O Le Faatomuaga
E Uiga i le Feagaiga Fou
O le tala ia Iesu Keriso ma Ona soo
O le Tusi Paia e lua ona vaega: o le Feagaiga Tuai ma le Feagaiga Fou. O le Feagaiga Tuai o loo i ai tusitusiga a perofeta mai aso ua leva. O nisi o nei perofeta na tusia faapea na folafola mai le Atua e auina mai se Faaola. O le a avea o Ia ma Alo o le Atua ma laveai i tatou mai le agasala ma le oti ina ia mafai ona tatou toe nonofo faatasi ma le Atua.
Isaia 53:3–5; Iakopo 7:11; Mose 4
Ua faamatala mai e le Feagaiga Fou le ala na faataunuuina ai lenei folafolaga. O loo faamatala mai ai le soifua mai o Iesu Keriso, le Alo o le Atua.
Luka 2:4–7
O loo faamatala mai foi i le Feagaiga Fou e uiga i le soifuaga o Iesu. Sa soifua o Ia faatasi ma tagata Iutaia ma aoao i tatou i le ala e ola ai ina ia mafai ona tatou toe foi atu i le Tama Faalelagi i se aso.
Mataio 5:1–2
Sa faamanuiaina ma auauna atu Iesu i tagata. Sa Ia faia le tele o vavega mo i latou, e pei o le faamaloloina o tagata o e na mama’i ma toe faatutu mai i le ola tagata o e na maliliu.
Mataio 4:23
Na filifilia e Iesu le toasefululua o Ona soo e avea ma Aposetolo. Na Ia tuuina atu foi ia i latou le pule e taitai ai Lana Ekalesia.
Luka 9:1–2
Ona e alofa o Ia ia i tatou, na tauave ai e Iesu i Ona lava luga o tatou tiga uma, faanoanoaga, ma le agasala. Sa maliu o Ia mo i tatou. Ona oo lea i le tolu aso mulimuli ane, sa Ia faatoilaloina le oti ma sa toetu mai! O loo soifua Iesu Keriso ma ona o Ia, ua mafai ai ona tatou salamo i a tatou agasala ma toe ola pe a tatou oti.
O tagata na iloa ma alolofa ia Iesu na tusitusi e uiga i nei mea uma. Sa tusia e Ana Aposetolo ni tusi e fesoasoani ai i tagata o le Ekalesia e fausia lo latou faatuatua ia Iesu Keriso. O mea na latou tusia ua faasaosaoina mo le tele, ma le tele o tausaga. Ua mafai nei ona e faitau i ai i le Feagaiga Fou ma aoao pe faapefea ona mulimuli ia Iesu Keriso.
Luka 1:1–4