Taulotoina o Fuaitau o Mau

Faamatala

O le taulotoina o lona uiga o le aoao o se mea e ala i le loto po o le tuuto atu i le manatuaina. Na aoao mai Elder Richard G. Scott e uiga i le mana lea e sau mai le taulotoina o fuaitau o mau. Faaali atu le upusii lenei ma faitau faatasi:

E mafai ona oo mai le mana maoae mai le taulotoina o mau. O le taulotoina o se mau o le fatuina lea o se faigauo fou. E pei lava o le mauaina o se tagata fou e mafai ona fesoasoani mai i se taimi o puapuaga, tuu mai musumusuga ma faamafanafanaga, ma avea o se punavai o uunaiga mo suiga manaomia. (Richard G. Scott, “O Le Mana o Tusitusiga Paia,” Liahona, Nov. 2011, 6)

O le taulotoina o fuaitau o mau e mafai ona fesoasoani tatou te latalata atili atu ai i le Faaola. O le taulotoina e mafai foi ona faamanuiaina ai i tatou e ala i le:

1. Fesoasoani ia tatou malamalama atili i le fuaitau.

2. Tuuina mai ia i tatou le fesoasoani, musumusuga, faamafanafanaga, ma le uunaiga.

3. Faaopoopo le mana i upu tatou te faaaogaina e aoao atu ai isi (tagai Jared R. Moon, “Why Memorize Scriptures?,” New Era, Sept. 2014, 17).

Faataitaiga

Faaaoga se fuaitau o mau mai le lesona o loo e suesueina i le taimi nei po o le Mataupu Faavae ma Feagaiga 6:36 e faaalia ai nisi o metotia o le taulotoina o loo i lalo:

• Faitau faafia upu i se atulaina, ona nana lea o upu ma toe fai e aunoa ma le tilotilo i ai.

• Tusi upu ia sili atu ma le faatasi a o faitauina le fuaiupu, ona tusi lea i lalo o le fuaitau e aunoa ma le tilotilo i le fuaiupu.

• Tusi i lalo mataitusi muamua o upu uma i le fuaiupu—e pei o le V m i t a i m u; a m a f—ona faaaoga lea o na mata’itusi e taiala ai oe a’o e fai atu le fuaiupu.

• Fatu ni ata faigofie e fesoasoani ia te oe e tauloto ai le fuaitau. Mo se faataitaiga, e mafai ona e tusia:

  O outou o le o le .

Mafaufau i isi auala fatufatua’i, e pei o le fai ma sui o se mau e faaaoga ai na o emojis o loo maua i luga o se masini eletonika.

Faataitai

Faaaoga se mau mai lau lesona o i ai nei po o se tasi e filifili e tagata aoga (pe e mafai foi ona e faaaogaina se tasi o fuaiupu o mau o loo lisi atu i lalo). Valaaulia tagata aoga e faataitai le taulotoina e i latou lava, i paga, po o ni vaega toalaiti. Valaaulia i latou e taumafai ia lē itiiti ifo ma le lua ni metotia o le taulotoina.

Fuaitau faaopoopo mo faataitaiga:

• 1 Samuelu 2:2

• Roma 15:4

• Mosaea 4:9

• Mataupu Faavae ma Feagaiga 1:38

• Mose 5:8

A uma ua lava se taimi, e mafai ona e valaaulia tagata aoga e faasoa mai i le vasega ia fuaitau o mau na latou filifilia (pe afai latou te filifilia ni mau eseese) ma metotia o le taulotoina na latou faataitaia. E mafai ona latou talanoaina po o a auala na latou faaaogaina sa sili ona aoga.

Valaaulia ma Toe Tulitatao

Fautuaina tagata aoga e tauloto fuaitau anoa o mau i le taimi o a latou suesuega faaletagata lava ia i lenei vaiaso. O nei fuaitau e mafai ona tasi le fuaiupu pe tele foi fuaiupu. E mafai ona latou filifilia se fuaitau latou te mananao e tauloto ma tuu se kopi i luga o se puipui o le potumoe, fā’ata o le faletaele, ata faaalia i luga o masini eletonika, po o se nofoaga faapena. Fai atu i tagata aoga e o mai i le isi vasega ua saunia e faasoa mai ni metotia o le taulotoina sa latou fiafia i ai ma mafaufauga ma manatu na latou maua e uiga i le taulotoina o mau. Fatu ni avanoa i le vaiaso atoa e tulitatao ai tagata aoga.