« សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ
សាសនាចក្រដែលបានស្តារឡើងវិញរបស់ព្រះយេស៊ូវគ្រីស្ទនៅលើផែនដីនាសព្វថ្ងៃនេះ
សូមគិតអំពីពរជ័យពិសេសមួយដែលអ្នកបានទទួល ឬអាចទទួលបានក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ តើជីវិតរបស់អ្នកនឹងទៅជាយ៉ាងណាបើសិនជាគ្មានពរជ័យនោះ ? ឥឡូវសូមគិតអំពីរបៀបផ្សេងទៀតដែលអ្នក និងមនុស្សជាទីស្រឡាញ់របស់អ្នកបាន ឬអាចបានទទួលពរដោយការក្លាយជាសមាជិកនៃសាសនាចក្រ ។
ក្នុងនាមជាសមាជិកនៃសាសនាចក្ររបស់ព្រះគ្រីស្ទ នោះយើងបានទទួលពរជ័យតាមរបៀបជាច្រើន ។ ប៉ុន្តែយើងក៏អាចផ្តល់ពរដល់អ្នកដទៃតាមរបៀបជាច្រើនផងដែរ ។ យើងអាចពង្រឹង និងជួយគ្នាទៅវិញទៅមកបាន ។ យើងបង្រៀនគ្នាទៅវិញទៅមកអំពីដំណឹងល្អ ហើយព្យាយាមធ្វើជាគំរូល្អដល់គ្នាទៅវិញទៅមក ។ យើងអាចទួញសោកជាមួយគ្នា ។ យើងអាចសម្រាលបន្ទុកគ្នាទៅវិញទៅមកដោយការជួយលួងលោមគ្នា និងស្ម័គ្រចិត្ដស្ដាប់នូវកង្វល់របស់គ្នាទៅវិញទៅមក ។
ប៉ុន្តែការក្លាយជាផ្នែកមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺលើសពីការមានពរជ័យទាំងនេះទៅទៀត ។ យើងជឿថានេះគឺជាសាសនាចក្រពិតតែមួយរបស់ព្រះនៅលើផែនដី ដែលបានស្តារឡើងវិញនៅលើផែនដីសម្រាប់ការយាងត្រឡប់មកវិញរបស់ព្រះអង្គសង្រ្គោះ ។ ក្នុងនាមជាសមាជិកនៃសាសនាចក្រ យើងអាចចូលរួមក្នុងពិធីបរិសុទ្ធ និងសេចក្តីសញ្ញាទាំងអស់ដែលចាំបាច់ ដើម្បីត្រឡប់ទៅវិញ និងរស់នៅម្តងទៀតជាមួយនឹងព្រះនៅថ្ងៃណាមួយ ។ យើងទាំងអស់គ្នាអាចជួយគ្នាទៅវិញទៅមក ក្នុងការធ្វើដំណើរត្រឡប់ទៅកាន់ព្រះវរបិតាសួគ៌របស់យើងវិញ ។
តើសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជាអ្វី ?
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានស្តារឡើងវិញដោយព្រះនៅក្នុងសម័យរបស់យើងតាមរយៈព្យាការី យ៉ូសែប ស្ម៊ីធ ។ សាសនាចក្រនៃព្រះយេស៊ូវគ្រីស្ទគឺជា « អង្គការមួយរបស់ពួកអ្នកជឿ ដែលបានទទួលយកព្រះនាមនៃព្រះយេស៊ូវគ្រីស្ទដាក់លើខ្លួន ដោយសារបុណ្យជ្រមុជទឹក និងពិធីបញ្ជាក់ » ។ សាសនាចក្រនេះមាននូវសិទ្ធិអំណាច ការបង្រៀន ក្រិត្យវិន័យ ពិធីបរិសុទ្ធ និងព្រះនាមរបស់ទ្រង់ ហើយត្រូវបានគ្រប់គ្រងដោយទ្រង់តាមរយៈអ្នកតំណាងដែលទ្រង់បានតែងតាំង ។
ឈ្មោះសម្រាប់សាសនាចក្ររបស់ព្រះគ្រីស្ទនាពេលបច្ចុប្បន្ននេះ ត្រូវបានផ្តល់ឲ្យដោយវិវរណៈមកពីទ្រង់ គឺសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( សូមមើល គោលលទ្ធិ និងសេចក្ដីសញ្ញា ១១៥:៤ ) ។
ទិដ្ឋភាពទូទៅនៃប្រធានបទ ៖ ការស្តារឡើងវិញនៃសាសនាចក្រ
មគ្គទេសក៍សិក្សាដំណឹងល្អដែលជាប់ទាក់ទង ៖ ការស្តារឡើងវិញនៃដំណឹងល្អ, ការប្រមូលផ្តុំអ៊ីស្រាអែល, សេចក្ដីសញ្ញា និងពិធីបរិសុទ្ធ
ផ្នែកទី ១
ព្រះយេស៊ូវគ្រីស្ទបានស្តារសាសនាចក្ររបស់ទ្រង់ឡើងវិញតាមរយៈព្យាការី យ៉ូសែប ស្ម៉ីធ ។
បន្ទាប់ពីការសុគតរបស់ព្រះយេស៊ូវគ្រីស្ទ និងសាវកពីជំនាន់ដើម នោះសាសនាចក្រនៃព្រះយេស៊ូវគ្រីស្ទបានឈប់មាននៅលើផែនដី ( សូមមើល ប្រធានបទ និង សំណួរ « ការក្បត់សាសនា » នៅក្នុងបណ្ណាល័យដំណឹងល្អ សម្រាប់ព័ត៌មានបន្ថែម ) ។
ក្នុងខែមេសា ឆ្នាំ១៨៣០ ព្រះអម្ចាស់បានបង្កើតសាសនាចក្រពិតរបស់ទ្រង់ឡើងវិញនៅលើផែនដីតាមរយៈព្យាការី យ៉ូសែប ស្ម៊ីធ ( សូមមើល គោលលទ្ធិ និងសេចក្ដីសញ្ញា ១:១៧–៣០; ២០:១–២ ) ។ ទ្រង់បានហៅពួកសាវក និងព្យាការីឲ្យបន្តកិច្ចការនៃសេចក្ដីសង្គ្រោះ និងភាពតម្កើងឡើងរបស់ព្រះ ( សូមមើល គោលលទ្ធិ និងសេចក្ដីសញ្ញា ២៧:១២–១៣ ) ។ ពួកលោកកាន់នូវកូនសោបព្វជិតភាពនៃសិទ្ធិអំណាចដើម្បីផ្សាយដំណឹងល្អរបស់ព្រះយេស៊ូវគ្រីស្ទ ហើយចាត់ចែងសេចក្តីសញ្ញា និងពិធីបរិសុទ្ធរបស់ព្រះ ។
រឿងទាំងឡាយដែលត្រូវពិចារណា
-
អ្នកអាចមើលវីដេអូ « Living Apostles Testify of Jesus Christ » ដើម្បីស្តាប់ទីបន្ទាល់ដ៏មានអនុភាពអំពីព្រះអង្គសង្គ្រោះ និងបេសកកម្មរបស់ទ្រង់ ដោយសមាជិកក្នុងកូរ៉ុមនៃពួកសាវកដប់ពីរនាក់ ។ តើទីបន្ទាល់របស់ពួកសាវក និងព្យាការី និងថ្នាក់ដឹកនាំសាសនាចក្រផ្សេងទៀតជួយអ្នកឲ្យដឹងថា នេះជាសាសនាចក្រដែលបានស្ដារឡើងវិញរបស់ព្រះដោយរបៀបណា ? ហេតុអ្វីបានជាវាមានសារៈសំខាន់ ដែលសាសនាចក្រនៃព្រះយេស៊ូវគ្រីស្ទត្រូវបានដឹកនាំដោយពួកសាវក និងព្យាការីសព្វថ្ងៃនេះ ? តើអ្នកបានធ្វើ ឬតើអ្នកអាចធ្វើអ្វីបានខ្លះដើម្បីដឹងដោយខ្លួនឯងថា ថ្នាក់ដឺកនាំសាសនាចក្ររបស់យើងត្រូវបានហៅដោយព្រះ ហើយនេះគឺជាសាសនាចក្រដែលបានស្តារឡើងវិញរបស់ទ្រង់នៅលើផែនដីសព្វថ្ងៃនេះ ?
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន ដាល្លិន អេច អូក បានបង្រៀន ៖ « តើសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រពិតតែមួយ មានន័យយ៉ាងដូចម្តេច ? លក្ខណៈពិសេសចំនួនបី—( ១ ) ភាពពោរពេញនៃគោលលទ្ធិ ( ២ ) អំណាចបព្វជិតភាព និង ( ៣ ) ទីបន្ទាល់អំពីព្រះយេស៊ូវគ្រីស្ទ—ពន្យល់អំពី មូលហេតុដែលព្រះបានប្រកាស និងមូលហេតុដែលយើងគឺជាអ្នកបម្រើរបស់ទ្រង់អះអាងថា នេះគឺជាសាសនាចក្រតែមួយដែលពិត ហើយសកម្មនៅលើផ្ទៃផែនដីទាំងមូល » ។ ពិភាក្សាអំពីលក្ខណៈពិសេសទាំងបីនេះ និងហេតុអ្វីបានជាលក្ខណៈទាំងនេះជាផ្នែកសំខាន់នៃសាសនាចក្រពិតរបស់ព្រះ ។ សូមចែកចាយបទពិសោធន៍ទាំងឡាយដែលបានជួយអ្នកឲ្យដឹងថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រដែលពិត ហើយសកម្មរបស់ព្រះអង្គសង្គ្រោះ ។ និយាយអំពីរបៀបដែលចំណេះដឹងនោះបានប្រទានពរដល់ជីវិតរបស់អ្នក ។
ស្វែងយល់បន្ថែមទៀត
-
« ការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ នៅលើបណ្ណាល័យដំណឹងល្អ
-
The Rise of the Church of Christ » ពួកបរិសុទ្ធ ៖ ដំណើររឿងអំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ភាគ ១ បទដ្ឋាននៃសេចក្ដីពិត ឆ្នាំ១៨១៥–១៨៤៦ ( ឆ្នាំ២០១៨ ) ទំព័រ ៧៦–៨៦
ផ្នែកទី ២
សាសនាចក្រផ្តល់ឲ្យយើងនូវឱកាសដើម្បីជួយក្នុងកិច្ចការរបស់ព្រះ
សមាជិកនៃសាសនាចក្រនៃព្រះយេស៊ូវគ្រីស្ទខិតខំប្រឹងប្រែងដើម្បីជួយក្នុងកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ ដោយការស្វះស្វែងរស់នៅតាមដំណឹងល្អរបស់ព្រះយេស៊ូវគ្រីស្ទ ថែទាំអ្នកដែលខ្វះខាត អញ្ជើញមនុស្សទាំងអស់ឲ្យទទួលដំណឹងល្អ និងបង្រួបបង្រួមគ្រួសារសម្រាប់ភាពអស់កល្បជានិច្ច ។
សាសនាចក្រផ្តល់ឲ្យយើងនូវវិធីមួយដើម្បីថ្វាយបង្គំរួមគ្នា និងរៀនពីភាពពេញលេញនៃដំណឹងល្អរបស់ព្រះយេស៊ូវគ្រីស្ទ ។ វាក៏ជួយយើងបម្រើដល់គ្នាទៅវិញទៅមក ចែកចាយព្រះបន្ទូលរបស់ទ្រង់ និងមើលថែអ្នកទាំងឡាយណាដែលខ្វះខាត ។
រឿងទាំងឡាយដែលត្រូវពិចារណា
-
សូមអាន និងពិចារណា យ៉ូហាន ១៥:១៦ ។ តើវាមានន័យយ៉ាងណាចំពោះអ្នកដែលថាព្រះបានជ្រើសរើសអ្នក ដើម្បីជួយសម្រេចកិច្ចការរបស់ទ្រង់នៅក្នុងសាសនាចក្ររបស់ទ្រង់ ? តើអ្នកមានចំណាប់អារម្មណ៍យ៉ាងដូចម្តេចដើម្បីជួយទ្រង់ក្នុងកិច្ចការនៃសេចក្តីសង្គ្រោះ និងភាពតម្កើងឡើងរបស់ទ្រង់ ? តើអ្នកត្រូវបានប្រទានពរយ៉ាងដូចម្តេចនៅពេលដែលអ្នកធ្វើតាមចំណាប់អារម្មណ៍ទាំងនេះ ? សូមកត់ត្រាគំនិតរបស់អ្នកនៅក្នុងកំណត់ហេតុរបស់អ្នក ហើយពិចារណាប្រសិនបើមានអ្វីមួយដែលអ្នកចង់ធ្វើទាក់ទងនឹងកិច្ចការរបស់ព្រះដែលអ្នកមិនទាន់ធ្វើនៅឡើយ ។ បន្ទាប់មកបង្កើតគោលដៅដើម្បីធ្វើវា ។
សកម្មភាពសម្រាប់ការរៀនសូត្រជាមួយអ្នកដទៃ
-
អែលឌើរ ចន ស៊ី ភីងគ្រី ជុញ្ញ័រ បានរំឭកយើងថា កិច្ចការរបស់ព្រះ « ពុំមែនទុកសម្រាប់តែមនុស្សមួយក្រុមតូចដែលមានសិទ្ធិនោះទេប៉ុន្តែ [ គឺ ] សម្រាប់ពួកយើងទាំងអស់គ្នា—ដោយមិនគិតអំពីភេទ អាយុ ពូជសាសន៍ សញ្ជាតិ កម្រិតប្រាក់ចំណូល ស្ថានភាពសង្គម ឬការហៅក្នុងសាសនាចក្រឡើយ ។ ពួកយើងម្នាក់ៗមានតួនាទីដ៏សំខាន់មួយក្នុងការធ្វើកិច្ចការរបស់ព្រះឆ្ពោះទៅមុខ ( សូមមើល ម៉ូសេ ១:៣៩ ) » ។ លោកបានបន្តថា ៖ « ពួកយើងមួយចំនួនឆ្ងល់ថា តើព្រះវរបិតាសួគ៌អាចប្រើ យើង ដើម្បីធ្វើការរួមចំណែកដ៏សំខាន់ដែរឬទេ ។ ប៉ុន្តែសុំចងចាំថា ទ្រង់ប្រើប្រាស់មនុស្សសាមញ្ញដើម្បីសម្រេចកិច្ចការដ៏អស្ចារ្យជានិច្ច ( សូមមើល កូរិនថូស ទី១ ១:២៧–២៨; គ &ស ៣៥:១៣; ១២៤:១ ) » ។ អ្នកអាចនិយាយអំពីដំណើររឿងអស្ចារ្យមួយចំនួនដែលអ្នកបានឃើញសមាជិកសាសនាចក្រសាមញ្ញធ្វើ ដើម្បីជួយក្នុងកិច្ចការនៃសេចក្ដីសង្គ្រោះ និងភាពតម្កើងឡើងរបស់ព្រះ ។ ប្រហែលជាអ្នកអាចកំណត់គោលដៅដើម្បីធ្វើអ្វីមួយជាមួយគ្នាក្នុងសប្តាហ៍នេះ ដើម្បីបន្តកិច្ចការរបស់ព្រះ ។ បន្ទាប់មកអ្នកអាចនិយាយអំពីអ្វីដែលអ្នកបានរៀនមកពីបទពិសោធន៍ ឬរបៀបដែលអ្នកមានអារម្មណ៍នៅពេលដែលអ្នកធ្វើការបម្រើ ។
ស្វែងយល់បន្ថែមទៀត
-
ម៉ាថាយ ៥:១៣–១៦; អេភេសូ ៤:១១–១៥; ម៉ូសាយ ១៨:២៧–២៩; មរ៉ូណៃ ៦:៤–៩
-
ដាល្លិន អេក អូក « ចាំបាច់ត្រូវមានព្រះវិហារមួយ » លីអាហូណា ខែវិច្ឆិកា ឆ្នាំ២០២១ ទំព័រ ២៤–២៦
-
« How the Church Is Organized » ( វីដេអូ ) នៅលើបណ្ណាល័យដំណឹងល្អ
ផ្នែកទី ៣
ព្រះយេស៊ូវគ្រីស្ទអញ្ជើញមនុស្សទាំងអស់ឲ្យមក ហើយមានចំណែកក្នុងសាសនាចក្ររបស់ទ្រង់
នៅក្នុងសាសនាចក្រនៃព្រះយេស៊ូវគ្រីស្ទមានកន្លែងសម្រាប់មនុស្សទាំងអស់គ្នា ។ សាសនាចក្រទទួលពរជ័យពេលដែលយើងចែកចាយទស្សនៈ និងបទពិសោធន៍ផ្សេងៗគ្នារបស់យើង និងរៀនពីគ្នាទៅវិញទៅមក ។ ព្យាការីនីហ្វៃបានបង្រៀនថា ព្រះគ្រីស្ទអញ្ជើញពួកគេទាំងអស់គ្នា « ឲ្យមករកទ្រង់ ហើយទទួលទាននូវសេចក្ដីល្អសប្បុរសរបស់ទ្រង់ ហើយទ្រង់ពុំបដិសេធអ្នកណាម្នាក់ ដែលមករកទ្រង់ឡើយ » ( នីហ្វៃទី២ ២៦:៣៣ ) ។ ព្រះយេស៊ូវគ្រីស្ទចង់ឲ្យមនុស្សគ្រប់រូបមានឱកាសមករកទ្រង់ និងត្រូវបានសង្គ្រោះដោយការចូលរួមជាមួយសាសនាចក្ររបស់ទ្រង់ ហើយធ្វើ និងរក្សាសេចក្តីសញ្ញាដែលនាំទៅរកជីវិតដ៏អស់កល្បជានិច្ច ។
យើងអាចជួយប្រមូលផ្តុំរាស្ដ្ររបស់ទ្រង់ឲ្យទៅរកទ្រង់បាន ។ ពេលដែលយើងធ្វើការអញ្ជើញសាមញ្ញ និងចេញពីដួងចិត្ដ នោះយើងអាចជួយអ្នកដទៃឲ្យបែរដួងចិត្តរបស់ពួកគេទៅរកព្រះគ្រីស្ទ និងមានបំណងប្រាថ្នាចង់ចូលរួមក្នុងហ្វូងចៀមរបស់ទ្រង់ ។
រឿងទាំងឡាយដែលត្រូវពិចារណា
-
អែលឌើរ ហ្គើរីត ដបុលយូ ហ្គងបានសង្កេតឃើញថា ៖ [ ព្រះអម្ចាស់ ] អង្វរយើងឲ្យធ្វើ [ សាសនាចក្រ ] របស់ទ្រង់ជាកន្លែងនៃព្រះគុណ និងទូលំទូលាយ ជាកន្លែងដែលមនុស្សគ្រប់គ្នាអាចជួបជុំគ្នា ហើយមានកន្លែងសម្រាប់មនុស្សទាំងអស់ ។ ក្នុងនាមជាពួកសិស្សរបស់ព្រះយេស៊ូវគ្រីស្ទ យើងស្មើភាពគ្នា ពុំមានក្រុមណាពុំសូវសំខាន់ឡើយ ។ មនុស្សទាំងអស់គ្នាត្រូវបានស្វាគមន៍ឲ្យចូលរួមការប្រជុំសាក្រាម៉ង់ ការប្រជុំថ្ងៃអាទិត្យផ្សេងៗក៏ដូចជាព្រឹត្តិការណ៍ខាងសង្គមផងដែរ ។ យើងថ្វាយបង្គំព្រះអង្គសង្រ្គោះដោយគារវភាព ដោយគិតគូរ និងយកចិត្តទុកដាក់ចំពោះគ្នា ។ យើងមើល និងទទួលស្គាល់មនុស្សម្នាក់ៗ ។ យើងញញឹម អង្គុយជិតអ្នកដែលអង្គុយតែឯង រៀនស្គាល់ឈ្មោះ ដោយរួមទាំងអ្នកប្រែចិត្តជឿថ្មី បងប្អូនប្រុសស្រីដែលវិលត្រឡប់មកសកម្មវិញ យុវនារី និងយុវជន ព្រមទាំងកុមារម្នាក់ៗផងដែរ ។ សូមស្រមៃថាយើងជាពួកគាត់វិញ យើងស្វាគមន៍មិត្តភក្តិ អ្នកមកលេង អ្នកផ្លាស់មកថ្មី បុគ្គលរវល់ដែលមានអ្វីៗជាច្រើនត្រូវដោះស្រាយ » ។ តើមានវិធីអ្វីខ្លះដែលអ្នកអាចឈោងទៅ និងជួយអ្នកដទៃឲ្យដឹងថាពួកគេត្រូវបានស្វាគមន៍នៅក្នុងការប្រជុំរបស់យើង និងមានចំណែកនៅក្នុងសាសនាចក្រនៃព្រះយេស៊ូវគ្រីស្ទ ? តើអ្នកអាចឈោងទៅជួយអ្នកណា ? ពិចារណាបង្កើតគោលដៅធ្វើអ្វីមួយដើម្បីបង្ហាញអ្នកដទៃថាអ្នកយកចិត្តទុកដាក់ចំពោះពួកគេ ហើយថាពួកគេមានចំណែកនៅក្នុងវួដ ឬសាខារបស់អ្នក ។
សកម្មភាពសម្រាប់ការរៀនសូត្រជាមួយអ្នកដទៃ
-
ព្រះយេស៊ូវគ្រីស្ទសព្វព្រះទ័យឲ្យមនុស្សទាំងអស់មករកទ្រង់ និងសាសនាចក្ររបស់ទ្រង់ ហើយយើងអាចជួយបានតាមរយៈការធ្វើការអញ្ជើញដ៏សាមញ្ញ ដោយស្មោះត្រង់ដល់អ្នកដែលនៅជុំវិញយើង ។ អែលឌើរ ហ្គែរី អ៊ី ស្ទីវ៉ែនសុន បានចែកចាយថា ៖ « មានការអញ្ជើញរាប់រយ ដែលយើងអាចអញ្ជើញទៅអ្នកដទៃទៀតបាន ។ យើងអាចអញ្ជើញមនុស្សផ្សេងទៀតឲ្យ ‹ មក ហើយមើល › ពិធីសាក្រាម៉ង់ សកម្មភាពវួដ វីដេអូតាមអនឡាញ ដែលពន្យល់ពីដំណឹងល្អនៃព្រះយេស៊ូវគ្រីស្ទ ។ ‹ មក ហើយមើល › អាចជាការអញ្ជើញឲ្យអានព្រះគម្ពីរមរមន ឬមកមើលព្រះវិហារបរិសុទ្ធ អំឡុងពេលពិធីសម្ពោធ ពីមុនពិធីឧទ្ទិសឆ្លង ។ ជួនកាល ការអញ្ជើញនោះជាអ្វីមួយដែលយើងអញ្ជើញនៅខាងក្នុង—ជាការអញ្ជើញដល់ខ្លួនយើង ដែលផ្ដល់ការយល់ដឹង និងទស្សនវិស័យដល់ខ្លួនយើង អំពីឱកាសទាំងឡាយដែលនៅជុំវិញខ្លួនយើង ដើម្បីធ្វើសកម្មភាពតាម ។ នៅក្នុងជំនាន់ឌីជីថលរបស់យើង ជាញឹកញាប់សមាជិកចែកចាយសារលិខិតតាមរយៈប្រព័ន្ធផ្សព្វផ្សាយសង្គម ។ មានសារដែលលើកស្ទួយ បើមិនរាប់ពាន់ទេ ក៏រាប់រយដែរ ដែលបងប្អូនអាចឃើញថាស័ក្ដិសមដើម្បីចែកចាយ » ។ សូមពិភាក្សាអំពីការអញ្ជើញមួយចំនួនដែលអ្នកអាចធ្វើបាននៅក្នុងសប្តាហ៍នេះ ហើយបន្ទាប់មក មករួមគ្នា និងរាយការណ៍ត្រឡប់មកវិញអំពីបទពិសោធន៍របស់អ្នក ។
-
សុំនរណាម្នាក់នៅក្នុងក្រុមឲ្យគូររូបភាពសាមញ្ញនៃរាងកាយមួយ និងនិយាយអំពីរបៀបដែលផ្នែកផ្សេងៗគ្នាទាំងអស់ ( ដូចជា ដៃ ជើង ភ្នែក និងត្រចៀក ) គឺមានសារៈសំខាន់ ។ បន្ទាប់មកអាន កូរិនថូស ទី១ ១២:១២–១៨ ជាមួយគ្នា ហើយពិភាក្សាអំពីអ្វីដែលអ្នកបានរៀន ។ តើយើងអាចអនុវត្តខគម្ពីរទាំងនេះចំពោះសមាជិកភាពរបស់យើងនៅក្នុងសាសនាចក្រដោយរបៀបណា ? ប្រធាន ប៊យដ៍ ខេ ផាកកឺ បានបង្រៀនថា ៖ « យើងត្រូវការអ្នកប្រែចិត្រជឿថ្មីៗ និងអ្នកទាំងឡាយនៅក្នុងចំណោមកូនចៅនៃពួកអ្នកត្រួសត្រាយផ្លូវរបស់យើង ។ យើងចាំបាច់ត្រូវឈោងទៅជួយអ្នកទាំងឡាយណាដែលវង្វេង ហើយជួយពួកគេឲ្យត្រឡប់មកហ្វូងវិញ ។ យើងត្រូវការប្រាជ្ញា និងការយល់ដឹង និងកម្លាំងខាងវិញ្ញាណរបស់មនុស្សគ្រប់រូប ។ សមាជិកម្នាក់ៗនៃសាសនាចក្រនេះ ជាធាតុដ៏សំខាន់មួយនៃតួអង្គសាសនាចក្រ » ។ អ្នកអាចសរសេរអ្វីមួយដែលអ្នកអាចធ្វើបាននៅក្នុងសប្តាហ៍នេះ ដើម្បីជួយនរណាម្នាក់នៅក្នុងវួដ ឬសាខារបស់អ្នកឲ្យដឹងថាពួកគេមានសារៈសំខាន់ប៉ុនណា ។ បន្ទាប់មកអ្នកអាចរាយការណ៍ត្រឡប់មកវិញអំពីអ្វីដែលអ្នកបានធ្វើ ។
ស្វែងយល់បន្ថែមទៀត
-
ឌី ថត គ្រីស្តូហ្វឺសិន « គោលលទ្ធិនៃការមានចំណែក » លីអាហូណា ខែវិច្ឆិកា ឆ្នាំ២០២២ ទំព័រ ៥៣-៥៦
-
ឌី ថត គ្រីស្តូហ្វឺសិន « Why the Church » Liahona ខែវិច្ឆិកា ឆ្នាំ២០១៥ ទំព័រ ១០៨–១១១
-
ប្រធានបទ និងសំណួរ « ភាពខុសគ្នា និងសាមគ្គីភាពនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ » នៅលើបណ្ណាល័យដំណឹងល្អ
-
« Unity in Diversity » ( កម្រងវីដេអូ )