Luka 4:16–31

Ua Molimau Atu Iesu e uiga i Lana Misiona

Teenaina i Nasareta

Sa maliu atu Iesu i Nasareta, lea sa nonofo ai Lona aiga ma uo. O le nofoaga lea sa Ia soifua a’e ai. I le aso Sapati, sa alu o Ia i le sunako, lea na o i ai tagata e suesue i tusitusiga paia ma tapuai i le Atua.

Luka 4:16–17

I le sunako, sa tu Iesu ma faitau se mau mai le perofeta o Isaia. Fai mai le mau o le a i ai se aso o le a afio mai ai se Faaola. O le a Ia talai atu le talalelei i e matitiva ma faamalolo i loto momomo. O le a Ia fesoasoani i e tauaso ma i latou o e ua tiga.

Isaia 61:1–2; Luka 4:17–19

Na uma ona faitau Iesu ma nofo ifo i lalo. Sa tau fai vaavaai atu tagata uma ia te Ia. Sa Ia ta’u atu ia i latou o lena lava aso, o le a tupu moni ai le mau na Ia faitauina. O Ia lava o le Faaola.

Luka 4:12

Sa matuā ofo tagata o Nasareta i le fetalaiga a Iesu. E mafai faapefea ona avea Iesu ma Faaola? Sa latou manatu ua na o Ia o se atalii o Maria ma Iosefa, ae le o le Alo o le Atua. Ia i latou, sa foliga mai o Ia o se tagata masani.

Luka 4:22

Sa silafia e Iesu sa mananao tagata ia te Ia e faia se vavega e faamaonia ai o Ia o le Faaola. Sa Ia aoao atu o vavega e mo tagata o e talitonu, ma o nisi taimi sa faia ai e le Atua vavega mo i latou o e sa le o ni Isaraelu ona sa tele atu lo latou faatuatua. Sa feita nisi o tagata i le sunako ia Iesu.

Luka 4:23–28

Sa latou faamalosia o Ia i fafo o le nuu e oo atu i le tumutumu o se maupuepue. Sa latou mananao e lafo ifo o ia mai le maupuepue.

Luka 4:28–29

Ae na alu ese Iesu mai tagata feita.

Luka 4:30

Ona sa latou le mananao ia te Ia i Nasareta, sa alu atu ai Iesu i se isi nuu e aoao atu ai.

Luka 4:31–32