Iloiloina o Le Faatuatuaina o Punavai

Faamatala

Faaali atu le saunoaga lea a Peresitene Dallin H. Oaks:

Ua tatou ola i se taimi ua matua’i taape ma salalau solo ai faamatalaga. Ae e le o faamatalaga uma nei e moni. E tatau ona tatou faaeteete a o tatou saili i le upumoni ma le filifilia o punavai mo lena sailiga. (Dallin H. Oaks, “Upumoni ma le Fuafuaga,” Liahona, Nov. 2018, 25)

I se isi itu, e mafai ona e faaalia le vitio “In Search of Truth” (3:03) po o se vaega o le sāvali a Peresitene Oaks “Upumoni ma le Fuafuaga” (Liahona, Nov. 2018, 25–28) mai le taimi faailo 0:18 i le 2:18. E mafai e tagata aoga ona vaavaai mo mataupu faavae e mafai ona taialaina ai i latou a o latou sailia le upumoni mai punavai eseese.

Tuu atu i tagata aoga pepa e tufa atu lenei o fesili e fesoasoani ai ia i latou e iloilo le faatuatuaina o punavai.

Fesili mo le Iloiloga o Punavai

• O a agavaa o le tusitala ma faamoemoega ma faaitu’au e ono i ai?

• Pe o tuuina mai i aoaoga poo mea o loo tutupu i lenei punavai ia le anotusi talafeagai o ō latou taimi, nofoaga, ma tulaga?

• O Ie a le vavalalata o le tusitala i mea na tutupu o loo faamatalaina?

• Pe o lagolagoina manatu ma aoaoga o loo i lenei punavai e punaoa faaopoopo faatuatuaina?

• E faapefea ona faatusatusa manatu ma aoaoga o loo i lenei punavai i upumoni o le talalelei toefuataiina a Iesu Keriso e pei ona aoao mai i tusitusiga paia ma perofeta o aso nei?

• O a ni mea o ta’u mai e lagona ma uunaiga a le Agaga Paia ia te a’u?

Faataitaiga

E mafai ona e faaaogaina le faataitaiga lenei po o se tasi o ou lava faataitaiga e faataitai ai lenei tomai.

Faasoa atu le ata faataitai lenei i tagata aoga: A o suesueina le tala o le Uluai Faaaliga a Iosefa Samita i le Iosefa Samita—Talafaasolopito 1:14–20, ua e maua se tusiga i luga o le initoneti o loo faapea mai na pa’i moni mai le Tama Faalelagi i mata o Iosefa Samita. E tusa ai ma le tusiga, o lenei mea na mafai ai e Iosefa Samita ona ia vaai i le Faaola. E te lei faalogo muamua lava i lenei faamatalaga ma taumanatunatu pe moni. “O le tusiga o loo ta’ua ai le punavai lenei o se faamaoniga:

“2nd Feb[ruary 1893] Auai i le Sauniga Anapogi. … Na saunoa Br John Alger a o saunoa atu e uiga i le Perofeta o Iosefa, a o avea o ia, o Ioane, o se tama laitiiti [i Katelani, Ohaio] sa ia faalogo o faamatala mai e le Perofeta o Iosefa lana faaaliga o le vaai atu i le Tama ma le Alo, sa pa’i atu le Atua i ona mata i lona tamatamaiaao ma faapea atu ‘Iosefa o lo’u Atalii pele lenei faalogo ia te ia.’ O le taimi lava na pa’i atu ai le Alii i ona mata i lona tamatamaiaao sa vave ona ia vaai i le Faaola. … Ina ua mae’a [le] feiloaiga, sa fesiligia e nisi o i matou [Brother Alger] e uiga i le mataupu. … Sa ma fiafia tele i le talanoaga, e pei o se mea ma te lei vaai muamua lava i ai i le talafaasolopito o le ekalesia pe na faalogo i ai muamua.” (Api Talaaga a Charles Lowell Walker [1980], 2:755–56)

Faataitai pe faapefea ona iloilo lenei punavai e faaaoga ai nisi o fesili mai le pepa e tufa atu. Mo se faataitaiga:

O fesili	Iloiloga
O fesili O a agavaa o le tusitala ma faamoemoega ma faaitu’au e ono i ai?	Iloiloga E faavae i tala ua iloa, o Uso Alger o se tagata faamaoni o le Ekalesia. O lona faamoemoega mo le faasoa atu e foliga mai o le faamalosia lea o le faatuatua i le moni o le Uluai Faaaliga a Iosefa Samita.
O fesili O Ie a le vavalalata o le tusitala i mea na tutupu o loo faamatalaina?	Iloiloga O lenei punavai o se tala ua faamatalaina i se tagata lona tolu ma ua oo mai i le silia ma le 70 tausaga talu ona mavae le faaaliga a Iosefa Samita, o lea e tatau ai i le aufaitau ona faaeteete pe a iloiloina lona aoga.
O fesili Pe o lagolagoina manatu ma aoaoga o loo i lenei punavai e punaoa faaopoopo faatuatuaina?	Iloiloga O isi tala o le Uluai Faaaliga e le o faamaonia ai le faamatalaga o le pa’i atu o le Atua i fofoga o le Perofeta (tagai Gospel Topics Essays, “First Vision Accounts,” topics.ChurchofJesusChrist.org).

Faataitai

Valaaulia tagata aoga e faasoa mai punavai latou te faaaogaina e malamalama atili ai i tusitusiga paia ma aoaoga o le talalelei. E mafai foi ona e faasoa atu punavai e te faaaogaina i au lava suesuega o tusitusiga paia ma le talalelei. Filifili se punavai e iloilo ai mai punavai sa ta’ua, pe filifili mai faataitaiga o loo lisi atu i lalo. Valaaulia tagata aoga e faaaoga fesili o i le pepa e tufa atu e faataitai ai le iloiloina o le punavai. E mafai ona latou talanoaina mea ua latou maua i paga, i vaega toalaiti, pe o le vasega atoa.

Punaoa faaopoopo e faaaoga e faataitai ai lenei tomai:

• Donald W. Parry, “O le Togiola a Iesu Keriso i le Feagaiga Tuai,” Liahona, Ape. 2022, 40–43

• Gaye Strathearn, “Maria, le Tina o Iesu,” Liahona, Ian. 2019, 12–17

• Jeffrey G. Cannon, “Meaalofa a Oliva Kaotui,” i le Revelations in Context (2016), 15–19

• “We Lived with God” (vitio), ChurchofJesusChrist.org

O punaoa nei (o loo maua i le faaPeretania) e mafai foi ona tuuina atu ai ni faataitaiga o punavai e mafai ona e faaaogaina e faatino pe faataitai ai lenei tomai:

• “Sootaga i Punaoa mo le Suesueina o le Talalelei,” ChurchofJesusChrist.org

• ScriptureCentral.org

• BibleHub.com

Manatua: O nisi o uepisaite o loo i luga e tausia e vaega lona tolu o tagata e le faapea e fesootai ma le Ekalesia. O le fesootaiga i lenei anotusi e le o ta’u mai ai se faamaoniga mai Le Ekalesia a Iesu Keriso o le Au Paia o Aso e Gata Ai.

Valaaulia ma Toe Tulitatao

Valaaulia tagata aoga e iloilo le faatuatuaina o punaoa i le taimi o a latou suesuega o tusitusiga paia ma le talalelei. E mafai ona e tulitataoina i le āluga o le vaiaso. E mafai ona e tuuina atu se taimi pe a tou toe feiloai ma tagata aoga e faasoa mai ni punaoa sa latou faaaogaina e malamalama atili ai i tusitusiga paia. Atonu latou te faasoa mai pe na faapefea ona latou iloiloina le faatuatuaina o le punavai ma faamatala pe na faapefea ona faaleleia ai lo latou suesueina o tusitusiga paia.