Faapaiaina

Ina ia faapaiaina se mea o lona uiga ia tuuto atu i se faamoemoega paia. O tagata o le Ekalesia i vaitausaga uma ua faapaiaina i ni taleni, taimi, ma punaoa e faatuina ma fausia ai le malo o le Atua i luga o le fogaeleele.

Mo faamatalaga e uiga i le ala na ola ai le nuu o le Alii i le tulafono o le faapaiaina i le taimi ua tuanai, tagai i le “Faapaiaina ma le Tausimea.”

O Tagata o le Au Paia o Aso e Gata Ai ua maua o latou faaeega paia i nei aso i le malumalu ua talosagaina e osia se feagaiga e faapaia a latou taleni, taimi, ma punaoa i le Atua. Latou te faia i ni auala eseese, e aofia ai le auai i le galuega o le faaolataga ma le faaeaga, lea e aofia ai le auauna atu i isi, faasoaina atu o le talalelei, totogiina o sefuluai, auauna atu ma le faamaoni i valaauga, ma le tausiga o i latou e manaomia le fesoasoani. I mea uma latou te faia, latou te tuuina atu a latou taumafaiga silisili i le Alii.

O i latou o e faapaiaina ma le faamaoni a latou taleni, taimi, ma punaoa i le Alii e iu ina faapaiaina i latou lava ia te Ia. Na aoao mai Elder Neal A. Maxwell: “E matele lava ina tatou mafaufau o le faapaiaina lava ia, o le faamatuu atu lea o a tatou meatotino, pe a faatonuina ai mai le lagi. Ae o le faapaiaina moni lava ia, o le faamatuuina atu lea o oe lava i le Atua.” Na aoao mai Peresitene Russell M. Nelson e faapea, tatou te faia lenei mea a o tatou faia le Atua “ma faatosinaga sili ona mamana i o tatou olaga.”