Faailoaina o Upumoni o le Talalelei i Tusitusiga Paia

Faamatala

Faamalamalama atu o tusitusiga paia o se nofoaga o upumoni e faavavau. O nisi taimi tatou te ta’ua ai nei upumoni e faavavau o aoaoga faavae po o mataupu faavae o le talalelei. Ua i ai i aoaoga faavae ma mataupu faavae a le Alii le mana e suia ai o tatou olaga (tagai Alema 31:5).

O nisi upumoni e faigofie atu ona iloa ona o loo ta’ua i tusitusiga paia. O nei upumoni ua ta’ua e faatomua mai i nisi taimi i upu po o fasifuaitau e faailo mai ai o le a aoaoina se upumoni, e pei o le “ua faapea ona tatou vaai,” “manatua,” “o lea,” “o le mea lea,” po o le “faauta.”

O isi upumoni e le o ta’ua sa’o ae o loo faaaoga po o faamatala mai i tala o tusitusiga paia, mea na tutupu, ma faataoto. E mafai ona e faailoaina upumoni ua faaaoga mai pe faamatala mai e ala i le fesili ifo ia te oe lava i fesili e pei o fesili nei:

• O le a le uiga po o le aano o lenei tala? Aisea na faaaofia ai e le tusitala?

• O a ni mea e mafai ona ou aoaoina mai tagata o i lenei tala?

• Pe mafai ona ou vaai i se sootaga o le mafuaaga-ma-le-taunuuga i le tala e faatatau i tagata i aso nei?

Faataitaiga

Faataitaiga 1: O Upumoni ua Ta’ua

Faitau faatasi le Helamana 5:9 ma faailoa mai se upumoni faapenei: Na pau lava le ala e mafai ona faaolaina ai i tatou e ala lea i le toto togiola o Iesu Keriso. Faamalamalama atu foi o le upu manatua i lenei fuaiupu o loo faailo mai ai o se upumoni o le a aoaoina.

Faataitaiga 2: O Upumoni e faaaoga mai pe Faamatala mai

Fai se aotelega o le Mataio 20:1–15, ma faasoa atu upumoni nei e mafai ona faailoa mai le faataoto i le au faigaluega i le tovine: E mafai e tagata uma ona maua faamanuiaga o le ola e faavavau tusa lava po o a taimi latou te maua ai le talalelei. O le Tama Faalelagi ma Iesu Keriso e agalelei, limaalofa, ma tutusa ia La’ua fanau uma. E tatau ona tatou fiafia mo le manuia o isi nai loo le lotoleaga.

Faataitai

Valaaulia tagata aoga e faataitai le faailoaina o upumoni o le talalelei i se fuaitau o mau o loo e suesueina i le vasega. Pe e mafai foi ona e filifili mai fuaitau o mau o loo lisi atu i lalo. Valaaulia tagata aoga e faasoa mai aoaoga faavae ma mataupu faavae latou te maua.

Fuaitau faaopoopo mo faataitaiga:

• Kenese 39:7–9

• Mataio 18:23–35

• Alema 41:10

• Mataupu Faavae ma Feagaiga 58:26–27

Valaaulia ma Toe Tulitatao

Fautuaina le vasega e faaaoga lenei tomai o le faailoaina o upumoni o le talalelei i tusitusiga paia i le taimi o a latou suesuega faaletagata lava ia. Mo ni nai vaiaso e sosoo ai, mafaufau e amata le vasega e ala i le valaaulia o tagata aoga e faasoa mai upumoni sa latou iloaina i le taimi o a latou suesuega faaletagata lava ia.

A o faaauau pea ona e tulitatao ma faataitai lenei tomai, mafaufau e aoao atu i tagata aoga ni tomai faaopoopo e ono fesoasoani ia i latou e faailoa mai ai upumoni. O se tasi o na tomai o le sue lea o upumoni na faailoa mai e perofeta ma aposetolo o aso nei mai se fuaitau o mau.

O isi aoaoga o tomai o loo aofia i lenei anomea e mafai foi ona fesoasoani i tagata aoga e faailoa atili ai upumoni, e pei o le “Vaavaai mo Sootaga o Le Mafuaaga-ma-le-Taunuuga i Tusitusiga Paia” ma le “Malamalama i Tusitusiga Paia i le Talaaga.”