Faaopoopoina o Faamatalaga i Tusitusiga Paia

Faamatala

Faamalamalama atu a o tatou faitau i tusitusiga paia, e masani ona i ai o tatou mafaufauga ma fesili e uiga i mea o loo tatou faitauina, pe tatou te iloaina foi se mea tatou te lei vaai muamua i ai. A tupu lenei mea, e mafai ona tatou faaopoopo se faamatalaga e manatua ai mea o loo tatou aoaoina po o lagonaina. E mafai ona tatou faaopoopo ni faamatalaga e ala i le tusitusi i autafa o lomiga ua lolomiina o tusitusiga paia po o le faaaogaina o le vaega o Faamatalaga i le Gospel Library. O nisi o faataitaiga o faamatalaga faaletusitusiga paia e aofia ai:

• Mafaufauga ma uunaiga faaletagata lava ia.

• Faauigaga ma faamatalaga.

• Aoaoga faaperofeta.

• Mau Fesootai.

• Lisi.

• Malamalamaaga na maua mai i isi.

O le faaopoopoina o faamatalaga e mafai ona fesoasoani ia i tatou e taulai atu ai a o tatou suesue. E mafai ona faasaoina ma fesoasoani ia i tatou ia manatua mea ua tatou aoaoina. E mafai foi ona taitai atu ai i isi faaaliga.

Manatua: E mafai ona e folasia atu lenei tomai e fesootai ma le aoaoga “Faamaumauina o Faamatalaga Anoa.”

Faataitaiga

Ina ia faataitai lenei tomai, e mafai ona e fai atu i ni nai tagata aoga e faasoa mai ni faataitaiga o ni faamatalaga na latou tusia i a latou tusitusiga paia. Valaaulia nei tagata aoga e faasoa faapuupuu mai pe na faapefea e le faaopoopoina o faamatalaga ona faaleleia a latou suesuega o le talalelei.

Mafaufau e faataitai ni nai auala e faaopoopo ai faamatalaga i le lomiga lolomi o tusitusiga paia e pei o le tusiina i autafa po o luga o se fasipepa pipii po o se pepa ma tuu i autafa o le fuaitau o mau e fesootai i ai.

Faataitai faapuupuu le auala e faaopoopo ai se faamatalaga i mau faaeletonika e ala i le valaaulia o tagata aoga o e iloa pe faapefea ona faaopoopo se faamatalaga i mau faatekinolosi i le Gospel Library e faaali atu ai lenei mea i a latou uo i vaega toalaiti.

Manatua: E mafai ona e maua punaoa faaopoopo, fesoasoaniga, ma vitio i le vaega o le “Help” o le polokalama o le Gospel Library, e aofia ai le “Gospel Library User Guide (iOS)” ma le “Gospel Library User Guide (Android).”

Faataitai

Filifili se fuaitau mai le suesueina o tusitusiga paia o lenei vaiaso pe faaaoga se tasi o faataitaiga nei e valaaulia ai tagata aoga e faataitai lenei tomai. E mafai ona e lisiina ni faataitaiga o faamatalaga faatusi paia mai le vaega o le “Faamatala” o i luga e avatu ai i tagata aoga ni manatu. A uma ona latou faataitai, valaaulia ni nai tagata aoga e faasoa mai ni faamatalaga na latou faaopoopoina ia latou tusitusiga paia.

Fuaitau faaopoopo mo faataitaiga:

• Kenese 6:15. E mafai ona e maitaua le faaaogaina o se fua faaānamua e ta’ua o se kupita. E mafai e tagata aoga ona o i le tusiga mo le “Kupita” i le Taiala i Tusitusiga Paia ma kopi le faamatalaga i se faamatalaga i autafa o le Kenese 6:15.

• Mataio 11:28–30. E mafai e tagata aoga ona faaopoopo se faamatalaga e faamatala ai le uiga ia i latou o le “o mai ia Keriso” pe “amo [Lana] amo i o latou luga.”

• Alema 32:21 E mafai e tagata aoga ona suesue le Gospel Library mo aoaoga mai taitai o le Ekalesia e uiga i le faatuatua ma faaaofia ai se aoaoga e fiafia i ai i se faamatalaga i autafa o lenei fuaitau (tagai i aoaoga o tomai “Sailiili i Tusitusiga Paia ma i le Gospel Library” ma le “Faaaogaina o Aoaoga a Taitai o le Ekalesia ia Malamalama ai i Tusitusiga Paia” mo se fesoasoani pe a manaomia).

• Mataupu Faavae ma Feagaiga 59:18–19. E mafai e tagata aoga ona fatu se faamatalaga e faaalia ai le olioli e aumaia e foafoaga a le Atua ia i latou.

Valaaulia ma Toe Tulitatao

Fautuaina tagata aoga e faaopoopo ni faamatalaga i a latou tusitusiga paia i le taimi o a latou suesuega faaletagata lava ia ma i le taimi o talanoaga a le vasega. Manatua e tulitatao ma tuu atu i tagata aoga se taimi e faasoa mai ai o latou aafiaga. Mafaufau i ni auala e mafai ona faaauau ai ona e iloiloina ma faataitai lenei tomai i le vasega.