Galuega 6–7

Ua Molimau Setefano e uiga ia Iesu Keriso

O se auauna lototoa e tuuina atu lona ola mo lana molimau

Sa vave le faatupulaia o le Ekalesia. Sa faasolo ina faigata i Aposetolo ona tausia tagata uma o le ekalesia.

Galuega 6:1–2

Sa tonu i Aposetolo e valaau ni alii se toafitu e mafai ona fesoasoani. Sa latou fai atu i tagata o le ekalesia e vaavaai mo alii o e sa atamamai ma tumu i le Agaga Paia.

Galuega 6:3

O se tasi o tagata sa latou filifilia o Setefano. Sa tuuina atu e Aposetolo ia te ia se faamanuiaga. Sa tele le faatuatua o Setefano ma faia ni vavega maoae i tagata.

Galuega 6:5–8

Sa aoao atu Setefano e uiga ia Iesu Keriso i le poto faatasi ma le Agaga. Ae sa le fiafia taitai o se sunako i mea sa ia aoao atu. Sa latou fai mai sa tautala o ia e faasagatau ia Mose ma faasagatau i le Atua. Sa latou aumaia Setefano i luma o le faitaulaga sili ma isi taitai.

Galuega 6:9–15; 7:1

Sa pei foliga o Setefano o foliga o se agelu. Sa ia faamanatu atu i taitai na auina atu e le Atua ia Mose e laveai Isaraelu, ae latou te le’i mulimuli i taimi uma ia Mose. Fai mai Setefano o Mose sa pei o Iesu Keriso. Na auina mai e le Atua ia Iesu e laveai Lona nuu, ae sa le’i mulimuli taitai ia te Ia. Sa feita taitai ia Setefano.

Galuega 7:20–43, 51–54

I le faatumulia ai i le Agaga Paia, na tilotilo atu ai Setefano i le lagi. Sa ia vaai ia Iesu Keriso o tu i autafa o le Tama Faalelagi.

Galuega 7:55–56

Ina ua ta’u atu e Setefano i taitai le mea sa ia vaaia, sa atili ai lo latou le fiafia. Sa latou feei i le ita ma pu’e mai Setefano. Sa latou tosoina o ia i fafo o le aai.

Galuega 7:57

Sa latou fola o latou ofutalaloa i vae o se tagata na igoa ia Saulo. Ona latou tau’ai lea o maa ia Setefano e fasiotia ai o ia. Sa ioe Saulo i le mea sa latou faia. Sa tatalo Setefano. Sa ia ole atu i le Alii e faamagalo i tagata o e na faatiga ia te ia. Sa ia ole atu foi i le Alii ia talia lona agaga i le lagi.

Galuega 7:59–60; 8:1