« ការមើលថែដល់អ្នកខ្វះខាត » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
ការមើលថែដល់អ្នកខ្វះខាត
យើងអាចធ្វើជាព្រះហស្តរបស់ព្រះដើម្បីជួយអ្នកដទៃ
តើអ្នកមានធ្លាប់គិតអំពីការលំបាក និងការរងទុក្ខទាំងអស់របស់មនុស្សនៅជុំវិញអ្នក ហើយឆ្ងល់ថា « ខ្ញុំគ្រាន់តែជាមនុស្សម្នាក់ប៉ុណ្ណោះ តើខ្ញុំអាចធ្វើអ្វីល្អបានខ្លះ ? » អ្នកប្រហែលគ្រាន់តែជាមនុស្សម្នាក់ប៉ុណ្ណោះ ប៉ុន្តែអ្នកនៅតែអាចចូលរួមចំណែកដ៏ធំនៅក្នុងការធ្វើរឿងតូចតាច និងសាមញ្ញដើម្បីជួយដល់អ្នកដែលខ្វះខាតបានដែរ ។ ហើយអំពើល្អជាច្រើនត្រូវបានសម្រេចជារៀងរាល់ថ្ងៃ នៅពេលដែលមនុស្សជាច្រើនជួយពីកន្លែង និងរបៀបដែលពួកគេអាចធ្វើបាន ។
អ្នកអាចមើលថែអ្នកដែលខ្វះខាតនៅជុំវិញអ្នក ពេលដែលអ្នកចែកចាយពេលវេលា និងទេពកោសល្យរបស់អ្នក និង « ចែករំលែកនូវទ្រព្យរបស់ខ្លួន ដល់អ្នកទាល់ក្រ … ស្របតាមអ្វីដែល [ អ្នកមាន ] ដូចជា ឲ្យអាហារដល់អ្នកអត់ឃ្លាន ឲ្យសំលៀកបំពាក់ដល់អ្នកអាក្រាត [ និង ] ទៅមើលអ្នកឈឺ ហើយជួយគាំទ្រដល់គេ ទាំងខាងវិញ្ញាណ និងខាងសាច់ឈាម ស្របទៅតាមសេចក្ដីត្រូវការរបស់គេ » ( ម៉ូសាយ ៤:២៦ ) ។
តើការមើលថែដល់អ្នកខ្វះខាតជាអ្វី ?
ការមើលថែដល់អ្នកខ្វះខាតមានន័យថា ការជួយអ្នកដទៃខាងសាច់ឈាម ខាងវិញ្ញាណ និងខាងអារម្មណ៍ ។ វារួមបញ្ចូលទាំង « ការបម្រើ និងការផ្តល់ការងារបម្រើដល់បុគ្គលម្នាក់ៗ ក្រុមគ្រួសារ និងសហគមន៍ ការចែកចាយធនធានទាំងឡាយ … ជាមួយអ្នកដែលខ្វះខាត [ និង ] ការជួយអ្នកដទៃឲ្យធ្វើជាមនុស្សដែលមានភាពខ្លួនទីពឹងខ្លួន » ។ ការមើលថែចំពោះតម្រូវការខាងសាច់ឈាមអាចមានន័យថាបំពេញតម្រូវការភ្លាមៗ ប៉ុន្តែវាក៏អាចមានន័យថា ជួយមនុស្សឲ្យកាន់តែមានភាពខ្លួនទីពឹងខ្លួន ដើម្បីពួកគេអាចបំពេញតម្រូវការរបស់ពួកគេនាពេលអនាគត ។ ការមើលថែខាងអារម្មណ៍ និងខាងវិញ្ញាណរួមមានការស្តាប់ ការយល់ចិត្ត និងការជួយអ្នកដទៃឲ្យទទួលស្គាល់ថាព្រះវរបិតាសួគ៌ និងព្រះយេស៊ូវគ្រីស្ទស្រឡាញ់ពួកគេ ។ ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទ យើងបានសន្យាថានឹងបម្រើ និងជួយមើលថែមនុស្សនៅជុំវិញយើង ។
មគ្គទេសក៍សិក្សាដំណឹងល្អដែលជាប់ទាក់ទង ៖ សេចក្ដីសប្បុរស, ការតមអាហារ
ផ្នែកទី ១
ព្រះបញ្ជាឲ្យយើងស្រឡាញ់ និងបម្រើអ្នកដទៃ
ព្រះស្រឡាញ់បុត្រាបុត្រីទាំងអស់របស់ទ្រង់ ហើយទ្រង់សព្វព្រះទ័យចង់ប្រទានពរដល់ពួកគេ ។ ជាញឹកញាប់ របៀបដែលព្រះប្រទានពរដល់បុត្រាបុត្រីរបស់ទ្រង់ គឺតាមរយៈការបម្រើដែលយើងផ្តល់ដល់អ្នកដទៃ ។ តាមពិត ព្រះបញ្ញត្តិដ៏អស្ចារ្យមួយក្នុងចំណោមព្រះបញ្ញត្តិទាំងពីររបស់ព្រះ គឺត្រូវស្រឡាញ់អ្នកជិតខាងឲ្យដូចខ្លួនឯង ( សូមមើល ម៉ាកុស ១២:២៨–៣៤ ) ។ របៀបមួយក្នុងចំណោមរបៀបទាំងឡាយដែលយើងធ្វើតាមព្រះបញ្ញត្តិនេះគឺការ « បម្រើគ្នាទៅវិញទៅមក … [ និង ]ជួយដល់អស់អ្នកណា ដែលត្រូវការ … ជំនួយ » ( ម៉ូសាយ ៤:១៥–១៦ ) ។
នៅក្នុងព្រះវិហារបរិសុទ្ធរបស់ព្រះអម្ចាស់ យើងចុះសេចក្តីសញ្ញាធ្វើការលះបង់ និងឧទ្ទិសថ្វាយអ្វីៗទាំងអស់ដែលយើងមានទៅដល់ទ្រង់ ។ របៀបមួយដែលយើងធ្វើបែបនោះគឺតាមរយៈការផ្តល់ពេលវេលា និងការខិតខំប្រឹងប្រែងរបស់យើងដើម្បីជួយមនុស្សនៅជុំវិញយើង ។ នៅពេលយើងធ្វើដូច្នោះ នោះយើងអាចបង្កើតទំនាក់ទំនងកាន់តែស៊ីជម្រៅជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ហើយក្លាយកាន់តែដូចជាទ្រង់ទាំងទ្វេ ។
ការបម្រើមិនមែនតែងតែងាយស្រួលជានិច្ចឡើយ ។ ប៉ុន្តែយើងអាចនាំមកនូវការលួងលោម និងសុភមង្គលដល់អ្នកដទៃ ពេលយើងស្រឡាញ់ និងបម្រើពួកគេ ។ ហើយដោយការបម្រើអ្នកដទៃយើងអាចដកពិសោធន៍នូវសេចក្តីអំណរដ៏ពិត និងគោលបំណងក្នុងការធ្វើអ្វីមួយដែលមានតម្លៃពិតប្រាកដ ។
រឿងទាំងឡាយដែលត្រូវពិចារណា
-
ប្រសិនបើអ្នកចង់ជួយអ្នកដែលខ្វះខាត ប៉ុន្តែអ្នកមិនប្រាកដថា ត្រូវធ្វើដោយរបៀបណា នោះសារលិខិតរបស់អែលឌើរ ដេវីឌ អេ បែដណា « តាមគន្លងនៃករណីយកិច្ចរបស់ពួកគេ » អាចជួយបាន ។ អែលឌើរ បែដណា បានបង្រៀន ថា « បងប្អូនប្រុសស្រីដែលចេះសង្កេត … ស្វែងរក ហើយអង្គុយក្បែរមនុស្សឯកោ នៅម្នាក់ឯងក្នុងការប្រជុំនៅព្រះវិហារ និងនៅកន្លែងផ្សេងៗជាច្រើនទៀត ។ ពួកគេ ខិតខំឥតឈប់ដើម្បី ‹ កម្សាន្ដទុក្ខដល់អស់អ្នកណាដែលកំពុងត្រូវការកម្សាន្ដទុក្ខ » [ ម៉ូសាយ ១៨:៩ ] ដោយមិនរំពឹងចង់បានការទទួលស្គាល់ ឬការសរសើរអ្វីឡើយ » ។ អ្នកអាចពិនិត្យមើលសារលិខិតរបស់លោកឡើងវិញ ហើយរកមើលរបៀបតូចៗ និងសាមញ្ញៗដើម្បីបម្រើនរណាម្នាក់ដែលខ្វះខាត ។ សរសេរគំនិតរបស់អ្នក និងធ្វើសកម្មភាពលើចំណាប់អារម្មណ៍ដែលអ្នកទទួលបាន ។
-
ព្យាការី យ៉ូសែប ស៊្មីធ បានទូន្មានថា ៖ « មនុស្សម្នាក់ដែលពេញដោយសេចក្តីស្រឡាញ់នៃព្រះ គឺមិនចង់បានពរជ័យសម្រាប់តែគ្រួសារខ្លួនប៉ុណ្ណោះទេ ប៉ុន្តែចង់ឲ្យពរជ័យនោះមានពេញពិភពលោកទាំងមូល ហើយមានចិត្តអន្ទះសាចង់ផ្តល់ពរដល់មនុស្សជាតិទាំងមូល » ។ ហេតុអ្វីបានជាអ្នកគិតថាមនុស្សម្នាក់ ដែលពោរពេញដោយសេចក្តីស្រឡាញ់របស់ព្រះនឹងចង់ផ្តល់ពរដល់មនុស្សជាតិទាំងអស់ ? តើអ្នកអាចចែកចាយសេចក្តីស្រឡាញ់របស់ព្រះជាមួយអ្នកដទៃបានដោយរបៀបណា ? តើទង្វើនៃសេចក្តីស្រឡាញ់ និងសេចក្តីសប្បុរសរបស់អ្នក អាចជួយផ្លាស់ប្តូរអ្នកបានដោយរបៀបណាដែរ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអាន លូកា ១០:២៥–៣៧ ជាមួយគ្នា ។ អ្នកក៏អាចមើលវីដេអូ « Parable of the Good Samaritan » ( នាទីទី ៤:៥៥ ) ផងដែរ ។ ប្រសិនបើអ្នកកំពុងរៀនជាមួយកុមារ ពួកគេអាចនឹងរីករាយក្នុងការសម្តែងរឿងប្រៀបប្រដូចនេះ ។ បន្ទាប់មកអ្នកអាចនិយាយអំពីរបៀបដែលសាសន៍សាម៉ារីបានគោរពតាមព្រះបញ្ញត្តិឲ្យស្រឡាញ់អ្នកជិតខាងរបស់គាត់ ។ អ្នកក៏អាចពិភាក្សាអំពីទង្វើរបស់សង្ឃ និងពួកសាសន៍លេវីផងដែរ ។ តើហេតុផលអ្វីខ្លះដែលពេលខ្លះយើងមិនបម្រើអ្នកដែលខ្វះខាត ? តើអ្នកអាចយកឈ្នះលើឧបសគ្គទាំងនោះបានយ៉ាងដូចម្ដេច ? អ្នកអាចចែកចាយបទពិសោធន៍ខ្លះៗដល់គ្នាទៅវិញទៅមកនៅពេលដែលអ្នកបម្រើនរណាម្នាក់ដែលខ្វះខាត—ឬនៅពេលនរណាម្នាក់បម្រើអ្នក—និងពីអារម្មណ៍របស់អ្នកនៅពេលដែលទទួលបានការបម្រើ ។ អ្នកម្នាក់ៗអាចកំណត់គោលដៅដើម្បីបម្រើនរណាម្នាក់ជារៀងរាល់ថ្ងៃសម្រាប់មួយសប្តាហ៍ ហើយបន្ទាប់មករាយការណ៍អំពីបទពិសោធន៍របស់អ្នក ។
-
សូមអាន ម៉ូសាយ ២:១៧ ហើយនិយាយអំពីរបៀបដែលអ្នកកំពុងបម្រើព្រះនៅពេលអ្នកបម្រើអ្នកដទៃ ។ បន្ទាប់មកអ្នកអាចមើលវីដេអូ « Day of Service » ( នាទីទី ៥:០៨ ) ។ តើមនុស្សនៅក្នុងវីដេអូនេះបានទទួលពរដោយរបៀបណា នៅពេលដែលពួកគេបានធ្វើការបម្រើ ? តើសហគមន៍ទទួលបានពរដោយរបៀបណា ? ពិចារណាពីរបៀបដែលអ្នកអាចចូលរួមជាក្រុមនៅក្នុងថ្ងៃនៃការបម្រើ ។ អ្នកអាចរុករកនៅលើគេហទំព័រ JustServe.org សម្រាប់គំនិតនានា ។
ស្វែងយល់បន្ថែមទៀត
-
ចោទិយកថា ១៥:១១; អេសាយ ១:១៧; ម៉ាថាយ ២០:២៦–២៧; ២២:៣៦–៤០; យ៉ាកុប ២:១៧–១៩
-
រ័សុល អិម ណិលសុន « The Second Great Commandment » Liahona ខែវិច្ឆិកា ឆ្នាំ២០១៩ ទំព័រ ៩៦–១០០
-
ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, ជំពូកទី ២១–២២ នៅលើបណ្ណាល័យដំណឹងល្អ
ផ្នែកទី ២
យើងធ្វើតាមគំរូរបស់ព្រះយេស៊ូវគ្រីស្ទនៅពេលដែលយើងមើលថែដល់់អ្នកដែលខ្វះខាត
ព្រះយេស៊ូវគ្រីស្ទគឺជាគំរូដ៏អស្ចារ្យរបស់យើងអំពីការបម្រើ និងការជួយដល់អ្នកដទៃ ទ្រង់ពិតជា « បានយាងចុះឡើងធ្វើការល្អ » ( កិច្ចការ ១០:៣៨ ) ។ ក្នុងនាមជាសមាជិកនៃសាសនាចក្ររបស់ទ្រង់ យើងត្រូវបានអញ្ជើញឲ្យជួយមើលថែមនុស្សដែលនៅជុំវិញយើង ( សូមមើល ម៉ូសាយ ១៨:៨–១០ ) ។
ក្នុងនាមជាអ្នកដើរតាមព្រះគ្រីស្ទ យើងខិតខំមើលទៅអ្នកដទៃដូចដែលព្រះអង្គសង្គ្រោះទតមើលទៅពួកគេ—ថាមានតម្លៃដ៏៏អស្ចារ្យ និងសក្តានុពលដ៏ទេវភាព ។ យើងជួយពួកគេជាមួយនឹងតម្រូវការខាងសាច់ឈាម, ខាងវិញ្ញាណ និងខាងសតិអារម្មណ៍ ។ ព្រះអង្គសង្គ្រោះបានប្រទានឲ្យអាហារដល់អ្នកដែលស្រេកឃ្លាន និងលួងលោមដល់អ្នកដែលកំពុងឈឺចាប់ ( សូមមើល ឧទាហរណ៍ ម៉ាថាយ ១៤:១៤–២១; លូកា ៧:១១–១៥ ) ។ យើងអាចធ្វើយ៉ាងដូច្នោះបានផងដែរ ។ ឧទាហរណ៍ ការណ៍នោះអាចមានន័យថា ការនាំយកអាហារទៅឲ្យអ្នកជិតខាងដែលខ្វះខាត អង្គុយ និងស្តាប់មិត្តភក្តិដែលបានបាត់បង់មនុស្សជាទីស្រឡាញ់ ឬជួយមើលថែនរណាម្នាក់ដែលមានជំងឺ ។ យើងបម្រើដល់អ្នកដទៃ ដោយគ្មានការរំពឹងទុកថានឹងទទួលបានអ្វីមួយត្រឡប់មកវិញនោះទេ ។
រឿងទាំងឡាយដែលត្រូវពិចារណា
-
នៅក្នុងសន្និសីទទូទៅខែមេសា ឆ្នាំ២០១០ ប្រធាន ឌៀថើរ អេហ្វ អុជដូហ្វ បានបង្រៀនថា « នៅពេលដែលយើងធ្វើត្រាប់តាមគំរូដ៏ល្អឥតខ្ចោះរបស់ [ ព្រះយេស៊ូវគ្រីស្ទ ] ដៃរបស់យើងអាចក្លាយជាព្រះហស្តរបស់ទ្រង់ ភ្នែករបស់យើង ជាព្រះនេត្ររបស់ទ្រង់ ដួងចិត្ដរបស់យើង ជាដួងចិត្ដរបស់ទ្រង់ » ។ តើវាមានន័យយ៉ាងណាថាដៃ ភ្នែក និងដួងចិត្ដរបស់អ្នកនឹងទៅជាព្រះហស្ត ព្រះនេត្រ និងដួងចិត្ដរបស់ព្រះអង្គសង្គ្រោះ ? តើការគិតបែបនេះជះឥទិ្ធពលលើរបៀបដែលអ្នកបម្រើអ្នកដទៃយ៉ាងដូចម្តេច ? សូមអាន យ៉ូហាន ទី១ ៣:១៧–១៩ ហើយពិចារណាពីអ្វីដែលបទគម្ពីរនេះបង្រៀនអំពីការមើលថែអ្នកដែលខ្វះខាត ។ តើខគម្ពីរទាំងនេះបំផុសគំនិតអ្នកឲ្យធ្វើតាមគំរូរបស់ព្រះយេស៊ូវគ្រីស្ទនៅពេលអ្នកបម្រើមនុស្សនៅជុំវិញអ្នកដោយរបៀបណា ? អ្នកអាចគិតពីនរណាម្នាក់ដែលត្រូវការជំនួយ ឬការលើកទឹកចិត្ត ហើយធ្វើទង្វើនៃការបម្រើសម្រាប់បុគ្គលនោះដោយមិនឲ្យនរណាដឹង ។ ឬអ្នកអាចបម្រើនរណាម្នាក់ដោយការស្តាប់ទុក្ខកង្វល់របស់គាត់ ឬដោយការធ្វើជាមិត្តដ៏ពិត ។ បន្ទាប់មកអ្នកអាចកត់ត្រាគំនិតរបស់អ្នកអំពីបទពិសោធន៍នោះ ។
-
អ្នកអាចអាន ឬច្រៀងទំនុកតម្កើងអំពីការជួយអ្នកដែលខ្វះខាត ដូចជា « ខ្ញុំនឹងដើរតាមព្រះអង្គ » ឬ « ព្រោះខ្ញុំត្រូវបានផ្ដល់ពរច្រើន » ។ ពេលដែលអ្នកគិតអំពីពាក្យនៃបទចម្រៀងនេះ សូមពិចារណាពីរបៀបដែលអ្នកកំពុងធ្វើតាមព្រះអង្គសង្គ្រោះនៅពេលអ្នកបម្រើអ្នកដទៃ ។ តើអ្នកបានទទួលពរអ្វីខ្លះ ដែលអ្នកអាចចែកចាយដើម្បីលើកស្ទួយដល់មនុស្សដែលនៅជុំវិញអ្នកតាមរបៀបដែលទ្រង់បានធ្វើ ?
សកម្មភាពសម្រាប់ការរៀនសូត្រជាមួយអ្នកដទៃ
-
អែលឌើរ ហ្គើរីត ដបុលយូ ហ្គង បានបង្រៀន ៖ « យើងប្រែក្លាយកាន់តែដូចជាព្រះយេស៊ូវគ្រីស្ទ នៅពេលយើងធ្វើការ ‹ … ដល់អ្នកតូចបំផុតក្នុងពួកបងប្អូនយើងនេះ › ដូចជាយើងនឹងធ្វើដាក់ទ្រង់ដែរ [ សូមមើល ម៉ាថាយ ២៥:៣៥–៤០ ] នៅពេលយើងស្រឡាញ់អ្នកជិតខាងដូចជាខ្លួនយើង [ សូមមើល ម៉ាកុស ១២:៣១ ] នៅពេលយើង ‹ ស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នា › [ យ៉ូហាន ១៣:៣៤ ] និងនៅពេល ‹ អ្នកណាក្នុងពួកអ្នករាល់គ្នា ដែលចង់ធ្វើជាធំ នោះនឹងត្រូវធ្វើជាអ្នកបម្រើដល់អ្នករាល់គ្នាវិញ › [ ម៉ាថាយ ២០:២៦ ] » ។
« ក្នុងនាមជាអ្នកដើរតាមព្រះយេស៊ូវគ្រីស្ទ យើងខិតខំព្យាយាមផ្ដល់ការងារបម្រើដល់មនុស្សដទៃ ដូចដែលទ្រង់ធ្វើដោយសារមានជីវិតជាច្រើនកំពុងរង់ចាំការផ្លាស់ប្ដូរ » ។
អ្នកអាចនិយាយអំពីរបៀបមួយចំនួនដែលព្រះយេស៊ូវគ្រីស្ទបានបម្រើអ្នកដទៃ ( សូមមើល ម៉ាថាយ ១៤:១៣–២១; ម៉ាកុស ២:១–១២; លូកា ១៧:១១–១៩; យ៉ូហាន ៩:១–៧; ១១:១–៤៤ ) ។ អ្នកក៏អាចរកមើលរូបភាពមួយចំនួននៃកំណត់ត្រាទាំងនេះនៅក្នុង សៀវភៅរូបភាពដំណឹងល្អ ឬបណ្តុំ វីដេអូ និង រូបភាព » នៅលើបណ្ណាល័យដំណឺងល្អ ។ ចែកចាយជាមួយគ្នាទៅវិញទៅមកនូវអ្វីដែលធ្វើឲ្យអ្នកចាប់អារម្មណ៍អំពីរបៀបដែលព្រះអង្គសង្គ្រោះបានយកចិត្តទុកដាក់ចំពោះអ្នកដែលខ្វះខាត ។ បន្ទាប់មកអ្នកអាចជ្រើសរើសដំណើររឿងមួយអំពីរបៀបនៃការបម្រើរបស់ព្រះអង្គសង្គ្រោះដែលអ្នកចង់ធ្វើតាម ។ ពិចារណាពីរបៀបដែលសកម្មភាពរបស់អ្នកពិតជាអាចផ្តល់ពរ « ជីវិតកំពុងរង់ចាំការផ្លាស់ប្តូរ » ។
ស្វែងយល់បន្ថែមទៀត
-
ទំនុកដំកើង ៣៥:១០; លូកា ៦:២៧–៣៨; កិច្ចការ ២០:៣៥; គោលលទ្ធិ និងសេចក្ដីសញ្ញា ៤២:៣០–៣១; ៥២:៤០
-
ដបុលយូ គ្រីស្តូហ្វើរ វ៉តឌែល « Just as He Did » » Liahona ខែឧសភា ឆ្នាំ២០១៩ ទំព័រ ១៩–២១
-
ខាំមៀល អិន ចនសុន « ព្រះយេស៊ូវគ្រីស្ទជាសេចក្ដីសង្គ្រោះ » លីអាហូណា ខែឧសភា ឆ្នាំ២០២៣ ទំព័រ ៨១–៨៣
-
ជីន ប៊ី ប៊ីងហាំ « Ministering as the Savior Does » Liahona ខែឧសភា ឆ្នាំ២០១៨ ទំព័រ ១០៤–១០៧
ផ្នែកទី ៣
យើងមើលថែអ្នកដទៃពេលដែលយើងបម្រើនៅក្នុងការហៅក្នុងសាសនាចក្រ
ក្នុងអំឡុងជីវិតរមែងស្លាប់របស់ទ្រង់ ព្រះយេស៊ូវគ្រីស្ទបានប្រទានឲ្យសិស្សរបស់ទ្រង់នូវទំនួលខុសត្រូវសំខាន់ទាំងឡាយ ដើម្បីជួយសម្រេចកិច្ចការរបស់ព្រះវរបិតារបស់ទ្រង់ ( សូមមើល ឧទាហរណ៍ លូកា ១០:១–៩ ) ។ ព្រះអម្ចាស់ក៏អញ្ជើញយើងឲ្យចូលរួមក្នុងកិច្ចការនៃសេចក្តីសង្គ្រោះ និងភាពតម្កើងឡើងរបស់ព្រះនៅសព្វថ្ងៃនេះដែរ ។ ឱកាសបម្រើទាំងនេះត្រូវបានគេស្គាល់ថាជាការហៅ ។
ការហៅ គឺជាការទទួលខុសត្រូវមកពីព្រះអម្ចាស់ទៅកាន់បុត្រាបុត្រីរបស់ទ្រង់ ដែលផ្តល់ឲ្យពួកគេនូវឱកាសដើម្បីបម្រើនៅក្នុងសាសនាចក្ររបស់ទ្រង់ និងខិតកាន់តែជិតទ្រង់ និងសមាជិកផ្សេងទៀត ។ ការហៅទាំងនេះត្រូវបានផ្តល់ឲ្យតាមរយៈថ្នាក់ដឹកនាំសាសនាចក្រ ដែលស្វែងរកការបំផុសគំនិតមកពីព្រះអម្ចាស់មុនពេលផ្តល់ការអញ្ជើញឲ្យបម្រើ ។ រាល់ការហៅ និងការចាត់តាំងរបស់សាសនាចក្រគឺមានសារៈសំខាន់ក្នុងការជួយសម្រេចកិច្ចការរបស់ព្រះ និងការរៀបចំសម្រាប់ការយាងមកជាលើកទីពីររបស់ព្រះអង្គសង្រ្គោះ ។
រឿងទាំងឡាយដែលត្រូវពិចារណា
-
សូមគិតអំពីការហៅ ឬទំនួលខុសត្រូវដែលអ្នកធ្លាប់មាននៅក្នុងសាសនាចក្រពេលអ្នកអាន យ៉ូហាន ១៥:១៦ ។ បន្ទាប់មកអានគំនិតនេះដោយប្រធាន ហែនរី ប៊ី អាវរិង ថា ៖ « ព្រះអម្ចាស់ស្គាល់បងប្អូន ។ ទ្រង់ស្គាល់អ្នកដែលទ្រង់ចង់ឲ្យបម្រើនៅក្នុងគ្រប់តួនាទីក្នុងសាសនាចក្ររបស់ទ្រង់ ។ ទ្រង់បានរើសបងប្អូន » ។ សូមគិតអំពី « ផលផ្លែ » ដែលអ្នកបានឃើញពីការបម្រើនៅក្នុងការហៅ ឬកិច្ចការរបស់អ្នក ។ ហេតុអ្វីបានជាព្រះអម្ចាស់អាចជ្រើសរើសអ្នកសម្រាប់ការហៅបច្ចុប្បន្នរបស់អ្នក ? តើអ្នកអាចធ្វើអ្វីបាននៅក្នុងការហៅរបស់អ្នក ដើម្បីឲ្យការបម្រើរបស់អ្នកអាចមានឥទ្ធិពលយូរអង្វែងលើអ្នកដទៃហើយ « ផលរបស់អ្នករាល់គ្នានៅជាប់ផង ? »
សកម្មភាពសម្រាប់ការរៀនសូត្រជាមួយអ្នកដទៃ
-
អ្នកអាចគូសដានជើងរបស់អ្នកពីរបីដងដើម្បីធ្វើជាដានជើងសាមញ្ញ ហើយបន្ទាប់មកសរសេរនៅក្នុងដានជើងនីមួយៗនូវរបៀបមួយដែលយើងអាចចូលទៅកាន់តែជិតព្រះគ្រីស្ទ ពេលយើងបម្រើក្នុងការហៅបម្រើក្នុងសាសនាចក្រ និងកិច្ចចាត់តាំងរបស់យើង ។ បន្ទាប់មកអ្នកអាចអានគំនិតនេះដោយប្រធាន ឌៀថើរ អេហ្វ អុជដូហ្វ ជាមួយគ្នា ៖ « ប្រសិនបើយើងមើលទៅការហៅរបស់យើងថាជាឱកាសដើម្បីបម្រើព្រះ និងបម្រើដល់អ្នកដទៃដោយសេចក្តីជំនឿ និងភាពទន់ភ្លន់ រាល់ទង្វើនៃការបម្រើនឹងក្លាយជាជំហានមួយនៅលើផ្លូវនៃភាពជាសិស្ស » ។ បន្ទាប់មកអ្នកអាចចែកចាយជាមួយគ្នាទៅវិញទៅមកនូវអ្វីដែលអ្នកបានសរសេរ ។ ពិចារណាពីអ្វីដែលអ្នកអាចធ្វើបាន ដើម្បីបម្រើដោយសេចក្តីជំនឿ និងភាពទន់ភ្លន់បន្ថែមទៀតនៅក្នុងការហៅរបស់អ្នក ។ សូមកត់ត្រាចំណាប់អារម្មណ៍ដែលមាន ហើយបន្ទាប់មកធ្វើសកម្មភាពលើចំណាប់អារម្មណ៍ទាំងនោះ ។
ស្វែងយល់បន្ថែមទៀត
-
យ៉ូស្វេ ១:១–៩; ម៉ាថាយ ២៥:២៣; កូរិនថូស ទី១ ១២:១៣–១៨; គោលលទ្ធិ និងសេចក្ដីសញ្ញា ៨៤:៨៨; មាត្រានៃសេចក្តីជំនឿ ១:៥
-
ឌៀថើរ អេហ្វ អុជដូហ្វ « Lift Where You Stand » Liahona ខែវិច្ឆិកា ឆ្នាំ២០០៨ ទំព័រ ៥៣–៥៦
-
ខាល ប៊ី ឃុក « Serve » Liahona ខែវិច្ឆិកា ឆ្នាំ ២០១៦ ទំព័រ ១១០–១១២
ធនធានផ្សេងទៀតអំពីការមើលថែអ្នកដែលខ្វះខាត
-
សារលិខិតមកពីថ្នាក់ដឹកនាំសាសនាចក្រ ៖ សុខុមាលភាព, សេចក្តីសប្បុរស, ការងារបម្រើ, ការបម្រើ
-
ធនធានសម្រាប់កុមារ