« សេចក្ដីសញ្ញាដ៏អស់កល្បអស់កាលជានិច្ច » ប្រធានបទ និង សំណួរ ( ឆ្នាំ២០២៣ )
មគ្គុទ្ទេសក៍សិក្សាដំណឹងល្អ
សេចក្ដីសញ្ញាដ៏អស់កល្បអស់កាលជានិច្ច
សេចក្ដីសញ្ញាថ្មី និងអស់កល្បអស់កាលជានិច្ចរបស់យើងជាមួយនឹងព្រះ
តើមានមនុស្សជាទីស្រឡាញ់ធ្លាប់សន្យាថានឹងធ្វើអ្វីមួយសម្រាប់អ្នក ដែលពិតជាប្រទានពរដល់ជីវិតរបស់អ្នកដែរឬទេ ? តើអ្នកមានអារម្មណ៍បែបណាដែរ នៅពេលពួកគេគោរពតាមការសន្យានោះ ?
ព្រះវរបិតាសួគ៌ក៏ធ្វើការសន្យាដ៏អស្ចារ្យចំពោះយើងផងដែរ ។ ការណ៍នេះកើតមានឡើងនៅពេលយើងធ្វើការសន្យាពិសិដ្ឋ ឬសេចក្ដីសញ្ញា ជាមួយនឹងទ្រង់កាលយើងទទួលពិធីបរិសុទ្ធដ៏ប្រោសលោះ និងការតម្កើងឡើងនៃដំណឹងល្អរបស់ទ្រង់ ។ ចាប់តាំងពីមុនពេលដែលពិភពលោកត្រូវបានបង្កើត ព្រះបានសន្យាថាយើងអាចត្រឡប់ទៅវិញ ហើយរស់នៅជាមួយនឹងទ្រង់ ប្រសិនបើយើងនឹងធ្វើតាមព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ។ សេចក្ដីសញ្ញាដ៏អស់កល្បអស់កាលជានិច្ចនេះត្រូវបានធ្វើឡើងមុនគេបង្អស់ជាមួយនឹងលោកអ័ដាម ហើយបន្ទាប់មកបានបន្ដមានឡើងវិញនៅសម័យកាន់កាប់ត្រួតត្រាក្រោយៗទៀត ។
ប្រធាន រ័សុល អិម ណិលសុន បានបង្រៀនពីរបៀបដែលយើងទទួលបានពរជ័យនៅពេលយើងជ្រើសរើសចូលទៅក្នុងទំនាក់ទំនងសេចក្ដីសញ្ញាជាមួយនឹងព្រះ ៖ « នៅពេលយើងចុះសេចក្ដីសញ្ញាជាមួយព្រះ នោះយើងពុំនៅលើដីអព្យាក្រឹតទៀតឡើយ ។ ព្រះនឹងមិនបោះបង់ចោលទំនាក់ទំនងរបស់ទ្រង់ជាមួយអស់អ្នកដែលបានបង្កើតចំណងមិត្តភាពបែបនោះជាមួយទ្រង់ឡើយ ។ តាមពិត អស់អ្នកទាំងឡាយណាដែលបានចុះសេចក្តីសញ្ញាជាមួយព្រះ អាចទទួលបានសេចក្តីស្រឡាញ់ និងសេចក្តីមេត្តាករុណាដ៏ពិសេសមួយ ។ … ដោយសារតែសេចក្តីសញ្ញារបស់យើងជាមួយព្រះ នោះទ្រង់ពុំដែលនឿយហត់ក្នុងកិច្ចខិតខំរបស់ទ្រង់ដើម្បីជួយយើងឡើយ យើងក៏នឹងមិនធ្វើឲ្យសេចក្តីអត់ធ្មត់ដ៏មេត្តារបស់ទ្រង់ជាមួយយើងសាបរលាបដែរ » ។
តើសេចក្តីសញ្ញាដ៏អសកល្បអស់កាលជានិច្ចជាអ្វី ?
សេចក្តីសញ្ញាដ៏អសកល្បអស់កាលជានិច្ចដែលត្រូវបានគេស្គាល់ផងដែរថា ជាសេចក្ដីសញ្ញាអ័ប្រាហាំគឺជាភាពពេញលេញនៃដំណឹងល្អរបស់ព្រះយេស៊ូវគ្រីស្ទ ហើយរួមបញ្ចូលទាំងពិធីបរិសុទ្ធ និងសេចក្តីសញ្ញាទាំងឡាយដែលយើងត្រូវការដើម្បីទទួលបានសេចក្ដីសង្គ្រោះ និងភាពតម្កើងឡើង ( សូមមើល គោលលទ្ធិ និងសេចក្ដីសញ្ញា ៦៦:២ ) ។ « វា ‹ ថ្មី › នៅពេលណាដែលព្រះអម្ចាស់បន្ត ឬស្ដារវាឡើងវិញ ហើយវា ‹ អស់កល្បអស់កាលជានិច្ច › ដោយសារវាមិនផ្លាស់ប្តូរ » ។ សេចក្តីសញ្ញាដ៏អស់កល្បអស់កាលជានិច្ចត្រូវបានបង្កើតឡើងនៅលើផែនដីជាមួយលោកអ័ដាម ហើយថ្មីៗនេះត្រូវបានព្រះបន្តឡើងវិញតាមរយៈព្យាការី យ៉ូសែប ស្ម៊ីធ ដែលជាផ្នែកមួយនៃការស្តារឡើងវិញនៃដំណឹងល្អនៅថ្ងៃចុងក្រោយនេះ ( សូមមើល គោលលទ្ធិ និងសេចក្ដីសញ្ញា ១:១៧–២៣ ) ។
ទិដ្ឋភាពទូទៅនៃប្រធានបទ ៖ សេចក្ដីសញ្ញាអ័ប្រាហាំ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ការស្តារឡើងវិញនៃដំណឹងល្អ, សេចក្ដីសញ្ញា និងពិធីបរិសុទ្ធ, ព្រះវិហារបរិសុទ្ធ, អាពាហ៍ពិពាហ៍, ពររបស់លោកអយ្យកោ, ការប្រមូលផ្តុំវង្សអ៊ីស្រាអែល
ផ្នែកទី ១
ការរក្សាសេចក្ដីសញ្ញាថ្មី និងអស់កល្បអស់កាលជានិច្ចរៀបចំយើងសម្រាប់់ជីវិតអស់កល្បជានិច្ច
ព្រះអម្ចាស់បានស្តារឡើងវិញនូវសេចក្ដីសញ្ញាដ៏អស់កល្បអស់កាលជានិច្ច ដែលជាភាពពេញលេញនៃដំណឹងល្អរបស់ព្រះយេស៊ូវគ្រីស្ទ « ដើម្បីធ្វើជាពន្លឺដល់មនុស្សលោក » និង « ដើម្បីរៀបចំផ្លូវ » សម្រាប់ការយាងមករបស់ទ្រង់ ( គោលលទ្ធិ និងសេចក្ដីសញ្ញា ៤៥:៩ ) ។ ដើម្បីទទួលសេចក្ដីសញ្ញាដ៏អស់កល្បអស់កាលជានិច្ច យើងដាក់ព្រះជាទីមួយ ហើយចុះ និងរក្សាសេចក្ដីសញ្ញានៃដំណឹងល្អជាមួយនឹងទ្រង់ ។ ប្រធាន ណិលសុន បានបង្រៀនថា សេចក្តីសញ្ញារបស់យើង ចាប់ផ្តើមជាមួយនឹងសេចក្តីសញ្ញាដែលយើងធ្វើនៅឯពិធីបុណ្យជ្រមុជទឹក « ដែលនឹងដឹកនាំយើងឲ្យទៅកាន់តែជិត [ ព្រះ ] » ហើយថាសេចក្ដីសញ្ញាទាំងនេះអាចភ្ជាប់យើងទៅនឹងទ្រង់ដោយ « ចងភ្ជាប់ដល់អស់កល្បអស់កាលជានិច្ច » ។
សេចក្ដីសញ្ញាដ៏អស់កល្បអស់កាលជានិច្ចដែលយើងចុះចូលជាមួយនឹងព្រះ គឺជាការចងភ្ជាប់ជានិរន្ដរ៍នៅពេលយើងរក្សាសេចក្ដីសញ្ញានេះ ។ ប្រសិនបើយើងនៅតែស្មោះត្រង់ចំពោះសេចក្ដីសញ្ញានេះពេញមួយជីវិតរបស់យើង នោះយើងអាចបានលើកតម្កើងឡើង និងត្រឡប់ទៅរស់នៅក្នុងវត្តមានរបស់ព្រះវរបិតាសួគ៌ជាមួយក្រុមគ្រួសាររបស់យើង ។
រឿងទាំងឡាយដែលត្រូវពិចារណា
-
សូមសិក្សា គោលលទ្ធិ និងសេចក្ដីសញ្ញា ១៣៣:៥៧–៦២ អំពីការដែលព្រះអម្ចាស់ស្តារឡើងវិញនូវភាពពេញលេញនៃដំណឹងល្អរបស់ព្រះយេស៊ូវគ្រីស្ទ ។ តើ វាត្រូវបាននាំចេញមក « យ៉ាងច្បាស់ និងក្បោះក្បាយ » អាចមានន័យយ៉ាងណា ? សូមពិចារណាពីរបៀបដែល សេចក្ដីសញ្ញាដ៏អស់កល្បអស់កាលជានិច្ច ដែលជាឃ្លាដ៏សាមញ្ញ ប៉ុន្ដែស្រស់ស្អាតនេះ រៀបចំយើងដើម្បីទទួលបានជីវិតអស់កល្បជានិច្ច ។ តើការយល់ដឹងអំពីសក្តានុពលនេះ លើកទឹកចិត្តអ្នកឲ្យជួយព្រះអម្ចាស់ក្នុងកិច្ចការនៃសេចក្ដីសង្គ្រោះ និងភាពតម្កើងឡើងរបស់ទ្រង់ដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុង គោលលទ្ធិ និងសេចក្ដីសញ្ញា ២២:១–៤ ព្រះអម្ចាស់មានព្រះបន្ទូលថា ទ្រង់បានបន្តសេចក្ដីសញ្ញាដ៏អស់កល្បអស់កាលជានិច្ចរបស់ទ្រង់ជាមួយពួកបរិសុទ្ធជំនាន់មុន ។ សូមអានក្បាលកណ្ឌ និងខគម្ពីរទាំងនេះជាមួយគ្នា ហើយពិភាក្សាអំពីអ្វីដែលអ្នករៀនអំពីសារៈសំខាន់នៃសេចក្ដីសញ្ញា « ថ្មី » ។ តើ « កិច្ចការទាំងឡាយដែលស្លាប់ »មានន័យដូចម្តេច ? សូមនិយាយអំពីអ្វីដែលអ្នករៀនចេញពី ខទី ៣ អំពីសារៈសំខាន់នៃការស្តារឡើងវិញនៃដំណឹងល្អ និងសេចក្តីសញ្ញាដ៏អស់កល្បអស់កាលជានិច្ច ។
-
ដោយសារតែព្រះយេស៊ូវគ្រីស្ទ និងដង្វាយធួនរបស់ទ្រង់ យើងអាចទទួលបានជីវិតអស់កល្បជានិច្ច បើសិនជាយើងរក្សាសេចក្ដីសញ្ញារបស់យើងជាមួយនឹងទ្រង់ ។ ប្រធាន ណិលសុន បានបង្រៀន ៖ « អស់អ្នកដែលចុះសេចក្ដីសញ្ញាពិសិដ្ឋ ហើយរក្សាវាត្រូវបានសន្យានូវជីវិតដ៏នៅអស់កល្បជានិច្ច និងភាពតម្កើងឡើង « គឺជាអំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ » ( គោលលទ្ធិ និងសេចក្តីសញ្ញា ១៤:៧ ) ។ ព្រះយេស៊ូវគ្រីស្ទគឺជាអង្គដែលធានានូវសេចក្តីសញ្ញាទាំងនោះ ( សូមមើល ហេព្រើរ ៧:២២; ៨:៦ ) ។ អ្នករក្សាសេចក្ដីសញ្ញាដែលស្រឡាញ់ព្រះ ហើយទុកឲ្យទ្រង់ឈ្នះលើអ្វីៗផ្សេងទៀតនៅក្នុងជីវិតរបស់ពួកគេ ធ្វើឲ្យទ្រង់មានឥទ្ធិពលខ្លាំងបំផុតក្នុងជីវិតរបស់ពួកគេ » ។ សូមនិយាយអំពីរបៀបដែលអ្នកអាចទុកឲ្យព្រះ « ឈ្នះលើអ្វីៗផ្សេងទៀត » នៅក្នុងជីវិតរបស់អ្នក ។ តើការណ៍នោះនឹងជួយអ្នកឲ្យទទួលបានជីវិតអស់កល្បជានិច្ចយ៉ាងដូចម្តេច ហើយហេតុអ្វីបានជាការទទួលភាពតម្កើងឡើងមានតម្លៃក្នុងការខិតខំប្រឹងប្រែង ?
ស្វែងយល់បន្ថែមទៀត
-
អេសាយ ៥៥:១–៣; យេរេមា ៣២:៣៧–៤០; នីហ្វៃទី ២ ៣១:១៧–២១; គោលលទ្ធិ និងសេចក្ដីសញ្ញា ៤៩:៩–១៤
-
ម៉ាកឺស ប៊ី ណាស « សេចក្តីសញ្ញាថ្មី ហើយអស់កល្ប អស់កាលជានិច្ច » Ensign ខែធ្នូ ឆ្នាំ២០១៥ ទំព័រ ៤០–៤៧
ផ្នែកទី ២
ព្រះបានស្តារឡើងវិញនូវការសន្យានៃសេចក្ដីសញ្ញាអ័ប្រាហាំនៅជំនាន់របស់យើង
សេចក្ដីសញ្ញាអ័ប្រាហាំគឺជាឈ្មោះមួយទៀតសម្រាប់សេចក្ដីសញ្ញាដ៏អស់កល្បអស់កាលជានិច្ច ។ វាត្រូវបានបង្កើតឡើងពីមុនគ្រឹះនៃពិភពលោកទៅទៀត ហើយសំដៅទៅលើសេចក្ដីសញ្ញាដែលព្រះធ្វើជាមួយនឹងបុត្រាបុត្រីរបស់ទ្រង់ ។ ឈ្មោះរបស់វាចេញមកពីសេចក្ដីសញ្ញាដែលព្រះយេហូវ៉ាបានធ្វើជាមួយនឹងអ័ប្រាហាំ ( សូមមើល លោកុប្បត្តិ ១៧:១–៨; អ័ប្រាហាំ ២:៦–១១ ) ។ នៅក្នុងសេចក្តីសញ្ញានោះ ព្រះបានសន្យាថានឹងផ្តល់ពរជ័យដ៏អស្ចារ្យដល់អ័ប្រាហាំសម្រាប់ការរស់នៅដោយសុចរិត ។ ពរជ័យទាំងនោះរួមមានការចម្រើនឡើងនៃពូជពង្ស សិទ្ធិនៃការកាន់បព្វជិតភាព និងគ្រងដែនដីទុកជាមរតករហូតដល់អស់កល្បជានិច្ច ( សូមមើល លោកុប្បត្តិ ១៣:១៤–១៧; អ័ប្រាហាំ ២:៨–១១ ) ។
សេចក្ដីសញ្ញាអ័ប្រាហាំត្រូវបានផ្ទេរជាបន្ដបន្ទាប់ទៅកាន់កូនប្រុសរបស់អ័ប្រាហាំ គឺអ៊ីសាក់ ( សូមមើល លោកុប្បត្តិ ២៦:១–៤ ) ហើយបន្ទាប់មកផ្ទេរមកដល់កូនប្រុសរបស់អ៊ីសាក់ គឺយ៉ាកុប ( សូមមើល លោកុប្បត្តិ ២៨:១, ១៣–១៤ ) ។ ព្រះអម្ចាស់បានប្តូរឈ្មោះរបស់យ៉ាកុបទៅជាអ៊ីស្រាអែល ( សូមមើល លោកុប្បត្តិ ៣២:២៨ ) ជាសញ្ញានៃសេចក្ដីសញ្ញាជាបន្តបន្ទាប់របស់ទ្រង់ជាមួយនឹងយ៉ាកុប និងពូជពង្សរបស់លោក ។ ព្រះបានស្តារឡើងវិញនូវការសន្យានៃសេចក្ដីសញ្ញាអ័ប្រាហាំនៅក្នុងជំនាន់របស់យើង ( សូមមើល គោលលទ្ធិ និងសេចក្ដីសញ្ញា ៣៨:១៧–២០; ៨៦:៨–១១; ១៣២:២៩–៣៣ ) ។
រឿងទាំងឡាយដែលត្រូវពិចារណា
-
តើវាមានន័យយ៉ាងណាចំពោះអ្នកដើម្បីក្លាយជាផ្នែកមួយនៃសេចក្ដីសញ្ញាអ័ប្រាហាំ ? សូមពិចារណាសេចក្ដីពិតទាំងនេះ ៖ អ្នកបានចុះសេចក្ដីសញ្ញាមួយជាមួយនឹងព្រះ នៅពេលទទួលពិធីបុណ្យជ្រមុជទឹក ។ អ្នករំឭកសេចក្ដីសញ្ញានោះ និងចុះសេចក្ដីសញ្ញាថ្មីរៀងរាល់ពេលដែលអ្នកទទួលទានសាក្រាម៉ង់ ។ តើអ្នកអាចដាក់ព្រះវិហារបរិសុទ្ធជាចំណុចកណ្ដាលនៅក្នុងជីវិតរបស់អ្នកដោយរបៀបណា ដើម្បីអ្នកអាចចូលរួមកាន់តែខ្លាំងនៅក្នុងភាពពោរពេញនៃដំណឹងល្អ ?
-
សូមអាន អ័ប្រាហាំ ១:២ហើយពិចារណាពីអ្វីដែលអ្នករៀនអំពីចរិតលក្ខណៈរបស់អ័ប្រាហាំ ។ តើវាអាចមានន័យយ៉ាងណាដើម្បីក្លាយជា « អ្នកដើរតាមសេចក្ដីសុចរិតកាន់តែខ្លាំង » នៅក្នុងជំនាន់របស់យើង ? ហេតុអ្វីបានជាអ្នកគិតថាអ័ប្រាហាំ « ស្វែងរកពរជ័យខាងពួកអយ្យកោ » ? តើអ្នកបានទទួលពរជ័យតាមរយៈសេចក្ដីសញ្ញាអ័ប្រាហាំដោយរបៀបណា ? តើអ្នកអាចធ្វើអ្វីខ្លះដើម្បីទទួលពរជ័យនៃសេចក្ដីសញ្ញានេះ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមសិក្សាគំរូដ៏ស្មោះត្រង់នៃការរស់នៅតាមដំណឹងល្អមកពីអ័ប្រាហាំ និងសារ៉ា និងគ្រួសារដ៏សុចរិតរបស់ពួកគេ ( ឧទាហរណ៍ អ្នកអាចអានវគ្គបទគម្ពីរមួយចំនួនខាងក្រោមនេះជាមួយគ្នា ៖ លោកុប្បត្តិ ១៧:១–១៩; ១៨:១–១៩; ២២:១–១៨; ២៤; ៣២:១–២៨; ៣៣; ៤៦:១–៧; អេសាយ ៥១:១–៣; កាឡាទី ៣:២៧–២៩; នីហ្វៃទី២ ៨:១–៣ ) ។ បន្ទាប់មកសូមអាន យ៉ូហាន ៨:៣៩ ។ រៀងៗខ្លួនអ្នកអាចគូរ ឬផាត់ព៌ណរូបភាព ឬសរសេរកំណាព្យដោយបង្ហាញការថ្លែងអំណរគុណរបស់អ្នកចំពោះពរជ័យដែលបានមានដល់អ្នក ឬដែល អាច មានមកពីការរក្សាសេចក្ដីសញ្ញានៃដំណឹងល្អដ៏អស់កល្បអស់កាលជានិច្ចដូចដែលអ័ប្រាហាំ និងសារ៉ាបានធ្វើ ។ បន្ទាប់មកអ្នកអាចចែកចាយរូបភាព ឬកំណាព្យរបស់អ្នកជាមួយគ្នា ។
ស្វែងយល់បន្ថែមទៀត
-
ចោទិយកថា ៧:៦–៩; នីហ្វៃទី២ ២៩:១៤; អ័ប្រាហាំ ២:៦–១២
-
រ័សុល អិម ណិលសុន « Covenants » Liahona ខែវិច្ឆិកា ឆ្នាំ២០១១ ទំព័រ ៨៦–៨៩
-
« The Abrahamic Covenants » លីអាហូណា ខែកុម្ភៈ ឆ្នាំ២០២២ ទំព័រ ៤៧
-
« Abraham ( វីដេអូ ) នៅលើបណ្ណាល័យដំណឹងល្អ
ផ្នែកទី ៣
អស់អ្នកទាំងឡាយដែលបានធ្វើបុណ្យជ្រមុជទឹកបានក្លាយជាកូនចៅនៃសេចក្តីសញ្ញា
អស់អ្នកទាំងឡាយដែលបានធ្វើបុណ្យជ្រមុជទឹកចូលទៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយក្លាយជាកូនចៅរបស់អ័ប្រាហាំ ឬ « កូនចៅនៃសេចក្ដីសញ្ញា » ( សូមមើល នីហ្វៃទី៣ ២០:២៥–២៦ ) ។ សមាជិកសាសនាចក្រទាំងនេះអាចគ្រងមរតកនៃការសន្យាដូចគ្នានឹងការសន្យាដែលបានធ្វើឡើងចំពោះអ័ប្រាហាំ អ៊ីសាក និងយ៉ាកុប ( អ៊ីស្រាអែល )ផងដែរ នៅពេលពួកគេស្វែងរកដើម្បីធ្វើ និងរក្សាសេចក្តីសញ្ញាដ៏ពិសិដ្ឋនៅក្នុងដំណាក់របស់ព្រះអម្ចាស់ ( សូមមើល គោលលទ្ធិ និងសេចក្ដីសញ្ញា ១៣២:២៩–៣២ ) ។
ពូជពង្សរបស់អ័ប្រាហាំមានទំនួលខុសត្រូវក្នុងការបម្រើដល់បុត្រាបុត្រីរបស់ព្រះដើម្បីឲ្យមនុស្សទាំងអស់អាចរីករាយជាមួយពរជ័យនៃសេចក្ដីសង្គ្រោះ និងជីវិតដ៏អស់កល្បជានិច្ច ( សូមមើល អ័ប្រាហាំ ២:៩–១១ ) ។ នៅពេលណាដែលយើងជួយប្រមូលផ្តុំវង្សអ៊ីស្រាអែលនៅផ្នែកណាមួយនៃវាំងនន យើងជួយបុគ្គលម្នាក់ៗទទួលបានពរជ័យនៃសេចក្ដីសញ្ញាដ៏អស់កល្បអស់កាលជានិច្ច និងជួយបំពេញការសន្យាដែលព្រះបានធ្វើជាមួយនឹងអ័ប្រាហាំ ( សូមមើល នីហ្វៃទី១ ២២:៨–១២; នីហ្វៃទី៣ ២០:២៩–៣១ ) ។
រឿងទាំងឡាយដែលត្រូវពិចារណា
-
នៅក្នុង ម៉ូសាយ ៥:១–៨ យើងរៀនពីរបៀបដែលប្រជាជនរបស់ស្តេចបេនយ៉ាមីនបានទទួលយកការបង្រៀនរបស់ទ្រង់អំពីដំណឹងល្អរបស់ព្រះយេស៊ូវគ្រីស្ទ ។ តើពួកគេមានឆន្ទៈដើម្បីធ្វើអ្វីខ្លះនៅពេលនោះ ? តើការក្លាយជាម្នាក់ក្នុងចំណោម « កូនចៅនៃព្រះគ្រីស្ទ » មានន័យយ៉ាងណាចំពោះអ្នក ? តើព្រះគ្រីស្ទ « បានបង្កើតអ្នកខាងវិញ្ញាណ » អាចមានន័យយ៉ាងណា? តើដួងចិត្ដរបស់អ្នកបាន « ផ្លាស់ប្ដូរ តាមរយៈសេចក្ដីជំនឿនៅលើព្រះនាមទ្រង់ » ដោយរបៀបណា ?
-
ប្រធាន អេមីលី ប៊ែល ហ្វ្រីមែន បានមានប្រសាសន៍អំពីសារៈសំខាន់នៃការដើរក្នុងទំនាក់ទំនងសេចក្ដីសញ្ញាជាមួយនឹងព្រះគ្រីស្ទ និងបានសង្ខេបការសន្យាដែលព្រះបានធ្វើជាមួយនឹងយ៉ាកុប ៖ « បិតាគង់នៅជាមួយបុត្រ ។ យើងនឹងថែរក្សាឯង ។ យើងនឹងនាំឯងមកក្នុងស្រុកនេះវិញ ។ យើងនឹងមិនបង់ចោលពួកអ្នកឡើយ ។ យើងនឹងសម្រេចសេចក្តីដែលយើងបានសន្យាឯង » ។ បន្ទាប់មកគាត់បានពន្យល់ថា ៖ « យ៉ាកុបអាចជ្រើសយកជម្រើសមួយ ។ លោកអាចជ្រើសរើសរស់នៅក្នុងជីវិតដោយគ្រាន់តែស្គាល់ព្រះនៃឪពុករបស់លោកសាមញ្ញៗ ឬលោកអាចជ្រើសរើសរស់នៅក្នុងជីវិតមានទំនាក់ទំនងសេចក្ដីសញ្ញាដ៏មោះមុតជាមួយទ្រង់ » ។ សូមពិចារណាថាតើវាមានន័យយ៉ាងណាចំពោះអ្នកក្នុងការរស់នៅក្នុងជីវិតដែលប្ដេជ្ញានៅក្នុងទំនាក់ទំនងសេចក្ដីសញ្ញាជាមួយនឹងព្រះគ្រីស្ទ ។ តើអ្នកនឹងមានឆន្ទៈក្នុងការចាប់ផ្តើមធ្វើ ឬឈប់ធ្វើអ្វីខ្លះដើម្បីអ្នកអាចពង្រឹងទំនាក់ទំនងសេចក្ដីសញ្ញារបស់អ្នកជាមួយនឹងទ្រង់ ?
សកម្មភាពសម្រាប់ការរៀនជាមួយគ្នា
-
សូមអាន ហេលេមិន ៥:១២ និងប្រសាសន៍ទាំងនេះមកពីបងប្រុស ជេន អ៊ី នូមែន ៖« យើងបង្រៀនកូនៗយើងឲ្យចងខ្លួនពួកគេទៅនឹង [ ព្រះគ្រីស្ទ ] តាមរយៈពិធីបរិសុទ្ធ និងសេចក្ដីសញ្ញាដ៏ពិសិដ្ឋនានា នៅពេលព្យុះ និងទឹកជំនន់នៃការប្រឆាំងមកដល់ ដែលវាប្រាកដជានឹងមកដល់ នោះវានឹងមានឥទ្ធិពលតែបន្តិចបន្តួចលើពួកគេ « ពីព្រោះមកពីសិលាដែល [ ពួកគេ ] បានសង់នៅលើនោះ » ។ តើអ្វីខ្លះទៅដែលជា « ព្យុះ និងទឹកជំនន់នៃការប្រឆាំង » ដែលអាចរារាំងផ្លូវរបស់យើង ? សូមពិភាក្សាអំពីរបៀបដែលសេចក្ដីសញ្ញារបស់អ្នកអាចជួយការពារអ្នក និងគ្រួសាររបស់អ្នកពី « ព្យុះដ៏ខ្លាំងកា្ល »នៃមារសត្រូវ ។
-
សូមអានសេចក្ដីថ្លែងការណ៍នេះមកពី អែលឌើរ នែល អិល អាន់ឌើរសិន ៖ « យើងគឺជា ‹ កូនចៅនៃសេចក្ដីសញ្ញា › យើងរស់នៅក្នុងជំនាន់ដ៏រុងរឿងមុនពេលការយាងមកវិញរបស់ព្រះអម្ចាស់ ដែលវាលាតសន្ធឹងទៅទូទាំងផែនដី នៅគ្រប់ជាតិសាសន៍ និងវប្បធម៌ នៅគ្រប់ទ្វីបទាំងអស់ ហើយមានចំនួនរាប់រយលាន កាលយើងរង់ចាំការយាងមកវិញដ៏រុងរឿងរបស់ព្រះអម្ចាស់ និងព្រះអង្គសង្រ្គោះនៃយើង ។ ដោយការបញ្ចាំងពន្លឺដល់មនុស្សនៅជុំវិញខ្លួនយើង យើងមានសតិសម្បជញ្ញៈដើម្បីរៀបចំសម្រួចបំណងប្រាថ្នា គំនិត ជម្រើស និងសកម្មភាពរបស់យើង ។ ដោយខិតខំស្គាល់ និងស្រឡាញ់ព្រះអង្គសង្គ្រោះឲ្យអស់ពីចិត្តរបស់យើង នោះយើងផ្ដាច់ខ្លួនយើងចេញពីពិភពលោកនេះតាមរយៈសេចក្ដីសញ្ញាជាមួយនឹងព្រះ ដោយការធ្វើខុសប្លែកពីគេ មិនទូទៅដូចគេ និងពិសេស នៅពេលយើងគោរពតាមទ្រង់ និងការបង្រៀនរបស់ទ្រង់ ដោយមិនឲ្យខ្លួនយើងឯកោពីអ្នកដទៃដែលជឿខុសពីយើងនោះទេ » ។ សូមពិភាក្សាអំពីរបៀបដែលយើងអាច « [ ខិតខំ ] ដោយអស់ពីចិត្តដើម្បីស្គាល់ និងស្រឡាញ់ព្រះអង្គសង្រ្គោះ » និងរក្សាសេចក្ដីសញ្ញារបស់យើងជាមួយនឹងព្រះ ។
ស្វែងយល់បន្ថែមទៀត
-
លោកុប្បត្តិ ១២:១–៣; កាឡាទី ៣:៧–៩; នីហ្វៃទី ១ ១៥:១៣–១៨; គោលលទ្ធិ និងសេចក្ដីសញ្ញា ១២៤:៥៨
-
រ័សុល អិម ណិលសុន « Children of the CovenantEnsign ខែឧសភា ឆ្នាំ១៩៩៥ ទំព័រ៣២–៣៤