Vaavaai mo Sootaga o Le Mafuaaga-ma-le-Aafiaga i Tusitusiga Paia

Faamatala

E mafai ona e faaali atu upu mafuaaga ma aafiaga. Faamalamalama atu o tusitusiga paia e mafai ona tatou vaai ai i le tele o sootaga o le mafuaaga-ma-le-taunuuga. O se mafuaaga e mafai ona avea ma soo se faatinoga po o se gaoioiga e maua ai se aafiaga—o se taunuuga po o se mea ua tupu mai ai. O le vaavaai mo sootaga o mafuaaga-ma-aafiaga i tusitusiga paia e mafai ona fesoasoani ia i tatou e faailoa ai mataupu faavae o le talalelei. O le sailia o sootaga o mafuaaga-ma-aafiaga e mafai foi ona fesoasoani ia i tatou e faailoa ai folafolaga a le Alii, faamanuiaga, lapataiga, ma mafuaaga mo Ana faasalaga.

Faasoa atu fautuaga nei mo le faailoaina o sootaga o mafuaaga-ma-aafiaga i tusitusiga paia:

• Faailoa filifiliga, uiga faaalia, ma faatinoga (mafuaaga) ma taunuuga po o taunuuga (aafiaga) e mulimuli mai.

• Vaavaai mo upu ma fasifuaitau e faasino i sootaga o mafuaaga-ma-aafiaga e pei o le e tusa ai, ua faapea ona tatou vaai ai, auā, o le mea lea, ma le afai… ona.

Faataitaiga

Faaaoga se tasi o faataitaiga nei po o se tasi o ou lava tomai e faataitai ai lenei tomai.

• Faitau le Mataio 14:14 o se vasega. Faailoa mai le mafuaaga na taitai atu ai le Faaola e faamalolo i e mama’i:

  O Iesu “ua na silafia le motu o tagata e toatele, ona mutimuti vale ai lea o lona alofa ia te i latou” (mafuaaga), “ua faamalolo foi e ia o latou ma’i” (aafiaga).

  O le faailoaina o lenei sootaga o le mafuaaga-ma-le-aafiaga e mafai ona fesoasoani tatou te malamalama ai e faamanuiaina i tatou e le Faaola i Lona mana faamalolo ona o Lona agaalofa ia i tatou.

• Faitau le 2 Nifae 1:9 o se vasega. E mafai ona e faasino atu le upu e tusa ai ma faamalamalama atu o lenei upu e mafai ona faailo mai ai se sootaga o le mafuaaga-ma-le-aafiaga. Ona faailoa mai lea o faatinoga (mafuaaga) o le a taunuu i le mauaina o faamanuiaga folafolaina a le Alii (aafiaga):

  “E tusa ai ma le tausiga o ana poloaiga e i latou o e o le a aveese mai le laueleele o Ierusalema e le Alii le Atua” (mafuaaga), “o le a manuia i latou … [Ma] faamanuiaina i latou i luga o lenei laueleele” (aafiaga).

  O le faailoaina o lenei sootaga o le mafuaaga-ma-le-aafiaga e mafai ona fesoasoani tatou te iloa ai a o tatou tausia poloaiga a le Alii, o le a Ia faauluolaina i tatou ma faamanuia i tatou.

Faataitai

Filifili se fuaitau mai le faitauga o tusitusiga paia o lenei vaiaso, pe filifili mai fuaitau o loo i lalo. Valaaulia tagata aoga e suesue le fuaitau, ma vaavaai mo sootaga o le mafuaaga-ma-le-aafiaga. A uma ua lava se taimi, fai i tagata aoga e faasoa mai mea nei i ni paga po o ni vaega toalaiti: (1) se sootaga o le mafuaaga-ma-le-aafiaga na latou mauaina ma le (2) o le a se malamalamaaga latou te maua po o se mataupu faavae e mafai ona latou aoao mai ai.

Fuaitau faaopoopo mo faataitaiga:

• Isaia 58:13–14

• Luka 5:18–25

• Alema 5:11–12

• Mataupu Faavae ma Feagaiga 76:15–20

Valaaulia ma Toe Tulitatao

Fautuaina le vasega e faataitai le vaavaai mo sootaga o le mafuaaga-ma-le-aafiaga i tusitusiga paia i le taimi o a latou suesuega faaletagata lava ia. Manatua e tulitatao ma tuu atu se taimi mo tagata aoga e faasoa mai ai mea na latou maua ma pe faapefea ona fesoasoani lenei tomai ia i latou e malamalama atili ai i tusitusiga paia. Vaavaai mo avanoa e faaauau ai ona faataitai lenei tomai i le vasega.