Vaai Faalemafaufau i Mau

Faamatala

Faamalamalama atu a tatou vaai faalemafaufau i mau, ua tatou fatuina se ata faalemafaufau o mea o loo tatou faitauina. O lenei tomai e mafai ona fesoasoani ia i tatou e fesootai lelei ai i mea na tutupu, tala, ma tagata tatou te faitau i ai i tusitusiga paia. O manatu ma gaoioiga nei e mafai ona fesoasoani ia i tatou e vaai faalemafaufau ai i mau:

• Vaavaai mo upu ma fasifuaitau faamatala e mafai ona fesoasoani ia te oe e vaai faalemafaufau auiliili ai i mea na tutupu.

• Faaaoga faamatalaga e te maua e vaai faalemafaufau ai po o a ni mafaufauga po o ni lagona o tagata o i tusitusiga paia.

• Vaai faalemafaufau ia te oe lava i le tala faatusipaia, ma mafaufau po o a ni ou lagona ma ni mafaufauga e ono i ai pe afai na e oo i ni aafiaga o mea na tutupu o loo faamatalaina.

• Saili mo ata ma vitio i le Potutusi o Ala o Faasalalauga, o loo maua i le ChurchofJesusChrist.org, lea e mafai ona fesoasoani ia te oe e vaai faalemafaufau ai i se tala mai tusitusiga paia.

Faataitaiga

Ina ia faataitai le tomai o le vaai faalemafaufau, mafaufau e faaaoga se tasi o manatu nei pe fatu sou lava tomai.

• Tuu atu se talaaga puupuu i le tala ia Tanielu ma le lua o leona (tagai i le Tanielu 6:1–15). Ona faitau lea o le Tanielu 6:16–23, ma faasino atu faamatalaga auiliili e mafai ona fesoasoani i tagata aoga e vaai faalemafaufau ai i le tala. E mafai ona e faaali atu le ata o loo i le lesona ma valaaulia tagata aoga e vaai faalemafaufau pe faape’i mo Tanielu le ulufale atu i totonu o se nofoaga puipui e tumu i leona.

  E mafai ona e faasoa atu pe faapefea e le vaai faalemafaufau i le aafiaga o Tanielu (po o le aafiaga o le Tupu o Tariu) ona faia mea na tutupu i le tala ia sili atu ona moni ma patino ia te oe. E mafai foi ona e faasoa atu le auala e fesoasoani ai ia te oe e talisapaia le faatuatua o Tanielu (ma Tariu) faapea foi ma le mana o le Alii.

• O le isi filifiliga mo le faataitaia o lenei tomai o le faitau lea o le Mataupu Faavae ma Feagaiga 45:44–45 ona faaali atu lea o se vaega o le lauga a Elder Neil L. Andersen “Tatou Te Tautalatala e uiga ia Keriso” (Liahona, Nov. 2020, 91) mai le taimi faailo 12:28 i le 13:48. Ua fesoasoani Elder Andersen ia i tatou e vaai faalemafaufau i le Afio Mai Faalua o Iesu Keriso. E mafai ona e faasoa atu pe faapefea e le vaai faalemafaufau i le Afio Mai Faalua o le Faaola ona tosina ai lou faatuatua ia te Ia ma ou faamoemoega mo lena aso.

Faataitai

Filifili se mau mai le faitauga o lenei vaiaso e faataitai ai lenei tomai o le vaai faalemafaufau i mau. Pe e mafai foi ona e filifilia se fuaitau mai faataitaiga o loo tuuina atu i lalo. Valaaulia tagata aoga e suesue le fuaitau ma faataitai le vaai faalemafaufau i mau e ala i le faaaogaina o manatu i le vaega o le “Faamatala”. E mafai ona e faaali atu nei manatu. A uma ona faataitai e tagata aoga, valaaulia i latou e faasoa mai o latou aafiaga i se paga po o ni vaega toalaiti. E mafai ona latou faasoa mai se tasi pe sili atu o mea nei:

• Upu ma fasifuaitau mai tusitusiga paia na fesoasoani ia i latou e fatufatu ai se ata faalemafaufau

• O se malamalamaaga patino na latou maua mai le faia o le vaaiga faalemafaufau

• O o latou manatu e uiga i le ala na fesoasoani ai se ata po o se vitio ia i latou e lagona atili ai le fesootai i tusitusiga paia

Manatua: E mafai ona e faamanatu i tagata aoga o se ata po o se vitio o se faaliliuga o tusitusiga paia ae le o se ata tonu o le mea na tupu.

Fuaitau faaopoopo mo faataitaiga:

• Esoto 14:10, 21–22. Faatasi ai ma le mana o le Alii, ua vaeluaina ai e Mose le Sami Ulaula.

• Mataio 14:24–32. Ua valaaulia e Iesu ia Peteru e savali i luga o le vai.

• 3 Nifae 11:13–15. Ua fetagofi sa Nifaē i manu’a o le Faaola.

• Mataupu Faavae ma Feagaiga 110:2–4. Ua faaali atu Iesu Keriso ia Iosefa Samita ma Oliva Kaotui i le Malumalu o Katelani.

Valaaulia ma Toe Tulitatao

Fautuaina le vasega e vaai faalemafaufau i tusitusiga paia a o latou suesue. Fai atu ia i latou e o mai saunia i le isi vasega e faasoa mai mea na latou aoaoina mai le faia o lena mea. Manatua e tulitatao i le isi vasega e sosoo ai ma tuu atu se taimi mo tagata aoga e faasoa mai ai ma talanoaina pe na faapefea e lenei tomai ona uunaia lo latou aoaoina i tusitusiga paia.