Luka 7:1–10

Ua faamalolo e Iesu se Auauna a le Taitai o le Toaselau

Ua faaalia e se taitai Roma le faatuatua tele

Sa nofo se taitai o le toaselau i Kapanaumi, o se taulaga sa masani ona aoao atu ai Iesu. O ia o le taitai o se vaega toatele o fitafita.

Luka 7:1–2

O lenei taitai o le toaselau sa i ai se auauna sa faapitoa tele ia te ia. Sa ma’i le auauna ma o le a oo ina oti.

Luka 7:2

E ui lava o le taitai o le toaselau e le o se Iutaia, ae sa ia faalogo ia Iesu. Sa talitonu o ia e i ai ia Iesu le mana e faia ai vavega tetele. Sa ia auina atu nisi o taitai o Iutaia e fai atu ia Iesu e sau ma faamalolo lana auauna.

Luka 7:3–4

Sa ta’u atu e taitai ia Iesu e uiga i le taitai o le toaselau ma lana auauna. Sa latou fai mai o lenei taitai o le toaselau sa agalelei i tagata Iutaia. Sa amata ona savali atu Iesu agai atu i le fale o le taitai o le toaselau. Ae a o lei taunuu atu o Ia iina, sa taofia Iesu e nisi o uo o le taitai o le toaselau. Sa latou fai atu ia te Ia e aua nei sau i totonu o le fale.

Luka 7:4–6

Na fai mai uo e le’i lagonaina e le taitai o le toaselau le agavaa ina ia i ai Iesu i lona fale. Sa talitonu o ia e mafai e Iesu ona faamalolo lana auauna e oo lava mai se mea mamao!

Luka 7:6–8

Sa ofo Iesu i le faatuatua o le taitai o le toaselau. Na fetalai o ia, e le’i vaai o Ia i se faatuatua tele faapea.

Luka 7:9

Ina ua toe foi atu uo a le taitai o le toaselau i lona fale, ua faamaloloina atoa le auauna. Sa faamaloloina o ia e Iesu, e pei lava ona talitonu le taitai o le toaselau e mafai ona Ia faia.

Luka 7:10