Mauaina o Mamanu i Tusitusiga Paia

Faamatala

Faasoa atu le saunoaga lenei a Elder David A. Bednar o le Korama a Aposetolo e Toasefululua.

O se mamanu o se fuafuaga, faataitaiga po o se tulaga faatauaina e mafai ona faaaogaina o se taiala mo le faia pea ma le gaosiaina o se mea. (David A. Bednar, “O Se Faatanoa o le Vai Ola” [faeasaite a le Ofisa o Aoga a le Ekalesia mo le autalavou matutua, Fep. 4, 2007], 4, broadcasts.ChurchofJesusChrist.org; tagai foi Taiala i Tusitusiga Paia, “Mamanu,” scriptures.ChurchofJesusChrist.org)

Faailoa atu e masani ona tatou mauaina mamanu i tusitusiga paia e ala i le gauai atu i upu, fasifuaitau, po o manatu e ta’ua soo. E ala i le faailoaina ma le faaaogaina o mamanu, e mafai ai ona tatou malamalama atili i le ala e galue ai le Alii ma le auala e mulimuli ai ia te Ia.

Manatua: Atonu e aoga le talanoaina faatasi o lenei tomai ma le tomai “Mauaina o Fesootaiga i Tusitusiga Paia.”

Faataitaiga

Faaali atu fuaitau nei, ma faasino atu upu ua faatusilima e faaalia ai se mamanu i le ala na taliina ai e le Alii ni fesili a se vaega o faifeautalai e uiga i auiliiliga o la latou malaga. E mafai foi ona e faasoa atu le malamalamaaga o loo i lalo mai ia Elder Bednar e fesoasoani ai i tagata aoga ia malamalama i le ala e mafai ai e mamanu ona fesoasoani ia i tatou i le faailoaina o upumoni taua i tusitusiga paia.

(Manatua: O le mamanu o loo faataitaia iinei e faatusa i se auala se tasi ua taliina ai e le Alii ia fesili e uiga i auiliiliga o le faaalualuina i luma o Lana galuega. I isi taimi, ua Ia tuuina mai ai se taitaiga manino ma patino [tagai Mataupu Faavae ma Feagaiga 95:13–16; 136:10–18]).

Mataupu Faavae ma Feagaiga 60:5

• “Ae, e moni, o le a Ou tautala atu ia te outou e faatatau i la outou malaga atu i le laueleele na outou o mai ai. Ia i ai se vaa e faia, pe faatau mai, e pei ona lelei ia te outou, ua lē afaina ia te aʼu, ma faavave ona alu atu o la outou malaga i le nofoaga lea ua taʼua o Sagato Luisi.”

Mataupu Faavae ma Feagaiga 61:22

• “Ma e lē afaina ia te aʼu, pe a mavae se taimi itiiti, pe afai latou te faataunuu la latou misiona, pe latou te malaga atu i le vai po o le laueleele; ia tuu lenei mea ia faia e pei ona faailoa atu ia te i latou e tusa ma a latou filifiliga pe a mavae le taimi nei.”

Mataupu Faavae ma Feagaiga 62:5

• “Ma ona mafai lea ona outou foi atu e molimau atu, ioe, outou uma lava faatasi, pe taitoalua, e pei ona lelei ia te outou, e lē afaina ia te aʼu; tau ina ia faamaoni, ma talai atu tala fiafia i e o nonofo i le lalolagi, po o totonu o faapotopotoga a e amioleaga.”

Mataupu Faavae ma Feagaiga 63:40

• “Ma ia tuu tupe uma e mafai ona faasaoina, e lē afaina ia te aʼu pe itiiti pe tele, e auina atu i le laueleele o Siona, ia i latou o e ua Ou tofia e mauaina.”

Na faasoa mai e Elder Bednar le malamalamaaga lenei e uiga i lenei mamanu i le Mataupu Faavae ma Feagaiga 60–63:

O le fetalaiga a le Alii e faapea o na mea e ‘le afaina ia te au’, muamua e foliga o se mea e ofo ai. E manino lava, e le o fetalai atu le Faaola i nei faifeautalai e le o popole ia latou mea la e fai. Ae, sa Ia faamamafaina le taua o le faamuamua o mea e tatau ona faamuamua, ma ia taulai atu i mea tonu. … Sa tatau ona latou faatinoina le faatuatua, faaaoga faamasinoga lelei, [ma] galulue e tusa ai ma le taitaiga a le Agaga. … O le mea e taua o le galuega sa valaauina i latou e faatino, o le auala na latou oo ai iina sa taua ae e le taua tele. (David A. Bednar, “O Se Faatanoa o le Vai Ola” [faeasaite a le Ofisa o Aoga o le Ekalesia mo talavou matutua, 4 Fep. , 2007], broadcasts.ChurchofJesusChrist.org)

Faataitai

Valaaulia tagata aoga e suesue se fuaitau mai le faitauga o tusitusiga paia o lenei vaiaso, ma vaavaai mo mamanu. Pe e mafai foi ona e filifili mai fuaitau nei. E mafai e tagata aoga ona tusifaamaumau se malamalamaaga latou te maua e ala i le mafaufau e uiga i se mamanu latou te maua i tusitusiga paia. E mafai ona e valaaulia ni nai tagata aoga e faasoa mai i le vasega se mamanu na latou maua ma se malamalamaaga na latou maua.

Fuaitau faaopoopo mo faataitaiga:

• 2 Tupu 2:1–6 (O le fasifuaitau fai soo “Ou te le tuua lava” ua aumaia ai se mamanu mo le mulimuli i perofeta a le Alii.)

• Mataio 4:4, 7, 10 (O le mau ta’ua soo a le Faaola i le fasifuaitau “Ua tusia” o loo aumaia ai se mamanu mo le teenaina o faaosoosoga e ala i le faalagolago i tusitusiga paia.)

• Alema 32:27–43 (Ua saunia e Alema se mamanu mo le tausiga o le faatuatua.)

• Mataupu Faavae ma Feagaiga 50:13–29 (Ua saunia e le Alii se mamanu mo le aloese mai le taufaasese.)

Valaaulia ma Toe Tulitatao

Fautuaina le vasega e vaavaai mo mamanu i tusitusiga paia i le taimi o a latou suesuega faaletagata lava ia. Fai atu ia i latou e o mai i le vasega i le isi taimi ua saunia e faasoa mai ni mamanu na latou maua i tusitusiga paia. Manatua e tulitatao ma tuu atu se taimi e te toe feiloai ai mo tagata aoga e faasoa mai mea na latou mauaina. Atonu e te manao e talanoaina ma i latou pe na faapefea e le faaaogaina o lenei tomai ona faaleleia a latou suesuega o tusitusiga paia. Vaavaai mo avanoa i le taimi o le vasega e iloilo ai ma faaauau ona faataitai lenei tomai.