Fesootaiina o Mau

Faamatala

Faamalamalama atu o le fesootaiina o le faafesootaia lea o se fuaitau o se mau i se mau e fesootai i ai, upusii mai se taitai o le Ekalesia, po o isi anotusi o le Ekalesia. O le fesootaiina po o le fefaasinoa’i o mau e mafai ona faalolotoina ai lo tatou malamalama i le afioga a le Atua ma fesoasoani ai ia i tatou a o tatou aoao atu ma faasoa atu le talalelei i isi.

Faailoa atu o vaefaamatalaga i nisi o lomiga o mau ua uma ona i ai sootaga fesoasoani po o mau faasino i isi fuaitau o mau ma punaoa e suesue ai.

Faataitaiga

Faataitai faapuupuu le tomai lenei e ala i le faaaogaina o le faataitaiga lenei, pe faaaoga se tasi o ou lava tomai:

Faitau le Isaia 53:3–5. Faailoa atu o le fuaiupu 4 o loo aoao mai ai faapea o le Faaola “na tauave o tatou tiga, ma tauave o tatou faanoanoa.” Faailoa atu na aoao atu e Alema se upumoni faapena faatasi ai ma se faamaninoga faaopoopo e uiga i le Togiola a le Faaola. Faitau le Alema 7:11–12. Faaali atu i tagata aoga le auala latou te tusia ai le Alema 7:11–12 i autafa o le Isaia 53:4 i autafa o a latou tusitusiga paia. Pe faaali atu ia i latou pe faapefea ona faafesootai nei fuaitau o mau e faaaoga ai le vaega o le Sootaga i le Gospel Library.

E mafai ona e valaaulia tagata aoga o e iloa le ala e fatu ai ni sootaga i le Gospel Library e faaali atu lenei mea i tagata o le vasega.

Manatua: E mafai ona e maua punaoa faaopoopo, fesoasoaniga, ma vitio i le vaega o le “Help” o le polokalama o le Gospel Library, e aofia ai le “Gospel Library User Guide (iOS)” ma le “Gospel Library User Guide (Android).”

Faataitai

Filifili se fuaitau mai le suesuega o tusitusiga paia o lenei vaiaso. Tuu atu i tagata aoga se fuaitau o mau e fesootai i ai, se aoaoga mai se taitai o le Ekalesia, po o isi anotusi mai le Gospel Library e fesootai i ai. Pe e mafai foi ona e faaaogaina se tasi o faataitaiga nei e valaaulia ai tagata aoga e faataitai le tomai lenei:

• Faitau le Iopu 19:25 o se vasega. Valaaulia tagata aoga e suesue le “Togiola” i le Taiala i Tusitusiga Paia ma sue se fuaitau o mau o loo aoao mai ai e uiga i le matafaioi a Iesu Keriso i le avea ai ma o tatou Togiola. E mafai e tagata aoga ona faaopoopo se fuaitau na latou maua i autafa o a latou tusitusiga paia lolomi i autafa o le Iopu 19:25 pe fatu se sootaga i a latou tusitusiga paia faatekinolosi e fesootai ai fuaitau e lua.

• Valaaulia tagata aoga e faitau le Mataio 5:48 po o le 3 Nifae 12:48 ma faailoga le upu “atoatoa.” Ona tuu atu lea ia i latou e o i le lauga a Peresitene Russell M. Nelson “Perfection Pending” (Ensign, Nov. 1995) ma faitau le vaega “Eternal Perfection.” Valaaulia tagata aoga e filifili le parakalafa po o parakalafa latou te maua e sili ona aoga ma fatuina se sootaga.

• Valaaulia le vasega e iloilo le Luka 24:1–12 ona faailoga lea o le fasifuaitau “E le o iinei o ia, a ua tu” i le fuaiupu 6. Ona fai atu lea ia i latou e o i Vitio o le Eseta i le Gospel Library ma faafesootai se tasi o vitio e uiga i le Toetu i le Luka 24:6.

Valaaulia ma Toe Tulitatao

Fautuaina le vasega e fatu ni sootaga a o latou suesue i tusitusiga paia. Tulitatao i le vasega e sosoo ai e ala i le valaaulia o tagata aoga e faasoa mai pe na faapefea ona latou faaaogaina lenei tomai i le taimi o a latou suesuega faaletagata lava ia. E mafai ona latou faasoa atu e uiga i se sootaga sa latou faaopoopoina i a latou tusitusiga paia ma faamatala pe aisea na latou faaopoopoina ai. Vaavaai mo ni auala e faaauau ai le iloiloina ma le faataitaiina o lenei tomai i le vasega.