Luka 24:1–12, 36–49; Ioane 20

Ua Toetu o Ia

Ua faatoilalo e Iesu Keriso le oti mo tagata uma

Sa tuu e soo o Iesu Lona tino i le tuugamau. Sa latou mananao e faia nisi mea se tele e tausia ai Lona tino, ae sa toetoe lava a oo i le Sapati. Sa latou fuafua e toe foi mai pe a mae’a le Sapati.

Luka 23:52–56

I le taeao po o le aso tolu ina ua mavae le maliu o Iesu, sa o atu ai Maria le Makatala ma isi i le tuugamau.

Luka 24:1; Ioane 20:1

Ina ua latou taunuu atu, sa latou vaaia ua tulei ese le maa na ufiufi ai le tuugamau. Sa latou o atu i le tuugamau, ma sa le’i i ai iina le tino o Iesu.

Luka 24:2–3; Ioane 20:1

Sa tamoe Maria e ta’u atu ia Peteru ma Ioane ua aveese e se tasi le tino o Iesu. Sa taufetuli atu Peteru ma Ioane i le tuugamau.

Ioane 20:2–4

Ina ua la taunuu atu i le tuugamau, sa o atu Peteru ma Ioane i totonu. Sa la vaaia ai ua leai se tino o Iesu. O le ie sa afifiina ai o Ia sa i ai pea iina.

Ioane 20:5–7

Sa o Peteru ma Ioane i le fale, ae sa nofo Maria i tafatafa o le tuugamau, ma tagi. Sa tilotilo atu o ia i le tuugamau ma vaaia ni agelu se toalua. Sa latou fesili atu ia te ia pe aisea ua tagi ai. Sa ia fai mai ua ave e se tasi le tino o Iesu, ma na te le’i iloa po o fea o i ai.

Ioane 20:11–13

Ona afio mai lea o Iesu, ae sa le’i iloa e Maria o Ia lea. Sa fesili atu Iesu ia te ia, “Funa e, se a le mea e te tagi ai?” Sa manatu Maria o Ia o le faitogalaau. Sa ia fesili atu ia te Ia pe na te silafia le mea o i ai le tino o Iesu.

Ioane 20:14–15

Na fetalai Iesu, “Maria e.” Sa faliu mai o ia. O lenei ua ia iloa o Iesu lava lea! Sa ia fai atu ia te Ia, “Matai e.” Sa fai atu Iesu ia te ia e ta’u atu i isi soo e tatau ona alu o Ia i Lona Tama Faalelagi. Sa maua e Maria isi soo ma ta’u atu ia i latou ua ia vaai ia Iesu ma ua toe ola mai o Ia!

Ioane 20:16–18

I lena afiafi, o le toatele o Aposetolo sa faatasi. Sa latou tapunia faitotoa, ma fefefe nei taumafai taitai o Iutaia e sue i latou. Na faafuasei lava, ona latou vaai ia Iesu o tu i totonu o i latou. I le taimi muamua sa latou fefefe. Sa latou manatu o Ia o se agaga. Na fetalai Iesu, “Ia outou filemu.”

Luka 24:33–38; Ioane 20:19

Sa valaaulia e Iesu ia Aposetolo e pa’i atu i Ona lima ma vae. Sa manao o Ia ia latou iloa sa i ai Sona tino, ae le na o se agaga. Sa ia ‘ai foi i’a ma le melikolo faatasi ma i latou. Sa matua fiafia le au soo e vaai ia te Ia!

Luka 24:39–44; Ioane 20:20

Ona fesoasoani lea o Iesu i Ana Aposetolo ia malamalama i tusitusiga paia na aoao mai e uiga i Lona maliu ma le Toetu. Sa manao o Ia ia latou aoao atu i tagata uma ona o Ia, e mafai ai ona latou salamo ma faamagaloina. O Aposetolo o Le a avea ma Ana molimau.

Luka 24:44–48

Sa le’i i ai iina le Aposetolo o Toma ina ua afio mai Iesu. Sa ia fai mai na te le talitonu o loo soifua Iesu sei vagana ua mafai ona ia vaai i tulaga fao i Ona aao.

Ioane 20:24–25

E valu aso mulimuli ane, ae faapotopoto faatasi le au soo. Sa toe faaali mai Iesu. O le taimi lea sa i ai Toma iina.

Ioane 20:26

Sa valaaulia e Iesu ia Toma e pa’i atu i manu’a i Ona aao ma autafa. Sa ia ta’u atu ia Toma, “Aua foi e te masalo vale, a ia e talitonu.” Na fai mai Toma, “Lo’u Alii e ma lo’u Atua.” O lenei ua talitonu Toma ua toetu Mai Iesu. Na fetalai Iesu e faamanuiaina tagata pe a latou talitonu, e tusa lava pe latou te le’i vaai ia te Ia.

Ioane 20:27–29