Makaina o Tusitusiga Paia

Faamatala

Faamalamalama atu o le makaina o tusitusiga paia i ni auala anoa e mafai ona faaleleia ai le suesueina ma le malamalama o le talalelei. O le makaina e fesoasoani e faamamafa ai mea e sili ona taua tatou te maua ma e mafai ona fesoasoani ia i tatou pe a aoao atu isi. O tagata o e filifili e faailoga a latou tusitusiga paia e mafai ona latou faia i ni auala eseese, e pei o le valivaliina, vaseina, li’oina, po o le faaopoopoina o faailoga e iloa ai upu, fasifuaitau, po o fuaitau.

Faataitaiga

Faataitai le makaina o tusitusiga paia e ala i le faia o se tasi po o le sili atu o mea nei:

• Faaali atu i tagata aoga ni nai auala eseese e mafai ona latou makaina ai se fuaitau o se mau—e pei o le vaseina, valivali, po o le faaaogaina o isi faailoga po o faatusa.

• Fai atu i ni nai tagata aoga e faasoa faapuupuu mai pe faapefea ona latou mananao e maka a latou tusitusiga paia.

• Valaaulia tagata aoga o ē iloa le auala e maka ai mau faaeletonika i luga o le Gospel Library e faataitai ai pe faapefea ona faia lenei mea i a latou uo aoga i ni vaega toalaiti.

Manatua: E mafai ona e maua punaoa faaopoopo, fesoasoaniga, ma vitio i le vaega o le “Help” o le polokalama o le Gospel Library, e aofia ai le “Gospel Library User Guide (iOS)” ma le “Gospel Library User Guide (Android).”

Faataitai

Filifili se fuaitau mai le suesueina o tusitusiga paia o lenei vaiaso pe faaaoga se tasi o faataitaiga o loo tuuina atu i lalo, ma valaaulia tagata aoga e faataitai le makaina o mau. E mafai e tagata aoga ona faailoga upu, fasifuaitau, po o upumoni e tulaga ese ia i latou. Ona mafai lea ona latou faasoa atu i ni paga po o ni vaega toalaiti mea na latou faailogaina ma pe aisea na latou faailogaina ai.

Fuaitau faaopoopo mo faataitaiga:

• Salamo 23. E mafai e tagata aoga ona maka ia fasifuaitau ma fuaitau e fiafia i ai o loo aoao ai i latou e uiga i le Alii.

• Mataio 5:38–48. E mafai e tagata aoga ona faailoga aoaoga a le Faaola e tulaga ese ia i latou.

• Mosaea 18:8–10 E mafai e tagata aoga ona maka ia fasifuaitau e faailoa mai ai tautinoga tatou te faia i le papatisoga.

• Mataupu Faavae ma Feagaiga 38:1–9. E mafai e tagata aoga ona faailoga upu po o fasifuaitau o loo aoao ai i latou e uiga ia Iesu Keriso.

Valaaulia ma Toe Tulitatao

Fautuaina le vasega e maka a latou tusitusiga paia i le taimi o a latou suesuega faaletagata lava ia o tusitusiga paia ma i le taimi o le vasega. Tulitatao i le isi vasega e sosoo ai e ala i le valaaulia o tagata aoga e faasoa mai se mea anoa na latou makaina i le taimi o a latou suesuega faaletagata lava ia ma pe aisea na latou makaina ai. E mafai ona e fesili pe faapefea e le makaina o mau ona fesoasoani ia i latou i a latou suesuega o tusitusiga paia. Vaavaai mo ni auala e faaauau ai le iloiloina ma le faataitaiina o lenei tomai i le vasega.