“Pa’ū o Atamu ma Eva,” Autu ma Fesili (2023)
Vaaiga Aoao
O Le Pa’ū o Atamu ma Eva
I le Faatoaga o Etena, sa poloaiina ai e le Atua, “O laau uma o le faatoaga e mafai ona e ʼai saoloto ai, ae o le laau e iloa ai le lelei ma le leaga, aua e te ‘ai ai; ae ui i lea, e mafai ona e filifili mo oe lava, ona ua tuuina atu ia te oe; peitai, ia manatua ua Ou faasaina, aua o le aso e te ʼaia ai e te oti moni ai lava.” Ona sa solia e Atamu ma Eva lenei poloaiga ma aai i le fua o le laau e iloa ai le lelei ma le leaga, sa tuliesea ai i la’ua mai luma o le Alii. I nisi faaupuga, sa la oo i le oti faaleagaga. Sa avea foi i laua ma tagata ola i la le tino—e oo i ai le oti faaletino. O lenei oti faaleagaga ma le oti faaletino e ta’ua o le Pa’ū.
O Lo Tatou Tulaga Pa’ū
I le avea ai ma fanau a Atamu ma Eva, ua tatou mautofi ai i se tulaga pau i le olaga faitino. Ua vavaeeseina i tatou mai le afioaga o le Alii ma oo ai i le oti faaletino. Ua tuuina foi i tatou i se tulaga o le tetee, lea e tofotofoina ai i tatou i faigata o le olaga ma faaosoosoga a le fili.
I lenei tulaga pā’u, ua i ai ai se feteenaiga i totonu o i tatou. O i tatou o fanau agaga a le Atua, o i ai ni malosiaga e avea ai ma “tofusia faatasi ai i le amio Atua.” Peitai, “ua matou le agavaa i luma [o le Atua]; ona o le pau ua oo ai ina leaga e le aunoa o matou natura.” E manaomia ona faaauau pea ona tatou tauivi e faatoilalo ia tuinanau ma manaoga lē amiotonu.
O le toe ta’ua ai o upu a se agelu, na fai mai ai le Tupu o Peniamina, “O le tagata natura o se fili i le Atua, ma sa faapea lava mai le paʼū o Atamu.” Na lapatai mai le Tupu o Peniamina e faapea, i lenei tulaga natura, po o le paʼū, o le a avea ai tagata taitasi o se fili i le Atua e faavavau, “vagana ai ua gauaʼi atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto e usitai i mea uma ua silafia e le Alii e tatau ona faaoo mai i ona luga, e pei ona usiusitai atu se tamaitiiti i lona tamā.”
O Faamanuiaga o le Paʼū
O le Pau o se vaega taua o le fuafuaga o le faaolataga. E valalua le faasinoga—e faasino agai i lalo ae agai i luma. E le gata i le folasiaina mai ai o le oti faaletino ma le faaleagaga, ae ua tatou maua ai le avanoa e fananau mai ai i le lalolagi ma ia aoaoina ma alualu ai i luma. E ala i le faaaogaina ma le amiotonu o le faitalia ma lo tatou salamo faamaoni pe a tatou agasala, e mafai ai ona tatou o mai ia Keriso ma, e ala i Lana Togiola, ma saunia e maua le meaalofa o le ola e faavavau. Sa aoao mai le perofeta o Liae:
“Ana lē solitulafono Atamu e lē paʼū o ia, ma tumau pea o ia i le faatoaga o Etena. Ma e tumau pea mea uma na foafoaina i le tulaga e tasi sa i ai ina ua uma ona foafoaina; ma tumau ai pea e faavavau, ma leai se iuga.
“Ma ua lē maua e [Atamu ma Eva] ni fanau; o le mea lea semanū e tumau pea i laua i le tulaga o le lē sala, e aunoa ma se olioli, ona sa laua lē iloa se pagatia; la te lē faia se mea lelei, ona sa laua lē iloa le agasala.
“Ae peitai, faauta, ua faia mea uma i le poto o Le ua silafia mea uma.
“Na paʼū Atamu ina ia i ai tagata; ma ua i ai tagata, ina ia latou maua le olioli.
“Ma e afio mai le Mesia i le atoatoaga o taimi, ina ia mafai ona ia togiolaina le fanauga a tagata mai le paʼū.”
Sa faaali atu e Atamu ma Eva lo la lotofaafetai mo faamanuiaga na faapea ona oo mai o se taunuuga o le Paʼū:
“Na viia ai e Atamu le Atua ma sa faatumuina, ma sa amata ona vavalo e uiga i aiga uma o le lalolagi, ua fai mai: Ia viia lava le suafa o le Atua, aua ona o laʼu solitulafono ua pupula ai oʼu mata, ma o le a ou maua i le olaga lenei le olioli, ma o le a ou toe vaai i le Atua i le tino.
“Ma o Eva, lana ava, sa faalogo atu i nei mea uma ma sa fiafia, ua fai mai: Ana lē seanoa la ta solitulafono po ua lē maua e i taua ni fanau, ma po ua lē mafai ona ta iloa le lelei ma le leaga, ma le olioli o le togiolaina o i taʼua, ma le ola e faavavau ua tuu mai e le Atua ia i latou uma o e e usiusitai.”
Togiolaina mai le Pa’ū
Ona o lo tatou natura pa’ū, ma faaletino ma a tatou agasala taitoatasi, o lo tatou faamoemoe e tasi ua i ai lea ia Iesu Keriso ma le fuafuaga o le faaolataga.
E ala i le Togiola a Iesu Keriso, o le a faaolaina ai tagata uma mai aafiaga o le Pa’ū. O le a tatou toetutu, ma o le a toe aumai i tatou i le afioaga o le Alii e faamasinoina.
E le gata i le togiolaina o i tatou mai aafiaga aoao o le Pa’ū, e mafai e le Faaola ona togiola i tatou mai a tatou lava agasala. I lo tatou tulaga pa’ū, tatou te agasala ai ma faataumamao i tatou lava mai le Alii, e aumaia ai le oti faaleagaga i o tatou lava luga. E pei ona fai mai le Aposetolo o Paulo “Ua agasala tagata uma lava, ma ua le oo i le viiga mai le Atua.” Afai tatou te tumau i a tatou agasala, e le mafai ona tatou nonofo i le afioaga o le Atua, aua “e leai se mea lē mama e mafai ona mau … i ona luma.” O le mea e faafetai ai, o Iesu Keriso “ua faataunuu ai le tuutuuga o le salamo,” ua mafai ai ona tatou maua le faamagaloga mo a tatou agasala ma nonofo ai i le afioaga o le Atua e faavavau. Na aoao mai Alema, “Sa i ai se avanoa na tuu mai i le tagata e mafai ai ona ia salamo; o lea ua avea ai le olaga lenei ma tulaga nofovaavaaia; o se taimi e saunia ai e fetaiai ma le Atua; o se taimi e saunia ai mo lena olaga e lē gata, lea na ma tautatala atu ai, lea pe a mavae atu le toetutu mai o e ua oti.”
Lotofaafetai mo le Taulaga Togiola a le Faaola
E pei lava ona tatou le mananao i se meaai seiloga ua tatou fiaaai, o le a tatou le mananao atoatoa i le faaolataga e faavavau seiiloga tatou te iloa lo tatou manaomia o le Faaola. O lenei iloaina e oo mai a o tatou tuputupu a’e i lo tatou malamalama i le Pā’u. E pei ona aoao mai le perofeta o Liae, “Sa leiloloa tagata uma ma i ai i se tulaga paʼū, ma o le a tumau ai pea vagana ai ua latou faalagolago i lenei Togiola.”