Faatatauina o Tusitusiga Paia

Faamatala

Atonu e te faitauina faatasi le 1 Nifae 19:23 ma faailoa mai pe na faapefea e Nifae ona “faatatau tusitusiga paia uma” i lona nuu mo lo latou “manuia ma aoaoga.” Faamalamalama atu o le faatatauina o tusitusiga paia o le faatusatusa lea i o tatou lava olaga po o tulaga. O le faatatauina o tusitusiga paia e mafai ai ona latou fesootai patino, ma faatagaina ai upu e tautala sa’o mai ia i tatou. E mafai ona e faaali atu auala nei e faatatau ai tusitusiga paia:

• Faatusatusa tagata o loo i mau ma mea na tutupu i ou lava aafiaga o le olaga. Atonu e te fesili ifo ia te oe lava i fesili faapenei: O a tulaga i lo’u olaga e pei o le tulaga o loo faamatalaina i lenei fuaitau o mau? Pe o i ai se mea i nei fuaiupu e mafai ona fesoasoani ia te a’u i a’u fesili, manaoga, luitau, po o atugaluga?

• Tuu i totonu lou lava igoa e sui ai se tasi o loo ta’ua i tusitusiga paia po o luma atu o se fuaiupu o le fautuaga po o le poloaiga. E mafai ona e fesili ifo ia te oe lava: E faapefea e le tuuina o lo’u igoa ona fesoasoani e faapatino ai le sāvali o loo aoao mai e le Alii ia te a’u i lenei fuaiupu?

Faataitaiga

E mafai ona e faaaogaina se tasi o faataitaiga nei po o se tasi o au lava ia e faataitai ai lenei tomai.

• Faitau pe aotele le tala i le Esoto 16:4–5, 19–22 o Isaraelu o loo aoina le manai i le vao. Mafaufau e faaali le vitio “Daily Bread: Pattern” (2:51) ma valaaulia tagata aoga e faalogologo mo auala na faatatau ai e Elder D. Todd Christofferson lenei tala faatusipaia i o tatou olaga.

  Afai e te filifili e le faaalia le vitio, faamalamalama atu a o tatou liliu atu i le Alii i aso taitasi, e pei ona sa faia e Isaraelu, o le a Ia faamanuiaina i tatou i meaai faaleagaga i aso taitasi.

• Na tuuina mai foi e Nifae se faataitaiga aoga mo le faatatauina o tusitusiga paia. E mafai ona e tuuina atu sina talaaga mo le 1 Nifae 4:1–3 ona faitau lea faatasi ma tagata aoga. Valaaulia tagata aoga e vaavaai pe na faapefea ona faatusatusa e Nifae se tala mai tusitusiga paia i tulaga sa i ai o ia ma ona uso. Faailoa atu na faaaoga e Nifae lenei faatusatusaga e fesoasoani ai i ona uso ia faatuatua i le mana o le laveaiga a le Alii.

Faataitai

Filifili se fuaitau mai le faitauga o tusitusiga paia o lenei vaiaso, pe filifili mai fuaitau o loo lisi atu i lalo. Valaaulia tagata aoga e suesue le fuaitau ma faataitai le faatatauina o tusitusiga paia ia i latou lava. E mafai ona faasoa atu e tagata aoga i ni paga po o ni vaega toalaiti mea na latou mauaina e ala i le faatatauina o tagata, mea na tutupu, ma aoaoga i o latou lava olaga.

Fuaitau faaopoopo mo faataitaiga:

• Tanielu 3:12–18. Ua mumusu Sataraka, Mesako, ma Apeteniko e tapuai i se tupua auro.

• Mataio 14:25–32. Ua laveai e Iesu ia Peteru ina ua amata ona magoto ifo i totonu o le vai.

• Enosa 1:2–8. Ua lagona e Enosa le mamafa o ana agasala ma sailia le faamagaloga.

• Mataupu Faavae ma Feagaiga 25:10, 13, 15. Sa faailoa mai e le Alii Lona finagalo mo Ema Samita.

• Iosefa Samita—Talafaasolopito 1:10–11, 13–14. Ua saili Iosefa Samita mo le upumoni.

Valaaulia ma Toe Tulitatao

Fautuaina le vasega e faataitai le faatatauina o tusitusiga paia i o latou olaga. Manatua e tulitatao ma tuu atu se taimi mo i latou e faasoa mai ai mea o loo latou mauaina ia latou suesuega faaletagata lava ia e ala i le faaaogaina o lenei tomai. E mafai foi ona e valaaulia tagata aoga e faasoa mai pe faapefea e le faatatauina o tusitusiga paia ona fesoasoani ia i latou e malamalama atili ai i tusitusiga paia. Vaavaai mo avanoa e faaauau ai ona faataitai lenei tomai i le vasega.