Faia o Fesili e Valaaulia ai le Aoao ma le Filiga

Faamatala

E mafai ona e faasoa atu le faamatalaga lenei mai ia Peresitene Henry B. Eyring:

O le fesili atu ma le taliina o fesili o loo i le totonugalemu o aoaoga uma. (Henry B. Eyring, “The Lord Will Multiply the Harvest” [address to Church Educational System religious educators, Feb. 6, 1998], ChurchofJesusChrist.org)

Faamalamalama atu o le faia o fesili a o tatou suesue i tusitusiga paia e taitai atu ai i le malamalama loloto atu i le afioga a le Atua ma valaaulia ai musumusuga patino. Mafaufau i tusitusiga paia o lo o valaaulia oe e faia se talanoaga ma i latou. O a fesili e mafai ona e faia e malamalama atili ai ia i latou? O a fesili latou te fai mai e mafai ona fesoasoani ia te oe ia e lelei atili ai? O ituaiga fesili nei e mafai ona fesoasoani e valaaulia ai le aoaoina ma le filiga:

• O fesili e uunaia ai i tatou e suesue i tusitusiga paia mo faamatalaga e uiga i le talaaga po o le anotusi

• O fesili e manaomia ai lo tatou iloiloina o tusitusiga paia mo le malamalama

• O fesili e valaaulia ai i tatou e mafaufau loloto ma faaaoga mea ua tatou aoaoina i tusitusiga paia

Faataitaiga

Ina ia faataitai lenei tomai, mafaufau e faaaoga le manatu lenei po o sou lava tomai.

Faitau o se vasega le Mataio 7:1–5. Mafaufau e faaali atu fesili e mafai ona e fesili ifo ai ia te oe lava a o e suesue i lenei fuaitau. Mo se faataitaiga:

• O Fesili e Faaosofia ai se Sailiga mo Faamatalaga: O ai o loo tautala, ia te ai, ma aisea? O le a le fasilaau ma le utupoto? O le a le uiga o le tagata pepelo?

• O Fesili e Faalolotoina ai le Malamalama: O le a le mea o loo aoao mai e le Alii e uiga i le faamasinoga e ala i le faaaogaina o ata faatusa o fasilaau ma utupoto? O le a le eseesega o le faamasinoga lē amiotonu ma le faamasinoga amiotonu? (Tagai i le Faaliliuga a Iosefa Samita, Mataio 7:1–2, i le Mataio 7:1, vaefaamatalaga a.)

• O Fesili e Faamalosia ai le Mafaufau Loloto ma le Faaaogaina: Pe o i ai se utupoto i lo’u lava mata e aafia ai le ala ou te vaai atu ai i isi? O le a se mea e mafai ona ou fai e alo ese ai mai le faamasinoga lē amiotonu?

E mafai ona e faasoa atu pe mafai faapefea e le taliina o nisi o nei fesili ona fesoasoani e te malamalama atili ai i aoaoga a le Faaola ma valaaulia ai musumusuga patino ma le faaaogaina.

Faataitai

Filifili se fuaitau mai le faitauga o tusitusiga paia o lenei vaiaso, pe e mafai ona e filifili se fuaitau mai faataitaiga o loo tuuina atu i lalo. Faaali atu pe tusi ulutala nei i luga o le laupapa:

• O Fesili e Fesoasoani i tagata Aoga e Suesue ai mo Faamatalaga

• O Fesili e Faaloloto ai le Malamalama

• O Fesili e Faamalosia ai le Mafaufau Loloto ma le Faaaogaina

Valaaulia tagata aoga e faitau le mau ma tusifaamaumau ia lē itiiti ifo ma le tasi se fesili mo ulutala taitasi. Valaaulia tagata aoga e faasoa atu le faamatalaga lenei i se paga: (1) o fesili sa latou tusia ma le (2) pe mafai faapefea e le taliina po o le mafaufau loloto i na fesili ona mafai ona faalolotoina le malamalama ma valaaulia musumusuga patino ma le faaaogaina.

Fuaitau faaopoopo mo le faataitaiina o lenei tomai:

• Isaia 53:4–5

• 1 Korinito 13:1–3

• Helamana 5:12

• Mataupu Faavae ma Feagaiga 58:27-29

Valaaulia ma Toe Tulitatao

Valaaulia tagata aoga e faaaoga lenei tomai o le faia o fesili e valaaulia ai le aoao ma le filiga e faaleleia a latou suesuega faaletagata lava ia o tusitusiga paia. Manatua e tulitatao ma tuu atu se taimi e te toe feiloai ai mo tagata aoga e faasoa mai ni fesili sa latou fesiligia a o suesue i tusitusiga paia. E mafai foi ona e valaaulia i latou e faasoa mai pe faapefea e le faia o fesili ona faaleleia lo latou tomai e malamalama ai ma fiafia i le suesueina o tusitusiga paia.