« ការប្រែចិត្ដជឿលើព្រះយេស៊ូវគ្រីស្ទ » ប្រធានបទ និង សំណួរ ( ឆ្នាំ២០២៣ )
មគ្គុទ្ទេសក៍សិក្សាដំណឹងល្អ
ការប្រែចិត្តជឿលើព្រះយេស៊ូវគ្រីស្ទ
ការផ្លាស់ប្តូរដួងចិត្ដដែលមកពីការធ្វើតាមព្រះយេស៊ូវគ្រីស្ទ
តើអ្នកធ្លាប់ឃើញសត្វដង្កូវមេអំបៅនៅខាងក្រៅឬទេ ? សូមចំណាយពេលមួយនាទីដើម្បីគិត ថាតើវាជាអព្ភូតហេតុយ៉ាងណាទៅ ដែលតាមរយៈអំណាចនៃរូបវិបត្ដិន៍ សត្វដង្កូវមេអំបៅធម្មតាមួយអាចក្លាយទៅជាមេអំបៅដ៏ស្រស់ស្អាតមួយបាន ។ មួយជំហានម្ដងៗ សត្វដង្កូវមេអំបៅធំធាត់ និងផ្លាស់ប្ដូរ ប្រែក្លាយទៅជាអ្វីមួយដែលថ្មីស្រឡាង ។
ការប្រែចិត្តជឿផ្ដល់នូវការផ្លាស់ប្រែដ៏ស្រស់ស្អាតបែបនេះដល់យើងផងដែរ ។ នៅពេលយើងបង្វែរដួងចិត្ដរបស់យើងទៅរកព្រះយេស៊ូវគ្រីស្ទ ចុះសេចក្ដីសញ្ញាដើម្បីរក្សាបទបញ្ញត្ដិរបស់ទ្រង់ និងខិតខំដើម្បីធ្វើតាមព្រះឆន្ទៈទ្រង់ នោះជីវិតរបស់យើងគឺបានផ្លាស់ប្ដូរ ។ បន្តិចម្តងៗ យើងក្លាយជា « បានកើតជាថ្មី » ( កូរិនថូសទី២ ៥:១៧ ) កាន់តែដូចជាព្រះ និងបានរៀបចំកាន់តែប្រសើរឡើងដើម្បីទទួលបានជីវិតដ៏អស់កល្បជានិច្ច ។
តើការប្រែចិត្ដជឿគឺជាអ្វី ?
ការប្រែចិត្ដជឿគឺជាដំណើរការដែលព្រះយេស៊ូវគ្រីស្ទជួយយើងផ្លាស់ប្ដូរជំនឿ ដួងចិត្ដ និងជីវិតរបស់យើង ដើម្បីឲ្យយើងក្លាយដូចជាទ្រង់ និងព្រះវរបិតាសួគ៌របស់យើង ។ ការណ៍នេះពាក់ព័ន្ធនឹងការអនុវត្ដសេចក្ដីជំនឿលើព្រះយេស៊ូវគ្រីស្ទ ការប្រែចិត្ដ ពិធីបុណ្យជ្រមុជទឹក ការរក្សាបទបញ្ញត្ដិ ការទទួលការញែកជាបរិសុទ្ធដោយព្រះវិញ្ញាណបរិសុទ្ធ និងការកាន់ខ្ជាប់ដរាបដល់់ចុងបំផុត ។ តាមរយៈដង្វាយធួនរបស់ព្រះយេស៊ូវគ្រីស្ទ និងការធ្វើតាមការដឹកនាំនៃព្រះវិញ្ញាណ យើងអាចផ្លាស់ប្ដូរ និងយកឈ្នះឥទ្ធិពលអវិជ្ជមាននៃពិភពលោក ។ ការផ្លាស់ប្ដូរនេះនាំយកនូវភាពសុខសាន្ដ និងសុភមង្គលនៅក្នុងជីវិតនេះ និងជីវិតដ៏នៅអស់កល្បជានិច្ចនៅឯបរមលោក ដល់យើង ។
ទិដ្ឋភាពទូទៅនៃប្រធានបទ ៖ ការប្រែចិត្តជឿ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ សេចក្តីជំនឿលើព្រះយេស៊ូវគ្រីស្ទ ការប្រែចិត្ដ កាន់ខ្ជាប់ដរាបដល់ចុងបំផុត
ផ្នែកទី ១
ការប្រែចិត្តជឿលើព្រះយេស៊ូវគ្រីស្ទអាចចំណាយពេលវេលា ការខិតខំ និងការអត់ធ្មត់ដ៏យូរ
ព្រះយេស៊ូវគ្រីស្ទអញ្ជើញយើងទាំងអស់គ្នាឲ្យមករកទ្រង់ ។ នៅពេលយើងធ្វើតាមព្រះអង្គសង្គ្រោះ យើងផ្លាស់ប្តូរ និងប្រែក្លាយកាន់តែដូចជាទ្រង់ ។ ចំពោះមនុស្សជាច្រើន ការប្រែចិត្ដជឿគឺជាដំណើរការបន្តិចម្តងៗ មិនមែនជាលទ្ធផលនៃព្រឹត្តិការណ៍ដ៏មានឥទ្ធិពល ឬគួរឲ្យភ្ញាក់ផ្អើលតែម្ដងនោះឡើយ ។ វាត្រូវការនូវភាពខ្ជាប់ខ្ជួន និងកិច្ចខិតខំជាបន្ដបន្ទាប់ ។
ដើម្បីឲ្យការប្រែចិត្ដជឿកើតមានឡើង នោះយើងត្រូវធ្វើសកម្មភាពលើសេចក្តីជំនឿ និងចំណេះដឹងដែលយើងទទួលតាមរយៈព្រះវិញ្ញាណបរិសុទ្ធ ។ នៅពេលយើងបានប្រែចិត្ដជឿ « តាមរយៈអំណាចនៃព្រះវិញ្ញាណ … ដួងចិត្ដ [ របស់យើង ] បានផ្លាស់ប្ដូរ » ។ បំណងប្រាថ្នារបស់យើងស្របទៅនឹងព្រះរាជបំណងរបស់ព្រះវរបិតាសួគ៌ និងព្រះយេស៊ូវគ្រីស្ទ ។ អែលឌើរ ដេវីឌ អេ បែដណា បានបង្រៀនថា ៖ « ការប្រែចិត្ដជឿពិតនាំឲ្យមានការផ្លាស់ប្ដូរនៅក្នុងការជឿ ក្នុងដួងចិត្ដ និងក្នុងជីវិតមនុស្សម្នាក់ ឲ្យទទួលយក និងគោរពតាមព្រះហឬទ័យរបស់ព្រះ ។… វាជាលទ្ធផលនៃវិវរណៈមកពីព្រះ រួមជាមួយនឹងការប្រែចិត្ដ ការប្រតិបត្ដិ និងការឧស្សាហ៍ព្យាយាមផ្ទាល់ខ្លួន » ។
ប៉ុន្ដែការបានប្រែចិត្ដជឿលើព្រះយេស៊ូវគ្រីស្ទមិនមានន័យថាយើងល្អឥតខ្ចោះនោះទេ ។ នៅលើផ្លូវឆ្ពោះទៅរកការប្រែចិត្ដជឿ យើងនៅតែធ្វើកំហុសឆ្គង ។ ទោះជាយ៉ាងណាក៏ដោយ តាមរយៈសេចក្តីជំនឿជាបន្តបន្ទាប់លើព្រះយេស៊ូវគ្រីស្ទ និងការប្រែចិត្ដជាប្រចាំថ្ងៃ នោះការទទួលបានព្រះចេស្តានៃព្រះយេស៊ូវគ្រីស្ទអាចលូតលាស់ ហើយយើងអាចបង្កើនការប្រែចិត្ដជឿរបស់យើងចំពោះទ្រង់ក្នុងនាមជាសិស្សរបស់ទ្រង់ ។
រឿងទាំងឡាយដែលត្រូវពិចារណា
-
សូមអានវគ្គបទគម្ពីរចំនួនពីរ អំពីសាវកពេត្រុស ៖ ម៉ាថាយ ១៦:១៣–១៧ និង លូកា ២២:៣១–៣២ ។ ហេតុអ្វីបានជាការប្រែចិត្ដជឿដ៏ពេញលេញលើព្រះគ្រីស្ទ គឺជាជំហានសំខាន់បន្ទាប់ពីការទទួលបានទីបន្ទាល់អំពីទ្រង់ ? តើតាមរយៈការប្រែចិត្ដជឿដ៏ពិតលើព្រះគ្រីស្ទ យើងត្រូវបានប្រទានពរដោយរបៀបណា ?
-
សូមគិតអំពីការអញ្ជើញ និងព្រះចេស្តារបស់ព្រះអង្គសង្គ្រោះដើម្បីជួយយើងផ្លាស់ប្តូរ និងក្លាយដូចជាទ្រង់ ។ អែលឌើរ អេដឌ័្វរដូ ហ្គាវ៉ារិត បានបង្រៀន ៖ « ព្រះអម្ចាស់អញ្ជើញយើងដោយប្រើពាក្យកិរិយាសព្ទខុសៗគ្នា ៖ ‹ ចូរមកឯខ្ញុំ › ‹ ចូរមកតាមខ្ញុំ › ‹ ចូរដើរជាមួយនឹងយើងចុះ › ។ ក្នុងករណីនីមួយៗ វាមិនមែនជាការអញ្ជើញអកម្មនោះទេ វាគឺជាការអញ្ជើញឲ្យប្រព្រឹត្ត ។ វាត្រូវបានធ្វើឡើងទៅកាន់មនុស្សទាំងអស់ » ។ សូមគិតអំពីរបៀបដែលព្រះជន្ម និងការបង្រៀនរបស់ព្រះអង្គសង្គ្រោះអញ្ជើញអ្នកឲ្យផ្លាស់ប្ដូរ ។ អ្នកអាចអាន លូកា ២២:៣៩–៤៤; យ៉ូហាន ៦:៥១; ហេព្រើរ ៥:៩; ១០:១–១០; នីហ្វៃទី២ ២:៣–១០; ៩:៥–២៤; និង មាត្រានៃសេចក្តីជំនឿ ១:៣ សម្រាប់ការយល់ដឹង ។ សូមពិចារណាពីអ្វីដែលអ្នកអាចធ្វើនៅថ្ងៃនេះ ឬសប្តាហ៍នេះ ដើម្បីបង្ហាញព្រះអង្គសង្គ្រោះថាអ្នកទទួលយកការអញ្ជើញ និងជំនួយរបស់ទ្រង់ ដើម្បីផ្លាស់ប្តូរជីវិតរបស់អ្នក ។
សកម្មភាពសម្រាប់ការរៀនសូត្រជាមួយអ្នកដទៃ
-
អ្នកអាចមើលវីដេអូ ឬមើលរូបភាពសត្វដែលឆ្លងកាត់រូបវិបត្ដិន៍ ដូចជាកូនក្អុកប្រែក្លាយជាកង្កែប ឬដង្កូវមេអំបៅប្រែក្លាយជាមេអំបៅ ។ ប្រសិនបើមាន អ្នកអាចមើលវីដេអូ « អែលឌើរ នែល អិល អាន់ឌើរសិន ចែកចាយមេរៀនដែលបានរៀនមកពីមេអំបៅ » ជាពេលដែលលោកចែកចាយពីវីដេអូ បង្ហាញពីការវិវត្ដនៃដង្កូវមេអំបៅដែលវាខ្លួនឯងនៅក្នុងសូត្រ ហើយជាចុងក្រោយបំប្លែងខ្លួនជាមេអំបៅដ៏ស្រស់ស្អាត ។ សូមនិយាយអំពីការផ្លាស់ប្តូរដ៏អស្ចារ្យដែលសត្វទាំងនេះឆ្លងកាត់ ។ បន្ទាប់មកអ្នកអាចអានអ្វីដែលសាវកប៉ុលបានបង្រៀនអំពីការក្លាយជា « កើតជាថ្មី » នៅក្នុងព្រះគ្រីស្ទ ( កូរិនថូស ទី២ ៥:១៧ ) ។ តើការប្រែចិត្ដជឿលើព្រះយេស៊ូវគ្រីស្ទដូចជាការកើតជាថ្មីយ៉ាងដូចម្ដេច ? ប្រធាន ដាល្លិន អេក អូក បានបង្រៀនថា « បុគ្គលដែលធ្វើដំណើរឆ្ពោះទៅមុខទៅរកការប្រែចិត្ដជឿដែលចាំបាច់ គឺនឹងចាប់ផ្ដើមមើលឃើញកិច្ចការទាំងឡាយដូចដែលព្រះវរបិតាសួគ៌ និងព្រះរាជបុត្រាទ្រង់ គឺព្រះយេស៊ូវគ្រីស្ទ ទតឃើញដែរ ។ ពួកគេកំពុងស្ដាប់ឮព្រះសូរសៀងរបស់ទ្រង់ ជាជាងស្ដាប់ឮសំឡេងនៃពិភពលោក ហើយពួកគេកំពុងធ្វើកិច្ចការតាមរបៀបរបស់ទ្រង់ ជំនួសឲ្យតាមរបៀបនៃពិភពលោក » ។ តើអ្នកបានរីកចម្រើន និងផ្លាស់ប្ដូរដោយរបៀបណា នៅពេលអ្នកធ្វើសកម្មភាពផ្អែកលើការប្រែចិត្ដជឿរបស់អ្នកលើដំណឹងល្អរបស់ព្រះយេស៊ូវគ្រីស្ទ ? សូមពិចារណាកត់ត្រាគំនិតរបស់អ្នក ក៏ដូចជាការដឹងគុណរបស់អ្នកចំពោះការប្រែក្លាយនៃជីវិតរបស់អ្នក ។
-
មានដំណើររឿងនៃការប្រែចិត្ដជឿដ៏មានឥទ្ធិពលជាច្រើននៅក្នុងព្រះគម្ពីរ ។ អ្នកអាចជ្រើសរើសដំណើររឿងទាំងនេះមួយ ឬច្រើន ដើម្បីសិក្សា ឬមើល ហើយអ្នកក៏អាចសម្ដែងដំណើររឿងទាំងនេះ បានផងដែរ ។ គំរូទាំងឡាយរួមមានដំណើររឿងរបស់នាងរស់ ( សូមមើល នាងរស់ ១ ) អេណុស ( សូមមើល អេណុស ១ ឬមើល « Enos Prays Mightily ) » អាលម៉ាជាកូន ( សូមមើល ម៉ូសាយ ២៧ ឬមើល « Alma the Younger Is Converted unto the Lord ) » និងស្តេចឡាម៉ូណៃ ( សូមមើល អាលម៉ា ១៧–១៩ ឬមើល « Ammon Serves and Teaches King Lamoni » ) ។ សូមពិភាក្សាអំពីអ្វីដែលអ្នករៀនចេញមកពីគំរូរបស់បុគ្គលនៅក្នុងដំណើររឿង ។ ទោះជាការប្រែចិត្ដជឿជាធម្មតាគឺជាដំណើរការបន្តិចម្តងៗ ដែលមិនដូចអ្វីដែលកើតឡើងចំពោះបុគ្គលទាំងនេះក្ដី ក៏យើងអាចរៀនចេញពីបទពិសោធន៍របស់ពួកគេបានផងដែរ ។ តើបទពិសោធន៍របស់ពួកគេពង្រឹងបំណងប្រាថ្នារបស់អ្នកផ្ទាល់ ដើម្បីធ្វើតាមការអញ្ជើញរបស់ព្រះគ្រីស្ទដើម្បីផ្លាស់ប្តូរដោយរបៀបណា ?
ស្វែងយល់បន្ថែមទៀត
-
អេសេគាល ១១:១៩–២០; ម៉ាថាយ ១៨:៣; កាឡាទី ៣:២៦–២៧; នីហ្វៃទី២ ៣១:១៩–២០; ម៉ូសាយ ៣:១៩; ៤:១–១០; ៥:២; ២៧:២៤–៣០; នីហ្វៃទី៣ ៩:២០
-
ហិនរី ប៊ី អាវរិង « Testimony and Conversion » Ensign ខែកុម្ភៈ ឆ្នាំ២០១៥ ទំព័រ ៤–៦
-
ដេវីឌ អេ បែដណា « Converted unto the Lord » Liahona ខែវិច្ឆិកា ឆ្នាំ២០១២ ទំព័រ ១០៦–១០៩
-
អេដឌ័្វរដូ ហ្គាវ៉ារិត « A Mighty Change of Heart: I Have Nothing More to Give You » » Liahno ខែវិច្ឆិកា ឆ្នាំ២០២២ ទំព័រ ២១–២៣
ផ្នែកទី ២
ការប្រែចិត្ដជឿលើព្រះយេស៊ូវគ្រីស្ទគឺការធ្វើតាមពេញមួយជីវិត
វាជារឿងមួយដើម្បីប្រែចិត្ដជឿលើព្រះយេស៊ូវគ្រីស្ទ និងប្ដេជ្ញាចិត្តដើម្បីធ្វើតាមទ្រង់ ។ វាជារឿងមួយផ្សេងទៀតដើម្បីរក្សាការប្ដេជ្ញាចិត្ដនោះពេញមួយជីវិតរបស់អ្នក ។ ប្រធាន ឌៀថើរ អេហ្វ អុជដូហ្វ បានលើកឡើងថា « ការធ្វើជាសិស្សរបស់ព្រះយេស៊ូវគ្រីស្ទពុំមែនជាការប្រឹងប្រែងមួយសប្ដាហ៍ម្ដងៗ ឬ មួយថ្ងៃម្ដងៗនោះទេ ។ វាគឺជាការខ្នះខ្នែងជារៀងរហូត » ។
ទោះជាយ៉ាងណា នោះពុំមែនមានន័យថា យើងត្រូវតែពឹងផ្អែកលើកម្លាំងជំរុញចិត្ដរបស់យើងផ្ទាល់ដើម្បីកាន់ខ្ជាប់ដរាបដល់ចុងបំផុតនោះឡើយ ។ ព្រះប្រទានដល់យើងនូវជំនួយដ៏ទេវភាពនៅគ្រប់ការណ៍ទាំងអស់—ទ្រង់ដឹកនាំ និងលួងលោមយើងដោយព្រះវិញ្ញាណរបស់ទ្រង់ ទ្រង់តែងបង្រៀនយើងតាមរយៈពួកព្យាការីរបស់ទ្រង់ ហើយទ្រង់បានបញ្ជូនព្រះរាជបុត្រារបស់ទ្រង់ដើម្បីសុគតជំនួសយើង ដើម្បីយើងអាចបានពង្រឹងតាមរយៈសេចក្ដីជំនឿលើទ្រង់ នៅពេលយើងជំពប់ដួល ។
រឿងទាំងឡាយដែលត្រូវពិចារណា
-
ដើម្បីប្រែចិត្ដជឿយ៉ាងខ្លាំងក្លាលើដំណឹងល្អ ហើយកាន់ខ្ជាប់ដរាបដល់ចុងបំផុត តើតម្រូវឲ្យមានអ្វីខ្លះ ? អែលឌើរ ឌែល ជី រិនឡាន់ បានបង្រៀន ៖ « នេះមានន័យថាយើងរក្សាសេចក្ដីជំនឿលើព្រះយេស៊ូវគ្រីស្ទតាមរយៈការអធិស្ឋាន ការសិក្សាព្រះគម្ពីរ ការទទួលទានសាក្រាម៉ង់រាល់សប្ដាហ៍ និងការមានព្រះវិញ្ញាណបរិសុទ្ធជាដៃគូរបស់យើងជានិច្ច ។ យើងត្រូវតែជួយ និងបម្រើមនុស្សដទៃយ៉ាងសកម្ម ហើយចែកចាយដំណឹងល្អជាមួយនឹងពួកគេ ។ យើងត្រូវតែល្អឥតខ្ចោះក្នុងការគោរព និងការស្មោះត្រង់ក្នុងគ្រប់កិច្ចការ ។ … យើងត្រូវតែកំណត់ការល្បួងដែលងាយនឹងបង្អាក់យើង និងដាក់ការល្បួងទាំងនោះចេញ—ចេញឲ្យឆ្ងាយពីយើង » ។ អ្នកអាចអានសារលិខិតរបស់អែលឌើរ ឌែល ជី រិនឡាន់ « Preserving the Mighty Change of Heart » ហើយគិតអំពីអ្វីដែលអ្នកកំពុងធ្វើ ដើម្បីរក្សាការប្រែចិត្ដជឿយ៉ាងខ្លាំងក្លាលើព្រះយេស៊ូវគ្រីស្ទ ។ តើអ្នកកំពុងរក្សាទម្លាប់សាមញ្ញប្រចាំថ្ងៃ និងប្រចាំសប្តាហ៍ដែលនឹងជួយអ្នកបន្តក្នុងសេចក្ដីជំនឿដែរឬទេ ? តើអ្នកកំពុងដាក់ការល្បួងឲ្យនៅឆ្ងាយពីអ្នកដែរឬទេ ? សូមជញ្ជឹងគិត និងសរសេរនូវផ្នែកនៅក្នុងជីវិតរបស់អ្នក ដែលអ្នកចង់ផ្លាស់ប្ដូរ ដើម្បីជួយអ្នកស្ថិតនៅលើផ្លូវនៃសេចក្ដីសញ្ញា ។
សកម្មភាពសម្រាប់ការរៀនសូត្រជាមួយអ្នកដទៃ
-
ព្រះគម្ពីរមរមនប្រាប់ពីដំណើររឿងដ៏មានអានុភាពនៃក្រុមមនុស្ស ដែលហៅថា អាន់តៃ នីហ្វៃ លីហៃ ដែល « បានប្រែចិត្ដជឿដល់ព្រះអម្ចាស់ [ និង ] ពុំដែលបោះបង់ចោលសាសនាចក្រឡើយ ( អាលម៉ា ២៣:៦ ) ។ សូមសិក្សា អាលម៉ា ២៣–២៥ ហើយធ្វើបញ្ជីមួយពីអ្វីដែលអ្នកបានរៀនអំពីក្រុមនេះ ។ តើព្រះអង្គសង្គ្រោះបានជួយពួកគេឲ្យក្លាយជាមានសេចក្តីជំនឿដ៏ខ្លាំងក្លាយដោយរបៀបណា ? បន្ទាប់មក អ្នកអាចសរសេរនៅលើក្រដាសមួយចម្រៀកនូវរឿងមួយដែលអ្នកអាច « កប់… ឲ្យជ្រៅ » ( សូមមើល អាលម៉ា ២៤:១៦–១៧ ) ដែលនឹងជួយអ្នកឲ្យរក្សាការប្តេជ្ញាចិត្តយ៉ាងខ្លាំងក្លាចំពោះព្រះយេស៊ូវគ្រីស្ទ ។ ឬអ្នកអាចកប់វត្ថុណាមួយដែលជាតំណាងឲ្យការប្ដេជ្ញាចិត្ដរបស់អ្នកដើម្បីនៅបន្ដស្មោះត្រង់ ។
-
ការប្រែចិត្ដជឿពេញមួយជីវិតលើព្រះយេស៊ូវគ្រីស្ទបានមកពីការរស់នៅតាមដំណឹងល្អរបស់ទ្រង់—ជារៀងរាល់ថ្ងៃ ។ ស៊ីស្ទើរ បូនី អិល អូស្ការសុន បានចែកចាយទម្លាប់សំខាន់ៗជាច្រើនដែលបណ្ដុះនូវការប្រែចិត្ដជឿដ៏និរន្ដរ៍ ៖ « ការប្រែចិត្ដជឿពិតកើតមាននៅពេលអ្នកបន្ដធ្វើសកម្មភាពលើគោលលទ្ធិនានាដែលអ្នកដឹងថាពិត ហើយរក្សាបទបញ្ញត្ដិនោះពីមួយថ្ងៃទៅមួយថ្ងៃ ពីមួយខែទៅមួយខែ ។ … ការប្រែចិត្តជឿ កើតមានពេលយើងឧស្សាហ៍ក្នុងការអធិស្ឋានរបស់យើង សិក្សាព្រះគម្ពីររបស់យើង ចូលរួមក្នុងព្រះវិហារ ហើយមានភាពស័ក្ដិសមចូលរួមក្នុងពិធីបរិសុទ្ធនៃព្រះវិហារបរិសុទ្ធ ។ ការប្រែចិត្តជឿកើតមាននៅពេលយើងធ្វើតាមគោលការណ៍សុចរិត ដែលយើងរៀននៅក្នុងគេហដ្ឋាន និងនៅក្នុងថ្នាក់រៀន » ។
ដើម្បីជួយអ្នកបន្ដនៅលើផ្លូវនៃការប្រែចិត្ដជឿ អ្នកអាចធ្វើការល្បងនេះជាក្រុម ៖ ជារៀងរាល់ថ្ងៃក្នុងរយៈពេល ៣០ ថ្ងៃ ពេលជួបនឹងជម្រើស សូមសួរខ្លួនឯង « តើនេះនឹងជាអ្វីដែលពួកបរិសុទ្ធថ្ងៃចុងក្រោយដែលប្រែចិត្ដជឿនឹងធ្វើដែរឬទេ ? » សូមពិចារណាឲ្យមានអ្នកមើលការខុសត្រូវលើខ្លួនអ្នកដើម្បីតាមដានលើគោលដៅនេះ ។ បន្ទាប់ពីអ្នកបញ្ចប់ការសាកល្បងនេះហើយ អ្នកអាចពិភាក្សាពីបទពិសោធន៍របស់អ្នកជាក្រុម ។ តើព្រះអង្គសង្គ្រោះបានជួយអ្នកផ្លាស់ប្តូរដោយរបៀបណា នៅពេលអ្នកព្យាយាមធ្វើការជ្រើសរើសដែលស្របតាមការបង្រៀនរបស់ទ្រង់ ?
ស្វែងយល់បន្ថែមទៀត
-
ឌែល ជី រិនឡាន់ « Unwavering Commitment to Jesus Christ » Liahona ខែវិច្ឆិកា ឆ្នាំ២០១៩ ទំព័រ ២៣–២៥
-
អេមមី អេ រ៉ាយ « ចូរធន់នៅថ្ងៃនោះនៅក្នុងព្រះគ្រីស្ទ » លីអាហូណា ខែវិច្ឆិកា ឆ្នាំ២០២៣ ទំព័រ ៩–១២
-
បែកឃី ក្រាវីន « Keep the Change » Liahona ខែវិច្ឆិកា ឆ្នាំ២០២០ ទំព័រ ៥៨–៦០