Ua Maua e Konelio ma Ana Uo le Agaga Paia

O le talalelei e mo tagata uma

O Konelio ma lona aiga o loo fesoasoani i se tasi o manaomia le fesoasoani.

O Konelio o se taitai o fitafita Roma. Sa talitonu o ia ma lona aiga i le Atua, ae sa le o i latou o ni tagata Iutaia ma sa latou le iloa e uiga ia Iesu Keriso. Sa faasoa atu e Konelio mea sa ia te ia i e matitiva ma tatalo soo i le Atua.

Galuega 10:1–2

I se tasi aoauli, sa sau ai se agelu ia Konelio a o anapogi ma tatalo o ia. Na faapea atu le agelu, “Konelio, ua o ae au tatalo.” Sa vaaia e le Atua lona agalelei. Sa ta’u atu e le agelu ia Konelio e sue le Aposetolo o Peteru, o lē sa nofo i se aai e igoa o Iopa. O le a ta’u atu e Peteru ia Konelio le mea e fai.

Galuega 10:3–6, 30–32

Ua ta’u atu e Konelio i ana auauna e sue Peteru.

Sa ta’u atu e Konelio i ana auauna le tala a le agelu. Sa ia auina atu i latou i Iopa e fai atu ia Peteru e sau e asiasi mai ia te ia.

Galuega 10:7–8

I Iopa, sa i ai Peteru i le taualuga o le fale o loo tatalo. Sa fiaai o ia ma o le a alu e ai, ae na faafuasei lava ona ia vaai i se faaaliga vaaia.

Galuega 10:9–10

Sa vaai Peteru i se ie tele o sau i lalo mai le lagi, ua tumu i ituaiga uma o manu ma manulele. Ona faalogoina lea e Peteru o fai mai se leo e tatau ona ia ’aia na manu. Ae o manu nei sa le faatagaina tagata Iutaia e aai ai. Fai mai le tulafono a Mose e lē mamā i latou. Sa le’i manao Peteru e ’ai i latou.

Galuega 10:11–14

Na fai mai le siufofoga afai na faamamaina e le Atua se mea, e le tatau ona ta’ua e lē mamā. Sa faatolu ona faaali mai le faaaliga. Sa mafaufau Peteru po o le a lona uiga.

Galuega 10:15–17

Ua ta’u atu e se leo ia Peteru e alu e feiloai ma auauna a Konelio.

O le taimi lava lena, na ta’u atu ai e le Agaga ia Peteru o loo sailia o ia e ni alii se toatolu. “Tou te o ma i latou,” na fai atu ai le Agaga, “aua ua aauina i latou e au lava.”

Galuega 10:16–21

O nei alii e toatolu o auauna a Konelio. Sa latou ta’u atu ia Peteru e uiga i le agelu na vaai i ai Konelio ma fesili atu pe mafai ona sau Peteru e aoao o ia. O le mea masani, e le ulufale tagata Iutaia i fale o tagata sa le o ni Iutaia, ma sa le’i aoaoina i latou e Aposetolo i le talalelei. Ae o le manatua ai o lana faaaliga vaaia, sa tonu ai ia Peteru e alu.

Galuega 10:22, 28

Ua feiloai Peteru ia Konelio ma lona aiga ma uo.

Ina ua taunuu atu Peteru, sa faatalitali mai Konelio ma le toatele o uo ma tagata o le aiga mo ia. Sa ia ta’u atu ia Peteru ua latou saunia e faalogo i soo se mea na poloaiina ai o ia e le Atua e ta’u atu ia i latou.

Galuega 10:26, 33

Ua aoao atu Peteru e uiga ia Iesu Keriso.

Ua malamalama nei Peteru i le mea sa aoao atu e le Atua ia te ia i le faaaliga vaaia. Sa ta’u atu e Peteru i tagata uma e le alofa le Atua i se atunuu se tasi po o se vaega o tagata e sili atu nai lo le isi. E talia e le Atua soo se tasi e mulimuli ia te Ia ma faia le mea sa’o. Sa aoaoina e Peteru ia Konelio ma lona aiga ma uo e uiga ia Iesu Keriso.

Galuega 10:34–43

Ua papatiso e Peteru le aiga ma uo a Konelio.

A o ia aoao atu, sa oo ifo le Agaga Paia i tagata uma sa faalogologo. Sa valaaulia i latou e Peteru ina ia papatisoina i le suafa o Iesu Keriso. Sa iloa e Peteru e talia fanau uma a le Atua i le Ekalesia a Iesu Keriso. Sa tala’i atu le talalelei a Iesu Keriso i tagata uma.

Galuega 10:44–48