Auala e Malamalama Ai i Fuaitau o Mau e Faigata pe Fenumia’i

Faamatala

E mafai ona e amataina lenei talanoaga e ala i le faamautuina o le upumoni, mana, ma le matagofie o le afioga a le Atua (tagai i le 2 Nifae 32:3; Alema 31:5). Faailoa atu e ui o loo i ai i tusitusiga paia le afioga a le Atua, e pei ona tusia i le taimi nei ae e le atoatoa pe le aunoa foi ma se ponā (tagai i le Mataupu Faavae ma Feagaiga 1:24; Eteru 12:24; Mataupu Faavae o le Faatuatua 1:8). O tapulaa o le gagana, mea sese o le faaliliuga, ma anotusi o loo misi e mafai ona taunuu i fuaitau e faigata ona malamalama i ai. (Tagai foi i le “Bible, Inerrancy of” i le Gospel Topics.)

Tuu atu i tagata aoga le pepa e tufa atu lenei, ma talanoaina puupuu pe mafai faapefea e le mafaufau i fesili taitasi ona fesoasoani pe a latou faitau i fuaitau o mau fenumia’i pe faigata. (O lenei tomai e suesue ai tusitusiga paia e faalagolago lea i le malamalama i isi tomai suesue e pei o le “Malamalama i Tusitusiga Paia i le Talaaga,” “Faitauina ma se Vaaiga e Faavavau,” ma le “Iloiloina o le Faatuatuaina o Punaoa.”)

Fesili e Fai Atu Pe A E Maua Fuaitau Fenumia’i po o Fuaitau Faigata o Mau

Pe a e fetaiai ma se fuaitau o mau fenumia’i pe faigata, mafaufau e fai atu se tasi pe sili atu foi o fesili nei.

• E mafai faapefea e le tuuina o lenei fuaitau i le talaaga ona fesoasoani? E masani ona tuuina mai e tusitusiga paia ia i tatou aganuu ma vaaiga faalelalolagi ia e matua’i ese lava mai i o tatou lava aganuu ma vaaiga. E mafai ona faigofie ona malamalama sesē i tusitusiga paia pe a tatou le malamalama i le talaaga o se fuaitau. Faaaoga punaoa mo le suesueina o tusitusiga paia e fesoasoani ai.

• O a faamatalaga po o auiliiliga atonu o loo misi? O tusitusiga paia o ni faamaumauga e lei ma’ea. O nisi fuaitau o mau atonu e le o i ai ni faamatalaga auiliili taua e faapea, afai e iloa, e mafai ona faafaigofie ai ona malamalama i ai (tagai i le 1 Nifae 13:26–29; Iakopo 3:13; Helamana 3:14; 3 Nifae 26:6).

• O le a se malamalamaaga faaopoopo e mafai ona oo mai e ala i le mafaufau i le fuaitau mai se vaaiga e faavavau? Ia faaeteete po o a faaiuga e te faia e faavae i se fuaitau se tasi o mau. Mafaufau po o a nisi mea e te iloa e uiga i tagata, aoaoga, po o mea na tutupu. Mafaufau i mea ua uma ona e iloa e uiga i le Tama Faalelagi ma Lana fuafuaga.

• E mafai faapefea ona fesoasoani punavai talitonuina ma faatuatuaina? O le Atua o lo tatou punavai sili ona faatuatuaina. Pe a e tatalo ia te Ia e uiga i le fenumia’i o fuaitau o mau, e mafai ona e valaaulia Lona Agaga e tuuina mai se malamalamaaga faaopoopo ma le filemu. O upumoni o loo aoao mai i isi fuaitau o mau ma i aoaoga mai perofeta a le Atua e mafai foi ona taialaina ai oe. E mafai foi ona fesoasoani mātua ma taitai ma faiaoga o le Ekalesia. E mafai ona e maua le fesoasoani mai lomiga a le Ekalesia ma isi punaoa faatuatuaina.

Manatua: Afai e te lagona pea le fenumia’i pe a uma ona sailiili i nei fesili, ia manatua atonu o loo i ai nisi o fuaitau o mau e le mafai ona faamalamalamaina i le taimi nei. Atonu e manaomia lava lou faalagolago i le taimi a le Alii, o le a oo mai ai le malamalama ma le tomai (tagai i le Mataupu Faavae ma Feagaiga 101:32–34).

Faataitaiga

Filifili se fuaitau o se mau mai le vaiaso lenei o suesuega e ono foliga faigata pe faigata i au tagata aoga. Faamatala faapuupuu pe faapefea ona e faaaogaina nisi o fesili taiala mai le pepa e tufa atu e taulima ai lenei fuaitau.

Pe e mafai foi ona e faaaogaina le 2 Samuelu 6:1–7, lea o loo aumaia ai le tala ia Usa o loo faasagatonu le atolaau o le feagaiga. Faamalamalama atu o lenei tala atonu o loo faapopoleina ai nisi o tagata ona e foliga mai na fasiotia Usa e le Alii mo le taumafai e fesoasoani atu.

• E mafai faapefea e le tuuina o lenei fuaitau i le talaaga ona fesoasoani?

  Tatou te faitau mai se tasi o fesoasoaniga mo le suesueina o tusitusiga paia e ui “e foliga mai ua matuia le faasalaga ia i tatou, … e tatau ona manatua o le Atolaau o se nofoaga teuoloa paia, ma sa lapataiina ma le manino ia tagata e faapea e na o tagata atofaina e mafai ona pa’i atu i le Atolaau, ma lapataia foi e uiga i taunuuga o le le usiusitai” (Bible Dictionary, “Uzzah”).

• O a faamatalaga po o auiliiliga atonu o loo misi?

  E le tele se mea o ta’u mai e tusitusiga paia ia i tatou e uiga ia Usa, o ona faamoemoega, po o lona malamalama i faatonuga a le Alii ia Isaraelu e uiga i le pa’i atu i le atolaau (tagai i le Numera 4:15). E le o aumaia foi e le tala ia i tatou le vaaiga a le Alii.

• O le a se malamalamaaga faaopoopo e mafai ona oo mai e ala i le mafaufau i le fuaitau mai se vaaiga e faavavau?

  Mafaufau i mea ua tatou iloa e faatatau i uiga paia o le Tama Faalelagi. Ua tatou iloa e le gata ina le na o le Atua ae e alofa mutimutivale foi ma agalelei (tagai Mose 7:30). Na te le faaumatiaina tagata e aunoa ma le lapataia muamua o i latou (tagai i le 2 Nifae 25:9). I le avea ai ma se Tamā alofa, o Lona finagalo ia fesoasoani ma faamanuia Ana fanau (tagai i le 2 Nifae 26:24). E tele atu isi mea i le tala nai loo mea o loo tusia i nei fuaiupu.

• E mafai faapefea ona fesoasoani punavai talitonuina ma faatuatuaina?

  Sa ta’ua e le Alii lenei mea na tupu i faaaliga o aso e gata ai e aoao atu ai le mataupu faavae e faapea e le tatau ona tatou tuuina atu faatonuga (pe “faasagatonu le atolaau”) ia i latou ua valaauina e le Atua. E tofia e le Atua perofeta ma aposetolo e faaali mai Lona finagalo ma taitai Lona malo i luga o le fogaeleele (tagai i le Mataupu Faavae ma Feagaiga 85:6–8).

  E faatatau ia Usa ma le atolaau, na aoao mai ai Peresitene David O. McKay e faapea e i ai se tulaga lamatia i le taumafai e taitai pe faasa’o le galuega a le Alii e aunoa ma Lana pule (tagai i le Conference Report, Apr. 1936, 60; tagai foi i le Mataupu Faavae ma Feagaiga Tusi Lesona a le Tagata Aoao [2018], 457).

Faataitai

E mafai e tagata aoga ona filifili se mau latou te iloa e faigata pe fenumia’i. Valaaulia i latou e faaaoga le pepa na tufa atu mai lenei lesona e talanoaina ai (i paga, i ni vaega toalaiti, po o se vasega) le fuaitau faigata o le mau. Pe e mafai foi ona e valaaulia tagata aoga e filifili se tasi o fuaitau o loo i lalo e suesue i ai.

Fuaitau faaopoopo mo faataitaiga:

• 2 Tupu 2:23–25. Ua fetuuina e Elisaia nisi o le autalavou, ma ua osofaia i latou e urosa.

• Mataio 15:21–28. Ua faamalolo e le Faaola le tama teine a se fafine o Kanana.

• Galuega 5:1–11 Ua maua Anania ma Safaira i se pepelo ma ua pauu ma feoti.

• 1 Nifae 4:10–18. Ua poloaiina Nifae e fasioti Lapana.

Valaaulia ma Toe Tulitatao

Fautuaina tagata aoga e faaaoga fesili o i le pepa e tufa atu i le isi taimi latou te suesue ai i se fuaitau o mau e faigata pe fenumia’i. Vaavaai mo avanoa i le taimi o talanoaga a le vasega e valaaulia ai tagata aoga e faaaoga fesili pe a e fetaiai ma se fuaitau faigata pe fenumia’i.