Iloaina o le Vaega Muamua

Faamatala

Faamalamalama atu a o tatou faitau i tusitusiga paia tatou te tau atu i le tele o suinauna, e pei o le a’u, o le teine, o le tama, o ia, latou, ma isi mea faapena. O le upu e faasino i ai le suinauna e ta’ua o le vaega muamua. O le iloaina sa’o o vaega muamua e taua tele i le malamalama i le tele o fuaitau o mau. A’o suesue i tusitusiga paia:

• Faailoa ia suinauna e ono manaomia ona faamanino.

• Saili fuaiupu e muamua atu e sue ai le vaega muamua.

• Saili le mataupu po o ulutala o vaega pe a manaomia mo ni faaātaātaga.

Faataitaiga

Ina ia faataitai lenei tomai, mafaufau e faaaoga le faataitaiga lenei po o le faaaogaina o se tasi o ou lava tomai.

Valaaulia tagata aoga e sue i le 2 Nifae 3, ma faamalamalama atu o lenei mataupu e mafai ona fenumia’i e aunoa ma le malamalama po o ai o loo faasino i ai. Faaali atu fuaitau nei mai le 2 Nifae 3, faamamafa ia suinauna ia e manaomia ona faamanino:

“Ma o lenei ou te tautala atu ia te oe, Iosefa, laʼu uii” (fuaiupu 1).

“O le a Ou faatuina a’e se tagatava’ai filifilia mai le fua o ou sulugatiti” (fuaiupu 7).

Ina ia iloa po o ai e faatatau i ai le “ou” o loo i le fuaiupu 1 e manaomia ai le toe tepa i tua i le 2 Nifae 1:1, 6, 9 po o le 2 Nifae 2:17. A uma ona faitau nei fuaiupu, ua tatou iloa ai o Liae o le tagata lea o loo tautala.

Faailoa atu o fuaiupu 4–6 i le 2 Nifae 3 e fesoasoani foi ia i tatou e malamalama atili ai i suinauna i le fuaiupu 7. Ua sii mai e Liae se valoaga na tusia e Iosefa o Aikupito i le taimi sa fetalai atu ai le Alii ia Iosefa. O le iloaina o lenei mea e fesoasoani tatou te malamalama ai o le “Ou” i le fuaiupu 7 e faasino i le Alii ma “ou” e faasino ia Iosefa o Aikupito. O loo ta’u atu e le Alii ia Iosefa o Aikupito o le a i ai se aso o le a Ia faatuina mai ai se tasi o e tupuga mai ia Iosefa e avea ma se perofeta ma se tagatavaai maoae. O le vaefaamatalaga mo le “tagatavaai” e faasino atu ai i tatou ia Iosefa Samita o lena “tagatavaai filifilia” a le Alii.

Faataitai

Filifili se fuaitau mai le faitauga o mau o lenei vaiaso, pe filifili se tasi o fuaitau o loo lisi atu i lalo. Valaaulia tagata aoga e suesue i le fuaitau ma vaavaai mo suinauna e manaomia ona faailoa mai e i latou e i ai faamatalaga e malamalama i ai. E mafai e tagata aoga ona faasoa mai ia suinauna ma vaega muamua latou te maua. E mafai foi ona latou faasoa mai le auala e mafai ai e le faailoaina o le nauna ona fesoasoani tatou te malamalama atili ai i le uiga o le fuaitau o le mau.

Fuaitau faaopoopo mo faataitaiga:

• Faataoto 3:15 (Afai e manaomia e tagata aoga le fesoasoani: O le a le vaega muamua o loo faatatau i ai ia le “ia” ma “ia”? Tagai i le fuaiupu 13. Afai e manaomia, faailoa atu o le upu poto ua faauigaina o se tamaitai ma o loo faasino i ai “o ia” ma “ia” i le fuaiupu 15.)

• Ioane 1:6–12 (Afai e manaomia e tagata aoga le fesoasoani: O a vaega muamua o loo faatatau i ai le “ia” ma “lona” i le fuaitau lenei? Tagai fuaiupu 6–7, 10. Afai e manaomia, faamalamalama atu “o le Malamalama” i fuaiupu 7–9 e faasino ia Iesu Keriso.)

• Helamana 14:18 (Afai e manaomia e tagata aoga se fesoasoani: O le a le mea o loo faasino i ai “ua” i le fasifuaitau “Ioe, ma ua faataunuu ai le tuutuuga o le salamo”? Tagai i le fuaiupu 17.)

• Mataupu Faavae ma Feagaiga 88:18–19 (Afai e manaomia e tagata aoga le fesoasoani: O le a le mea e faatatau i ai le “lona” ? Tagai i le fuaiupu 17.)

Valaaulia ma Toe Tulitatao

Fautuaina le vasega e faataitai le faailoaina o nauna i tusitusiga paia i le taimi o a latou suesuega faaletagata lava ia. Tulitatao ma tuu atu se taimi i vasega e sosoo ai mo tagata aoga e faasoa mai ai mea na latou mauaina e ala i le faaaogaina o lenei tomai. E mafai foi ona e valaaulia tagata aoga e faasoa mai pe faapefea e lenei tomai ona fesoasoani ia i latou e malamalama atili ai i tusitusiga paia. Faaauau pea ona faataitai lenei tomai i le vasega.