Tusiina o Ni Faamatalaga Anoa

Faamatala

E mafai ona e faasoa atu le saunoaga lenei a Elder David A. Bednar, o lē na saunoa mai:

O le tusia i lalo o mea ua tatou aoaoina, mafaufau i ai, ma lagonaina a o tatou suesue i tusitusiga paia o se isi lea ituaiga o manatunatu loloto ma se valaaulia mamana i le Agaga Paia mo aoaoga faifai pea. (David A. Bednar, “Because We Have Them before Our Eyes,” New Era, Ape. 2006, 6; tagai foi le Mose 6:5)

Faamalamalama atu o le tusia o ni faamatalaga anoa e mafai ona aofia ai le tusifaamaumauina o mafaufauga patino, uunaiga, molimau, fesili, upumoni, ma auala e faaaoga ai aoaoga o le talalelei. E mafai ona tatou faamaumauina faamatalaga i luga o se pepa po o se api faatekinolosi. E mafai foi ona tatou tusia i autafa o tusitusiga paia pepa pe faaopoopo ni faamatalaga i mau faaeletonika (tagai i le aoaoga o tomai “Faaopoopoina o Faamatalaga i Tusitusiga Paia”). O le tusiina o ni faamatalaga anoa e mafai ona fesoasoani ia i tatou e taulai atu ai a o tatou suesue. E mafai ona faasaoina ma fesoasoani ia i tatou e manatua ai mea ua tatou aoaoina, ma e mafai ona taitai atu ai i isi faaaliga.

Faataitaiga

Mafaufau e faasoa atu ni faamatalaga na e faia a o e sauni e aoao atu i lenei vaiaso. Pe e mafai foi ona e valaaulia ni nai tagata aoga e faasoa mai ni faamatalaga na latou faia i se api po o a latou tusitusiga paia. Valaaulia i latou e faasoa mai pe na faapefea ona faaleleia a latou suesuega o le talalelei i le tusi-faamatalaga.

E mafai ona e faataitai faapuupuu pe faapefea ona faaaoga le vaega o Api o Tusigāmanatu i le Gospel Libary. Pe e mafai foi ona e valaaulia tagata aoga o e faaaogaina lena vaaiga e faataitai ai i ni vaega toalaiti pe faapefea ona maua se api ma fatu se api fou.

Manatua: E mafai ona e maua punaoa faaopoopo ma fesoasoaniga i le vaega o le “Fesoasoani” o le polokalama o le Gospel Library, e aofia ai le “Gospel Library User Guide (iOS)” ma le “Gospel Library User Guide (Android).”

Faataitai

Tuu atu i tagata aoga se taimi e suesue ai se fuaitau mai le faitauga o tusitusiga paia o lenei vaiaso pe mai le lisi o fuaitau faaopoopo o mau o loo fautuaina atu i lalo. Uunaia tagata aoga ina ia:

• Taofi mai i lea taimi i lea taimi.

• Tatalo ina ia fesoasoani le Agaga ia i latou ia malamalama i tusitusiga paia ma faaaoga upumoni o loo latou aoaoina.

• Tusifaamaumau ni faamatalaga o mea latou te aoaoina, mafaufau i ai, ma lagonaina (i se api talaaga po o se api e tusi ai faamatalaga, a latou tusitusiga paia, po o le Gospel Library).

A maea le taimi, valaaulia ni nai tagata aoga e mananao e faasoa mai o latou aafiaga.

Fuaitau faaopoopo mo faataitaiga:

• Salamo 146:1–2, 5–8. E mafai e tagata aoga ona tusifaamaumau mafuaaga e tatau ai ona latou vivii atu i le Tama Faalelagi ma Iesu Keriso. E mafai foi ona latou faamaumauina viiga patino ia (po o lo latou talisapaia mo) i La’ua.

• Luka 22:39–44 ma le Mataupu Faavae ma Feagaiga 19:16–19. E mafai e tagata aoga ona tusifaamaumau o latou manatu ma lagona e uiga ia Iesu Keriso ma Lana taulaga togiola.

• 1 Nifae 2:18–20. E mafai e tagata aooga ona tusifaamaumau auala na latou maua ai po o i latou foi latou te iloa le alofa mutimutivale agamalu o le Alii.

• Mataupu Faavae ma Feagaiga 50:17–22. E mafai e tagata aoga ona tusifaamaumau le uiga ia i latou o le aoao e ala i le Agaga. E mafai foi ona latou faamaumauina auala e mafai ona latou valaaulia ai le Agaga e aoao i latou i le upumoni.

Valaaulia ma Toe Tulitatao

Fautuaina le vasega e tusi ni faamatalaga anoa a o latou suesue i le talalelei. Manatua e toe tulitatao ma tuu atu se taimi pe a tou toe feiloai mo tagata aoga e faasoa mai o latou aafiaga i le tusitusia o faamatalaga. Vaavaai mo ni auala e valaaulia ai tagata aoga e tusifaamaumau mea o loo latou aoaoina, mafaufau i ai, ma lagonaina a o latou suesue faatasi ma oe i tusitusiga paia i le vasega.