou savavali ai. O fea o loo faasino i ai? O loo faasino i le Puna o le malamalama” (DBY, 127). Sa ia apoapoai i le Au Paia: Pe o outou faitau ea i tusitusiga paia ou uso e, ma tuafafine, e faapei sa outou tusia i le afe, lua afe, poo le lima afe tausaga talu ai? O outou faitau e faapei o loo outou sui ai ia i latou sa tusia? Afai tou te le lagona lenei, o le faamanuiaga ia te outou le faia o lea, ina ia outou faamasani ma le agaga ma le uiga o le upu tusitusia a le Atua e pei ona outou savavali ma talanoa i aso uma, e faapei ona outou faatasi ma a outou tagata faigaluega poo o outou aiga” (DBY, 128).

Aoaoga a Polika Iaga

O le aoao ma ola ai i aoaoga o tusitusiga paia e aumai ai musumusuga ma faasinoala i o tatou olaga.

Ola tatou matafaioi ma le tiute le ola ina ia mafai ona malamalama i mea tau i le Atua. O loo i ai le Feagaiga Tuai ma le Feagaiga Fou, le Tusi a Mamona, ma le Mataupu Faavae ma Feagaiga, ua tuuina mai e Iosefa Samita ia i tatou, ma e sili lo latou taua i se tagata o loo savali i le pouliuli. E faapei i latou o moli taiala i le vasa, poo se faasino ala o loo faasino mai le ala e ao ona tatou savavali ai. O fea o loo faasino i ai? O loo faasino i le Puna o le malamalama (DBY, 127).

Ou te talitonu i upu o le Tusi Paia… . Ou te talitonu o mataupu faavae e faatatau i le faaolataga o loo i totonu o lena tusi e moni, ma o le faia o ia mea o le a faaeaina ai soo se tagata, nuu poo aiga o loo ola i luga o le fogaeleele. O mataupu faavae o loo i le Tusi Paia o le a faaeaina ai i se tulaga maualuga i latou uma o loo ola ai; o le a tuuina atu ia i latou le poto, atamai, alofa mama, faatumuina i le alofa ma latou lagona ai manaoga o i latou o e puapuaga, poo le tiga poo ni tulaga maualalo. O i latou o loo ola ai i mataupu o loo i ai i totonu o Tusitusiga Paia e moni ma faamaoni ma mama ma filemu i le aiga ma fafo. Ola ai i mataupu faavae o le Tusi Paia, ma o le a avea ai alii ma ni tane sili ona lelei, o tamaitai o ni ava sili ona matagofie, ma o le a usiusitai le fanau, o le a fiafia o latou aiga ma o le a tamaoaiga ma fiafia le atunuu ma siitia ae i luga o mea uma o lenei olaga (DBY, 125).

Ou te faapea atu e ave lenei tusi [Tusi Paia] e fai mo tatou taiala, e avea ma o tatou tulafono o galuega; tatou te ave o se faavae o lo tatou faatuatua. Na te faasino le ala i le faaolataga e pei o se faasinoala o loo faasino i le aai, poo se faafanua o loo i ai le nofoaga o mauga, vaitafe, poo laina o le faafanua e faasino ai o soo se nofoaga i luga o le fogaeleele ua tatou fia maua, ma e leai se lagona sili atu nai lo le talitonu i ai; o lea, ou te faapea atu o tagata o le Au Paia o loo i ai le faatuatua sili ma talitonuga o soo se tagata i luga o le fogaeleele (DBY, 125).

Matou te mafaufau o le Tusi Paia … o se faasinoala … o loo faasino i se nofoaga. O le mataupu faavae moni lenei, ua tatou tau atu ma le toa. Afai tou te mulimuli i mataupu faavae, ma faatonutonu e mataupu o lena tusi, o le a faasino outou i mea o le a outou vaai i ai e faapei ona vaaia outou, i mea tou te fesootai ai ma Iesu Keriso, maua ai le asiasiga a agelu, miti, vaaiga, ma faaaliga, ma malamalama ma iloa le Atua e outou lava. Pe o se lagolago ea ma se tootoo ia te outou? Ioe; o le a faamaonia ai ia te outou o loo outou mulimuli i tulaga aao o tagata anamua. O le a mafai ona outou vaai i mea sa latou vaai i ai, malamalama i mea sa latou fiafia i ai (DBY, 126).

E leai se feteenaiga i mataupu faavae ua faaalia mai i le Tusi Paia, Tusi a Mamona, ma le Mataupu Faavae ma Feagaiga [o le Penina Tau Tele sa le i faasalalauina faalauaitele i le taimi o lenei faaaliga]; ma e leai se feteenaiga o mataupu faavae sa aoao e Iosefa Samita le Perofeta ma uso o i ai nei, pe afai e ola tagata uma i se auala e taitaiina ai e le Agaga o le Alii. O tagata uma ua le ola ai ina ia maua le Agaga o le Alii ma i latou i taimi uma, ma o le iuga, e o ese nisi (DBY, 126).

Tatou te talitonu i le Tusi a Mamona, ma le Mataupu Faavae ma Feagaiga ua tuuina mai e le Alii ia Iosefa Samita ma tuuina mai e ia i le Ekalesia. Matou te talitonu foi afai ua le ia i tatou le Agaga o le Alii, ma ua tapunia o tatou mata ma ua le mafai ai ona tatou vaai ma malamalama i mea e pei ona i ai i le agaga o faaaliga, e mafai ona tatou faamavae atu i nei tusi uma, e tusa lava poo le a le tele. Afai ua ia te i tatou faaaliga uma na tuuina mai i le taimi o Atamu, ma ua leai le agaga o faaaliga e faalogo i ai i le motu o tagata, e faigata ia i tatou ona faaolaina i le malo selesitila o le Atua (DBY, 128).

O le tusi o Mataupu Faavae ma Feagaiga ua tuuina mai mo tagata o le Au Paia e faapitoa mo la latou savaliga i aso uma ma galuega (DBY, 128).

O loo i ai i le Tusi Paia aoaoga faavae o le faaolataga.

O lenei Tusi, o le Feagaiga Tuai ma le Feagaiga Fou, o loo folafola maia le lauga e tasi mai le Kenese i le Faaaliga (DBY, 126).

O aoaoga faavae o loo tatou aoaoina o aoaoga faavae o le Tusi Paia, o aoaoga faavae ua faaalia mai e le Alii mo le faaolataga o le fanau a le Atua, ma afai o tagata, o e sa usiusitai muamua, ua faafitia nei, ua latou faafitia ma o latou mata ua malamalama lelei, ma iloa ai ua latou faafitia le upumoni ma faaleaogaina faatonuga a le Silisiliese (DBY, 126).

E moni le Tusi Paia. Atonu e le o sa’o atoatoa ona faaliliu, ma e tele mea taua ua teena i le tuufaatasiga ma le faaliliuina o le Tusi Paia [vaai 1 Nifae 13:24–27]; ae ua tatou malamalama, mai tusitusiga a se tasi o Aposetolo, pe afai na tusitusia mea uma na saunoa ma faia e le Faaola, e le mafai e le lalolagi ona maua uma ia mea [vaai Ioane 21:25]. Ou te faapea atu e le mafai e le lalolagi ona malamalama ai. Latou te le malamalama i mea ua tatou tusia ma faamaumauina, poo uiga o le Faaola, e pei ona faamatalaina i Tusitusiga Paia; ae peitai, o se tasi o mea sili ona faigofie i le lalolagi, ma le Tusi Paia, pe a malamalama i ai, o se tasi o tusi sili ona faigofie i le lalolagi, pe afai e faaliliuina sao [vaai Mataupu Faavae o le Faatuatua 1:8], e leai se mea ua na o le upumoni, ma i le upumoni e leai se mea faalilolilo sei vagana ai le vale. O faaaliga a le Alii i ona tagata ua faafetaui ma å ua vaivai, ma ua latou aumai le ola ma le faaolataga i tagata uma o e ua naunau e talia i latou (DBY, 124).

Tatou te talitonu i le Feagaiga Fou, ma o le iuga, ina ia o gatasi, e ao ona tatou talitonu i faaaliga fou, vaaiga, agelu, i meaalofa uma o le Agaga Paia, ma folafolaga uma o loo i ai i nei tusi, ma talitonu i ai i nei mea e pei ona tusia (DBY, 124).

E i ai lo tatou faaaloalo paia i le, ma le talitonuga i le Tusi Paia (DBY, 124).

I le faitauina o le Tusi Paia ua tatou maua ai o le Talalelei e le gata o loo i ai i le Feagaiga Fou, ae faapena i le Feagaiga Tuai. O Mose ma Perofeta sa latou iloa ma valoia le liliuese mai le Ekalesia. Sa latou iloa o le a taumafai le Alii ma le fanau a tagata mai lea taimi i lea taimi, o le a ia aumaia ia i latou le upumoni ma le Perisitua; sa latou iloa foi ona o le agasala o tagata o le a latou sui ai ana sauniga, solia feagaiga, ma ana tulafono [vaai Isaia 24:5], seia aveesea le Perisitua mai le fogaeleele, ma o e o nonofo ai o le a i ai pea i le liliuese ma le pouliuli (DBY, 124–25).

O i tatou o tagata o le Au Paia ua ta’uta’u atu i luma o le lagi, i luma o au a le lagi, ma luma o e o loo nonofo i le fogaeleele, tatou te matua talitonu i Tusitusiga Paia e pei ona tuuina mai ia i tatou, e tusa ai ma le malamalama sili ma le poto ua ia i tatou i lona faaliliuina, ma le agaga ma le uiga o le Feagaiga Tuai ma le Feagaiga Fou (DBY, 125–26).

O le Tusi a Mamona … ua tautino mai e moni le Tusi Paia, ma ua ia faamaonia mai, ua fefaamaonia ‘i e le tasi le isi i le moni. O le Feagaiga Tuai ma le Feagaiga Fou o le laau a Iuta [vaai Esekielu 37:15–19]. E te manatua o le ituaiga o Iuta sa faifai malie i Ierusalema ma e sa faamanuia le Alii ia Iuta, ma o le iuga o le tusia lea o le Feagaiga Tuai ma le Feagaiga Fou. A o fea le laau a Iosefa? E mafai ona e tau mai poo fea o i ai? Ioe. O le ituaiga o Iosefa lea sa sopoia vasa agai mai i lenei konetineta [o Amerika], ma o lenei laueleele sa faatumulia i tagata, ma o le Tusi a Mamona poo le laau a Iosefa o loo i ai a latou tusitusiga, ma o loo i ai i lima o Efaraima. O fea le ituaiga o Efaraima? O loo fefiloi faatasi ma atunuu uma o le fogaeleele. Ua valaau atu le Atua ia latou faapotopoto, ma o loo ia faatasitasia i latou, ma o loo latou talai le Talalelei i le lalolagi atoa (DBY, 127).

O le savali a tusitusiga paia e manino ma faigofie e malamalama ai i latou o e saili i le Agaga o le Alii.

Ua le ia te i tatou amioga e faapei ona sa i ai tagata i ni nai afe o tausaga ua mavae—sa faalagolago i latou i le Perofeta poo Perofeta, poo le maua vave o faaaliga mo i latou lava ina ia iloa ai le finagalo o le Alii, e aunoa ma se tala faamaumau o e na muamua ia i latou, a o loo i ai ia i tatou faamaumauga o i latou sa soifua muamua atu ia i tatou, ma le molimau a le Agaga Paia, ma, i le maliega a i latou uma o loo manaomia se molimau, e mafai ona tatou liliu atu i lenei tusi ma faitau mea ua tatou talitonu i ai, aoao le faamoemoega o lo tatou olaga, le faaiuga ua tatou faamoemoe i ai—o le iuga o le taufetuliga e pei ona i ai i le tulaga faaletino—ma o le atoatoaga o le mamalu o loo i luga atu o le vanu o loimata; ae peitai o loo i ai ia i tatou le avanoa sili nai lo i latou na soifua muamua ia i tatou (DBY, 128).

O tagata i soo se nofoaga o loo sailiili, “O le a le uiga o lenei mau, ma e faapefea ona tatou malamalama i lenei vaega poo lena vaega?” O lenei ua ou faamoemoe, ou uso e ma tuafafine, ina ia malamalama auiliili i tatou i mea e pei ona i ai, ae le o le tau faafetaui e le mafaufau faigofie ma le fesuisuiai o le tagata (DBY, 128).

Ou te fesili ia te oe le uso Polika, pe faapefea ona ou malamalama i le Tusi Paia, ma e faapefea e oe ma isi o e mulimuli mai i le Alii o Iesu Keriso ona talitonu i ai? … Ou te talitonu i ai e pei lava ona i ai. Ou te le talitonu i le tuu i ai i luga o soo se faauigaga a soo se tagata, sei vagana ai ua taitaiina i se auala e le Alii lava ia. Ou te le talitonu tatou te manaomia ia nisi faaliliu ma faamatala upu i Tusitusiga Paia, latou te suia ia tusitusiga mai o latou uiga moni, manino ma le faigofie (DBY, 126).

O le Tusi Paia ua manino ma faigofie ona malamalama i ai e faapei o le faaaliga sa ou faitauina atu ia te outou [vaai MFF 58], afai tou te malamalama i le Agaga o le Atua—le Agaga o Faaaliga, ma iloa le ala ua fetuunai ai le Talalelei o le faaolataga e fuafua i le malosiaga o loo i ai i le tagata vaivai (DBY, 128).

E tusa ai ma le Tusi Paia, o le faaupuga e masani ai i le tele o senituri ua mavae, ae le afaina poo le a le gagana, o le aganuu lava lea. Ae ou te faapea atu o mataupu faavae o loo aoaoina i le Feagaiga Tuai ma le Feagaiga Fou e faatatau i le finagalo o le Atua mo ana fanau iinei i le fogaeleele; o le talafaasolopito o mea sa ia faia mo lo latou faaolataga, o sauniga sa ia fuafuaina mo lo latou togiola, o le meaalofa a lona Alo ma lana Togiola—o mea uma nei e moni, ma o i tatou o tagata o le Au Paia e talitonu i ai (DBY,129).

Afai tatou te manatunatu ma malamalama sao, tatou te iloa ai le faigofie ona malamalama i le Talalelei, le manino i lona faatulagaga, i vaega uma ma mataupu faavae e fetaui lelei ma le malosiaga o tagata, ma afai e faailoa atu ia i latou o e alolofa i le upumoni e foliga mai lona sili ona faigofie ma manino, ma le matua saunia o e faamaoni latou te talia (DBY, 129).

E ao ona tatou ola uma ina ia mafai ai e le Agaga o faaaliga ona fesootai ma aafia ai le loto ma tau mai ia i tatou mea e ao ona tatou fai… . Ae ina ia faia lenei mea e ao ona avea i tatou faapei o tamaiti; ma ua fetalai mai Iesu afai tatou te le liua e le mafai ona tatou ulu atu i le malo o le lagi. E ese le faigofie! Ola saoloto mai le moomoo, taufaaleaga, ita, feteenaiga, lagona lå fiafia, ma le tautala taufaaleaga i totonu o o tatou aiga ma o tatou tuaoi ma uo ma e uma o loo nonofo ai i le fogaeleele, poo fea lava tatou te feiloai ai ma i latou. Ola ina ia saoloto, mama ma manino o tatou mafaufau (DBY, 36).

Fautuaga mo Suesuega

O le aoao ma ola ai i aoaoga o tusitusiga paia e aumai ai musumusuga ma faasinoala i o tatou olaga.

E tusa ai ma le saunoaga a Peresitene Iaga, aisea tatou te suesue ai i mataupu faavae o le Alii e pei ona i ai i tusitusiga paia? O a folafolaga ua faia e Peresitene Iaga mo i latou o e usiusitai i mataupu o le Tusi Paia ma isi tusitusiga paia?
O a ni auala e mafai ai e faamaumauga ua selau ma afe tausaga ona fesoa- soani e faatonutonu ai o tatou olaga i nei vaitaimi? E faapefea ona faatonutonu e tusitusiga paia lou olaga?
Aisea, e tusa ai ma le saunoaga a Peresitene Iaga, na tuuina mai ai le Mataupu Faavae ma Feagaiga? E faapefea ona fesoasoani le Mataupu Faavae ma Feagaiga ia te oe i lau savaliga ma galuega i aso uma” (vaai MFF 4:3–4; 84:43–44; 86:11; 121:41–42, 45.)

O loo i ai i le Tusi Paia aoaoga faavae o le faaolataga.

Na aoao mai Peresitene Iaga o le Tusi Paia “o loo folafola maia le lauga e tasi mai le Kenese e oo i le Faaaliga” O le a le lauga?
E faapefea ona fesoasoani ia tusitusiga paia ina ia e malamalama ai i “uiga o le Faaola”?
O a laau a Iuta ma Iosefa? O le a le faiã a le Tusi Paia ma le Tusi a Mamona? E tusa ai ma le saunoaga a Peresitene Iaga, o le a le faamoemoega na tuuina atu ai le laau a Iosefa i lima o Efaraima?

O le savali a tusitusiga paia e manino ma faigofie e malamalama ai i latou o e saili i le Agaga o le Alii.

O le a le fautuaga a Peresitene Iaga mo i latou o loo saili pea i le faauigaga a le tagata o tusitusiga paia?
O a ni avanoa lelei e oo mai ia i tatou ona o loo i ai ia i tatou tusitusiga ma faamaumauga a perofeta i tusitusiga paia?
Ua valaauina i tatou e Peresitene Iaga e vaai mamao i luma i le gagana faigata o Tusitusiga Paia mo mataupu aoaoina, ma mataupu faavae taua e taitaiina ai o tatou olaga. O a aoaoga faavae o loo ia taua faapitoa? Aisea e matua taua ai nei aoaoga faavae mo i tatou i nei aso?
E tusa ai ma le saunoaga a Peresitene Iaga, e mo ai e manino ma faigofie ona malamalama ai tusitusiga paia?
Na aoao mai Peresitene Iaga e ao ona tatou “ola ina ia mafai ai e le Agaga o faaaliga ona fesootai ma aafia ai le loto ma tau mai ia i tatou mea e ao ona tatou fai. E faapefea ona tatou tapue le agaga o faaaliga i o tatou olaga ina ia tatou malamalama manino ai i feau o tusitusiga paia?