Faaaogaina o Tusitusiga Paia o le Toefuataiga ia Malamalama ai i le Tusi Paia

Faamatala

E mafai ona e faasoa atu le ala na vaai ai Nifae i se faaaliga vaaia faapea e tele vaega “manino ma sili ona pele” o le a aveesea mai le Tusi Paia (1 Nifae 13:26). Na ia vaai foi o isi tusi o tusitusiga paia o le a “[oo mai] e ala mai i le mana o le Tamai Mamoe” e “faamaonia ai le moni o [le Tusi Paia]” ma toefuatai mai ai upumoni manino ma taua ia na leiloloa (1 Nifae 13:39–40). O tusitusiga paia o le toefuataiga e faatatau i le Tusi a Mamona, Mataupu Faavae ma Feagaiga, Penina Tau Tele, ma le Faaliliuga a Iosefa Samita. E mafai foi ona e faasoa atu le saunoaga lenei a Peresitene Russell M. Nelson:

O tusitusiga paia o le Toefuataiga e lē faatautavā i le Tusi Paia; ae latou te lagolagoina le Tusi Paia. … [O tusitusiga paia o le toefuataiga] ua toefuatai mai ma faamamafaina aoaoga faavae faatusi paia. … Faatasi ai ma nei molimau faatusi paia, o aoaoga faavae o le Tusi Paia e le gata ina toe faamautuina ae ua faamanino mai. (Russell M. Nelson, “Molimau Faatusi Paia,” Liahona, Nov. 2007, 43, 44)

Mafaufau e faasoa atu manatu ma punaoa nei e fesoasoani ai i tagata aoga e faaaoga tusitusiga paia o le Toefuataiga e malamalama ai i le Tusi Paia. E mafai ona e faaalia lenei lisi pe saunia o se pepa e tufa atu:

• Afai e faaaoga se lomiga o le Tusi Paia na gaosia e le Ekalesia, saili vaefaamatalaga mo mau faasino i fuaitau o mau o le Toefuataiga ma le Faaliliuga a Iosefa Samita.

• Faaaoga le Faaopoopoga o le Faaliliuga a Iosefa Samita, o loo maua i le Study Helps i le Gospel Library po o le faaopoopoga i le lomiga a le Au Paia o Aso e Gata Ai o le King James Version o le Tusi Paia.

• Sue autu o loo ta’ua i fuaitau o le Tusi Paia i le Taiala i Tusitusiga Paia, o le Topical Guide, po o le faasino upu i le fusitolu. Suesue fuaitau o mau o le Toefuataiga o loo ta’ua i nei punavai.

Faataitaiga

Faataitai faapuupuu le auala e faaaoga ai nisi o punaoa o loo i luga e sue ai ma faaaoga mau o le Toefuataiga e malamalama ai i se fuaitau o le Tusi Paia. E mafai ona e faaaogaina le faataitaiga lenei pe fatu sau oe lava faataitaiga.

Fuaitau o le Tusi Paia	Punaoa	Auala e tatala ai e le mau o le Toefuataiga le uiga faaopoopo
Fuaitau o le Tusi Paia Kenese 14:18–20 o loo aumaia ai na o sina faamatalaga puupuu ia Mekisateko.	Punaoa Vaefaamatalaga a i le Kenese 14:24 e faasino i le Faaliliuga a Iosefa Samita, Kenese 14:25–40 i le Faaopoopoga o le Faaliliuga a Iosefa Samita. O le suesueina o le “Mekisateko” i le Taiala i Tusitusiga Paia ma le faasino upu i le fusi tolu e faasino ai le aufaitau i mau eseese, e aofia ai fuaitau nei e lua o mau: Alema 13:14–19 ma le Mataupu Faavae ma Feagaiga 84:14.	Auala e tatala ai e le mau o le Toefuataiga le uiga faaopoopo Ua tatou aoao o Mekisateko o se tupu-perofeta malosi o lē na faatuina le filemu ma le amiotonu i lona nuu. Sa ia faauuina Aperaamo i le perisitua ma valoia Iesu Keriso ma Lana misiona paia.

Faataitai

Valaaulia tagata aoga e suesue se fuaitau mai le faitauga o tusitusiga paia o lenei vaiaso lea e mafai ona fesoasoani tusitusiga paia o le Toefuataiga e faamanino mai. Pe e mafai foi ona e filifili mai faataitaiga o loo tuuina atu i lalo. Fautuaina le vasega e faaaoga punaoa ma manatu o loo folasia mai i le vaega o le “Faamatala” a o latou faataitaia. E mafai ona e valaaulia tagata aoga e faasoa mai mea nei i ni vaega toalaiti po o le vasega: (1) o se fuaitau o se mau o le Toefuataiga na latou mauaina ma (2) o le a le malamalamaaga ma le malamalama faaopoopo na te tuuina mai.

Fuaitau faaopoopo mo faataitaiga:

• Kenese 24:1–4. E mafai e tagata aoga ona sailiili i le “Faaipoipoga, Faaipoipo” i le Taiala i Tusitusiga Paia. Ona mafai lea e tagata aoga ona sue se fuaitau o se mau o le Toefuataiga i lalo o le ulutala “Feagaiga Fou ma tumau-Faavavau o le Faaipoipoga” lea e faamanino ai le taua o le faaipoipoga e faavavau i le fuafuaga a le Atua.

• Isaia 11:1–5, 10. E mafai e tagata aoga ona saili i vaefaamatalaga ma le Mataupu Faavae ma Feagaiga 113:1–6 mo se fesoasoani ia malamalama ai i lenei fuaitau.

• Mataio 26:36–39. E mafai e tagata aoga ona saili i vaefaamatalaga ma le faamatalaga mo le “Togiola, Togiolaina” i le Taiala i Tusitusiga Paia e sue ai fuaitau o mau o le Toefuataiga e faaopoopo ai le manino i le taulaga togiola a le Faaola.

• Roma 4:16. E mafai e tagata aoga ona saili i le Faaopoopoga o le Faaliliuga a Iosefa Samita, o loo maua i le Study Helps i le Gospel Library ma i le ChurchofJesusChrist.org, e maua ai le faamaninoga aoga o lenei fuaitau.

Valaaulia ma Toe Tulitatao

Fautuaina le vasega e faalautele a latou suesuega faaletagata lava ia e ala i le faaaogaina o tusitusiga paia o le Toefuataiga ina ia malamalama atili ai i le Tusi Paia. Fai atu ia i latou e o mai sauni i le isi vasega e faasoa mai mea ua latou a’oa’oina. Manatua e tulitatao ma tuu atu se taimi pe a tou toe feiloai mo tagata aoga e faasoa mai mea na latou mauaina. Atonu e te manao e talanoa ma i latou pe na faapefea e le faataitaia o lenei tomai ona uunaia ai a latou suesuega o tusitusiga paia.