Vaavaai mo Eseesega i Tusitusiga Paia

Faamatala

Faamatala atu o le eseesega o se faatusatusaga o se mea po o se eseesega o se tasi. E masani ona faatusatusa e tusitusiga paia ia manatu, mea na tutupu, ma tagata. E mafai ona tatou vaavaai mo eseesega i fuaiupu taitasi, i se mataupu, po o ni mataupu ma tusi eseese. O le mafaufau i nei eseesega e mafai ona fesoasoani tatou te malamalama atili ai i aoaoga faatusi paia ma iloa ai mataupu faavae o le talalelei mo o tatou lava olaga.

Faataitaiga

Ina ia faataitai lenei tomai, mafaufau e faaaoga se tasi o faataitaiga nei po o sou lava tomai. E mafai foi ona e valaaulia se tamaitiiti aoga e faataitai lenei tomai. Afai e te faia, ia mautinoa e vave tuu atu i le tamaitiiti aoga se faailoa ma se taimi e saunia ai.

Faitau faatasi o se vasega le Mose 4:1–2 ma faatusatusa le uiga o Lusifelo ma le uiga o le Faaola. E mafai ona e ta’u atu le faaaogaina soo e Lusifelo o le upu “a’u’ i le fuaiupu 1 ma lona manao mo le mamalu ma le viiga. Faatusatusa lenei mea ma upu lotomaualalo ma le lē manatu faapito a le Faaola “ia faia lou finagalo, ma e a oe pea le mamalu e faavavau” (Mose 4:2).

O le isi auala e faataitai ai lenei tomai o le faatusatusa lea o faatinoga a Lamana, Lemuelu, ma Nifae. Mafaufau i a latou tali ina ua poloaiina i latou e le Alii e tuua lo latou fale i Ierusalema ae o atu i le vao (tagai i le 1 Nifae 2:1–4). Faatusatusa uiga ma amioga a Lamana ma Lemuelu i le 1 Nifae 2:11–13 ma le uiga o Nifae i le 1 Nifae 2:16. Pe nai lo le faitauina o fuaiupu e mafai ona e faaali atu le vitio “Ua Tatalo Nifae mo Lamana ma Lemuelu—1 Nifae 2:8–24” mai le taimi 0:00 i le 2:52. E mafai ona e faasoa atu mea ua e aoaoina mai le faatusatusaina o uiga ma amioga a Lamana ma Lemuelu ia Nifae.

Faataitai

Filifili se fuaitau mai le faitauga o tusitusiga paia o lenei vaiaso, pe filifili mai fuaitau o loo lisi atu i lalo. Valaaulia tagata aoga e suesue le fuaitau ma faataitai ona vaavaai mo eseesega i manatu, mea na tutupu, ma tagata. Ona faasoa mai lea e tagata aoga se eseesega latou te maua ma mea latou te aoaoina mai ai.

Fuaitau faaopoopo mo faataitaiga:

• Esekielu 34:2–6, 10–16. Faatusatusa ia leoleo mamoe (taitai) o Isaraelu ia Iesu Keriso o le Leoleo Mamoe o Lona nuu.

• Luka 18:9–14 Faatusatusa ia tatalo ma uiga faaalia o le Faresaio ma le telona.

• Alema 36:12–14, 18–21. Faatusatusa lagona o Alema a’o lei valaauina ma ina ua uma ona ia valaau atu i le suafa o le Alii ma salamo i ana agasala.

• Mataupu Faavae ma Feagaiga 76:50–54, 71–74, 79, 81–85, 101. Faatusatusa tali i le talalelei ma le molimau ia Iesu Keriso o i latou o e mautofi i le malo selesitila (tagai fuaiupu 50–54), terasitila (tagai fuaiupu 71–74, 79), ma le telesitila (tagai fuaiupu 81–85, 101).

Valaaulia ma Toe Tulitatao

Fautuaina le vasega e faataitai le vaavaai mo faatusatusaga ma eseesega i tusitusiga paia i le taimi o a latou suesuega faaletagata lava ia. Tulitatao ma tuu atu se taimi i vasega e sosoo ai mo tagata aoga e faasoa mai ai mea ua latou mauaina e ala i le faaaogaina o lenei tomai. E mafai foi ona e valaaulia tagata aoga e faasoa mai pe faapefea e lenei tomai ona fesoasoani ia i latou e malamalama atili ai i tusitusiga paia. Faaauau pea ona faataitai lenei tomai i le vasega.