Aoao Atu ma le Aoao Mai
Mauaina o Autu i Tusitusiga Paia

“Mauaina o Autu i Tusitusiga Paia,” Tomai i Suesuega o Tusitusiga Paia (2024)

Mauaina o Autu i Tusitusiga Paia

Faamatala

Atonu e te manao e faasoa atu le saunoaga lenei mai ia Elder David A. Bednar o le Korama a Aposetolo e Toasefululua:

Elder David A. Bednar

O autu o ni uiga po o ni manatu taua, fai soo, ma soofaatasi, e pei o ni vaega taua o loo lalagaina i se tusiga atoa. E masani lava, o autu faatusi paia e lautele atu ma sili atu ona lautele nai lo mamanu po o fesootaiga. O le mea moni, o autu e maua ai le tala i tua atu ma le talaaga mo le malamalama i fesootaiga ma mamanu. O le faagasologa o le sailia ma le faailoaina o autu faatusi paia e taitai atu ai i tatou i aoaoga faavae autu ma mataupu faavae o le faaolataga. (David A. Bednar, “O Se Faatanoa o le Vai Ola” [faeasaite a le Ofisa o Aoga o le Ekalesia mo talavou matutua, Fep. 4, 2007], 5, broadcasts.ChurchofJesusChrist.org)

Manatua: E ono fesoasoani le faamaea o le “Mauaina o Fesootaiga i Tusitusiga Paia” ma le “Sailia o Mamanu i Tusitusiga Paia” a o lei faia lenei aoaoga o tomai.

Faataitaiga

Faaali atu fuaitau nei pe saunia o ni pepa e tufa atu. Faitau faatasi ia fuaitau, ma vaavaai pe faapefea ona avea Iesu Keriso ma autu i le Tusi a Mamona. A tatou malamalama o le autu tutotonu o le Tusi a Mamona o le faateleina lea o lo tatou faatuatua ia Iesu Keriso, ona mafai lea ona tatou faitau i itulau taitasi ma vaavaai mo Ia. (Manatua: Ua faaopoopo le faatusilima e faamamafa ai lenei autu.)

Itulau autu o le Tusi a Mamona—Moronae

  • “[O le Tusi a Mamona e tau atu i] le faatalitonuina o Iutaia ma Nuuese o Iesu o le Keriso, o le Atua Faavavau, ua faaali mai o ia lava i atunuu uma.”

1 Nifae 6:4—Nifae

  • “Ona o le atoatoa o loʼu faamoemoe ia mafai ona ou faatauanauina tagata ia o mai i le Atua o Aperaamo, ma le Atua o Isaako, ma le Atua o Iakopo, ma faaolaina ai.”

Ominae 1:26—Amaleki

  • “Ma o lenei, oʼu uso pele e, ou te manao ia outou o mai ia Keriso, o lē o le Paia e Toatasi o Isaraelu, ma taumamafa i lana faaolataga, ma le mana o lana togiola. Ioe, o mai ia te ia, ma ofo atu o outou agaga atoa e fai ma taulaga ia te ia, ma anapopogi ma tatalo pea e lē aunoa, ma tutumau e oo i le gataaga; ma e pei ona soifua le Alii, o le a faaolaina outou.”

Mosaea 3:17—Tupu o Peniamina

  • “Ma e lē gata i lea, ou te fai atu ia te outou, o le a lē i ai se isi igoa e tuuina mai po o se isi lava ala po o ni auala e mafai ona oo mai ai le faaolataga i le fanauga a tagata, ua na’o le suafa lava o Keriso, le Alii Mamana Aoao.”

Helamana 5:9—Nifae, atalii o Helamana

  • “E, ia manatua, ia manatua, ou atalii e, upu na tautala atu ai le tupu o Peniamina i lona nuu; ioe, ia manatua ua leai se isi ala po o ni auala e mafai ona faaolaina ai le tagata, ua nao i le toto togiola lava o Iesu Keriso, o le o le a afio mai; ioe, ia manatua e afio mai o ia e togiola le lalolagi.”

3 Nifae 11:10–11—Iesu Keriso

  • “Faauta, o Au o Iesu Keriso, o le na molimau i ai perofeta o le a sau i le lalolagi.

  • “Ma faauta, o Au o le malamalama ma le ola o le lalolagi; ma ua ou inu i lena ipu oona lea na tuuina mai e le Tamā ia te au, ma ua ou faamamaluina le Tamā i lou aveina i ou luga o agasala a le lalolagi, o se mea na ou tuuina atu ai i le finagalo o le Tamā i mea uma mai le amataga.”

Moronae 10:32—Moronae

  • “Ioe, o mai ia Keriso, ma faaatoatoaina ia te ia, ma faafitia outou lava mai mea uma e lē faaleatua; ma afai tou te faafitia outou lava mai mea e lē faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso; ma afai tou te atoatoa ia Keriso e ala i le alofa tunoa o le Atua, e leai se ala e mafai ai ona outou faafitia le mana o le Atua.”

Faataitai

Filifili fuaitau mai le tusi o mau o loo e suesueina e faamamafa ai se autu. Pe e mafai foi ona e fai atu i tagata aoga e suesue se tasi o vaega nei o fuaitau o mau. Valaaulia tagata aoga e suesue i fuaitau, ma vaavaai mo se autu. Ona valaaulia lea o i latou e faasoa mai le autu na latou mauaina ma o latou manatu ma malamalamaaga e uiga i lena autu.

Fuaitau faaopoopo mo faataitaiga:

Valaaulia ma Toe Tulitatao

Fautuaina tagata aoga e vaavaai mo autu i tusitusiga paia i le taimi o a latou suesuega faaletagata lava ia. Tulitatao i tagata aoga e ala i le valaaulia o i latou e faasoa mai ni autu latou te maua i a latou suesuega faaletagata lava ia o tusitusiga paia. E mafai ona e fesili atu ia i latou pe faapefea e le mauaina o autu ona faaleleia a latou suesuega ma le malamalama i tusitusiga paia. Vaavaai mo avanoa i le taimi o le vasega e iloilo ai ma faaauau ona faataitai lenei tomai.