Simona ma le Mana o le Atua

Aoao e uiga i le perisitua a le Atua

O Simona o loo vaavaai atu i se Aposetolo o faamalolo se tagata.

Sa nofo se tagata e igoa ia Simona i Samaria. Ina ua faalogo o ia i le talalelei a Iesu Keriso, sa talitonu o ia. Sa maofa foi o ia i vavega na faia e soo o Iesu i le mana o le Atua. Sa papatisoina Simona, ma sa faapena foi i le toatele o isi alii ma tamaitai i Samaria.

Galuega 8:5–13

O Peteru ma Ioane o loo faaee o la lima i luga o le ulu o se tagata.

Sa faalogo Aposetolo i Ierusalema ua papatisoina tagata i Samaria. Sa o Peteru ma Ioane i Samaria. I le faaaogaina o le mana o le Atua, le perisitua, sa faaee ai o latou lima i luga o tagata o e na papatisoina ma tuuina atu ia i latou le meaalofa o le Agaga Paia.

Galuega 8:14–17

Ua ofo atu e Simona se tupe e faatau ai le perisitua a le Atua.

Ina ua vaai Simona ua faia e Peteru ma Ioane lenei mea, sa ia ofoina atu ia i la’ua se tupe ma fai atu, “Aumai foi ia te au lenei mana.” Sa manao o ia e faatau le perisitua a le Atua ina ia mafai ai foi ona ia tuuina atu le meaalofa o le Agaga Paia.

Galuega 8:18–19

Ua aoao e Peteru ia Simona e uiga i le perisitua.

Sa faamalamalama atu e Peteru e leai se tasi e mafai ona faatauina le mana o le Atua. O se meaalofa mai ia te Ia. Sa ta’u atu e Peteru ia Simona e tatau ona suia lona loto. Sa ia valaaulia Simona e salamo ma tatalo i le Atua mo se faamagaloga.

Galuega 8:20–23

Ua talosaga Simona ia Peteru mo se faamagaloga.

Sa salamo Simona. Sa fai atu o ia ia Peteru e tatalo mo ia ina ia fesoasoani ia te ia e suia.

Galuega 8:24