Malamalama i Faatusa o loo i Tusitusiga Paia

Faamatala

Faamalamalama atu e masani ona faaaoga e le Alii ia faatusa e aoao ai i tatou e uiga ia te Ia lava ma Lana talalelei. O se faatusa e fai ma sui pe tu mo se isi mea; e masani lava o se mea faitino e faatusa i se mea e le o mautinoa. Mo se faataitaiga, o le ai uamea i le miti a Liae e faatusa i le afioga a le Atua (tagai i le 1 Nifae 15:23–24). O nisi taimi e faaaoga ai e le Alii ia faatusa e fesootai mai ai ia i tatou i se tulaga loloto atu. O le faailoaina ma le malamalama i faatusa i tusitusiga paia e mafai ona alu ai le taimi ma taumafaiga, ae e mao’ae ona faamanuiaga.

E mafai ona e faaali atu ma faasoa atu ia fautuaga nei mo le malamalama i faatusa i mau:

1. Faailoa faailoga e ala i le vaavaai mo faatusatusaga.

2. Saili mo ni faaātaātaga e faatatau i le uiga o faatusa i le anotusi o tusitusiga paia ma i vaefaamatalaga, ulutala o mataupu, le Taiala i Tusitusiga Paia, po o isi punaoa.

3. Mafaufau e uiga i le faatusa. Atonu e te fesili ifo ia te oe lava: E faapefea ona tutusa nei mea e lua? Pe e faapei lenei mea faitino, tagata, po o le mea na tupu ?

Faataitaiga

E mafai ona e faataitaia lenei tomai e faaaoga ai le faataitaiga lenei po o sou lava tomai:

1. Faailoa faailoga e ala i le vaavaai mo faatusatusaga. Faitau le Salamo 23:1, ma faamatala atu na faatusatusa e Tavita le Alii i se leoleo mamoe.

2. Saili mo faaātaātaga. Faailoa atu ia fasifuaitau “na te ta’ita’i ia te au i tafatafa o vai e tafe lemu” ma le “na te taitai ia te au i ala o le amiotonu” i le Salamo 23:2–3. Faamatala pe mafai faapefea e nei fasifuaitau ona tuuina mai se malamalamaaga i le faatusatusaga.

   Sue le “Leoleo Mamoe” ma le “Leoleo Mamoe Lelei” i le Taiala i Tusitusiga Paia. Faasoa atu isi fuaitau o mau o loo aumaia ai faaiteitega ma faaātaātaga e uiga i lenei faatusa, e pei o le Ioane 10:14–15 ma le 1 Nifae 22:25.

3. Mafaufau e uiga i le faatusa. Fesili ifo ia te oe lava: O le a se mea ou te iloa e uiga i leoleo mamoe ma mea latou te faia mo a latou mamoe? E faapefea ona pei Iesu Keriso o se leoleo mamoe ia i tatou?

   Faamalamalama atu e pei o se leoleo mamoe, e alofa Iesu Keriso, tausia, puipuia, taitai, ma faafaileleina i tatou. Na te silafia i tatou taitoatasi. Sa lotomalie o ia e tuu mai Lona soifua mo i tatou.

Faataitai

Filifili se fuaitau mai le faitauga o tusitusiga paia o lenei vaiaso e aofia ai faatusa. Pe e mafai foi ona e filifili mai faataitaiga o loo tuuina atu i lalo. Tuu atu i tagata aoga se taimi e faitau ai le fuaitau ma faaaoga ia fautuaga o loo maua i le vaega o le “Faamatala” e malamalama ai i faatusa. Valaaulia tagata aoga, o se vasega po o ni vaega toalaiti, e faasoa mai faatusa na latou maua ma malamalamaaga na latou maua a o latou galulue ia malamalama i faatusa.

Fuaitau faaopoopo mo le faataitaiina o lenei tomai:

• Levitiko 1:3–9; Numera 21:6–9

• Mataio 5:13; Ioane 6:48–51

• 1 Nifae 8:26-27

• Mataupu Faavae ma Feagaiga 29:1–2

Valaaulia ma Toe Tulitatao

Valaaulia tagata aoga e vaavaai mo faatusa i tusitusiga paia e faaleleia ai a latou suesuega patino o tusitusiga paia. Manatua ia tuuina atu se taimi pe a tou toe feiloai ai mo tagata aoga e faasoa mai soo se faatusa na latou maua ma pe na faapefea e le mafaufau i le uiga o nei faatusa ona fesoasoani ia i latou e malamalama atili ai ma faaaoga mau. E mafai foi ona e valaaulia tagata aoga e faasoa mai pe faapefea e lenei tomai ona fesoasoani ia i latou e olioli atili ai i le suesueina o tusitusiga paia. Faaauau pea ona faataitai lenei tomai i le vasega.