Ua Tietie atu Iesu i Ierusalema

Ua faafeiloai e tagata lo latou Faaola

Ua faatalitali tagata e feiloai ma Iesu i fafo atu o Ierusalema.

Sa toeititi lava oo i le taimi mo le Paseka, o se taumafataga taua mo tagata Iutaia. E toatele tagata na o atu i Ierusalema mo le Paseka. Sa o atu foi Iesu ma Ona soo. Ina ua faalogo tagata ua afio mai Iesu, sa latou o atu e faafetaiai ia te Ia.

Mataio 21:1; Ioane 12:12–13

O Iesu ma Ona soo ua latalata atu i Ierusalema.

Ina ua latalata atu Iesu ma Ona soo i Ierusalema, sa Ia fai atu ia i latou e aumai se asini ia te Ia. I le tele o tausaga na muamua atu, sa fai mai ai se perofeta o le a afio mai ma le lotomaualalo le Faaola, ma tietie i se asini laititi.

Mataio 21:1–7; tagai foi i le Sakaria 9:9

Sa ulu atu Iesu i le aai o tietie i luga o le asini. Sa fiafia lava tagata e vaai atu ia te ia. Sa latou faafeiloaia o Ia e pei o se tupu. Sa latou fola lau pama ma lavalava i luga o le ala mo le asini e savali ai. Sa latou faafetai atu i le Atua ma alalaga atu, “Osana: Ia faamanuina le Tupu o Isaraelu ua afio mai i le suafa o le Alii.”

Mataio 21:8–9; Luka 19:36–38; Ioane 12:13

E toatele tagata i Ierusalema na mafaufau po o le a le mea na tupu. “O ai lena?” sa latou fesili ai. O isi na tali mai o Iesu o Nasareta.

Mataio 21:10–11

O Iesu ua ia iloa tagata o fefaatauai tupe i totonu o le malumalu.

Na sosoo ai ma le alu atu o Iesu i le malumalu. O nisi tagata iina sa fefaatauai tupe ma faatau atu manu ina ia ositaulagaina. Sa silafia e Iesu sa latou le faamaoni.

Mataio 21:12

Ua ta’u atu e Iesu i tagata o e ua fefaatauai tupe e tuua le malumalu.

Sa le’i fiafia Iesu le tulaga lea ua su’e a latou tupe i tagata o e sa mananao e tapua’i i le malumalu. Sa ia faia ia latou tuua le malumalu ma na fuli i lalo a latou laulau. Na Ia fetalai, “E ta’ua lo’u fale, o le fale tatalo; a ua faia e outou ma ana o e faomea”

Mataio 21:12–13; tagai foi i le Isaia 56:7; Ieremia 7:11

Ua faamaloloina e Iesu tagata i le malumalu.

O tagata sa tauaso po o e sa le mafai ona savavali na o mai ia Iesu i le malumalu, ma sa Ia faamaloloina i latou. Sa valaau atu tamaiti “Osana,” ma vivii atu ia Iesu ma fai mai o Ia o le Faaola.

Mataio 21:14–15

Ua talanoa Iesu ma faitaulaga ma le au tusiupu.

Sa le fiafia nisi o faitaulaga ma tusiupu ina ua latou vaai i mea na faia e Iesu ma faalogo i mea na fai mai ai tamaiti. Sa faamanatu atu e Iesu ia i latou e uiga i se mau o loo faapea mai o le a faia e le Atua se viiga atoatoa e sau mai gutu o tama meamea.

Mataio 21:15–16; tagai foi i le Salamo 8:2