Գլուխ 46
Վերջին Դատաստան
Վերջին Դատաստան
-
Նշեք մի քանի տարբեր դատաստաններ, որոնք գալիս են նախքան Վերջին Դատաստանը: Ինչպե՞ս են այդ բոլոր դատաստանները կապված միմյանց հետ:
Սուրբ գրություններում հաճախ է մեզ ասվում, որ օրը կգա, երբ մենք կկանգնենք Աստծո առաջ և կդատվենք: Մենք պետք է հասկանանք, թե ինչպես է դատաստանը տեղի ունենալու, որպեսզի կարողանանք պատրաստվել այս կարևոր իրադարձությանը:
Սուրբ գրությունները սովորեցնում են, որ մենք բոլորս կդատվենք ըստ մեր գործերի. «Եվ տեսա մեռելները մեծ և փոքր կանգնած Աստծո աթոռի առաջին. և գրքեր բացուեցան, և մի ուրիշ գիրք էլ բացուեցավ, որ է կեանքի գիրքը, և մեռելները դատուեցան այն գրքերում գրուածներից իրանց գործերի համեմատ» (Հայտնություն Ի.12; տես նաև ՎևՈւ 76.111; 1 Նեփի 15.32; Աբրահամ 3.25–28): Մենք նաև կդատվենք «համաձայն [մեր] սրտերի ցանկությունների» (ՎևՈւ 137.9; տես նաև Ալմա 41.3):
Այստեղ երկրի վրա մենք հաճախ ենք դատվել մեր արժանիությունը հաստատելու համար, որպեսզի Աստծո արքայության մեջ հնարավորություններ ստանանք: Երբ մենք մկրտվել ենք, մենք դատվել ենք արժանի համարվելով այդ արարողությունը ստանալու համար: Մենք դատվել ենք, երբ կանչվել ենք ծառայելու Եկեղեցում կամ հարցազրույց ենք անցել քահանայության մեջ առաջադիմելու կամ տաճարային երաշխավորագիր ստանալու համար:
Ալման ուսուցանել է, որ երբ մենք մահանում ենք, մեր հոգիները ընդունվում են երջանկության կամ թշվառության վիճակում (տես Ալմա 40.11–15): Սա է դատաստանը:
Մեր խոսքերը, գործերը և մտքերը կօգտագործվեն մեզ դատելիս
-
Պատկերացրեք, որ դատվում եք ձեր բոլոր մտքերի, գործերի և արարքների համար:
Ալմա մարգարեն վկայել է. «Մեր խոսքերը կդատապարտեն մեզ, այո, բոլոր մեր գործերը կդատապարտեն մեզ … և մեր մտքերը նույնպես կդատապարտեն մեզ» (Ալմա 12.14):
Տերն ասել է. «Ամեն դատարկ խոսքի համար, որ մարդիկ խոսեն՝ դատաստանի օրը համար պիտի տան: Որովհետև քո խոսքիցը՝ կարդարանաս, և քո խոսքիցը կդատապարտուիս» (Մատթեոս ԺԴ.36–37):
Հավատն առ Հիսուս Քրիստոս օգնում է մեզ պատրաստվել Վերջին Դատաստանին: Լինելով Նրա հավատարիմ աշակերտը և ապաշխարելով մեր բոլոր մեղքերից, մենք կարող ենք ներում ստանալ մեր բոլոր մեղքերից և դառնալ մաքուր ու սուրբ, այնպես որ կարող ենք ապրել Աստծո ներկայության մեջ: Եթե ապաշխարենք մեր մեղքերից, հրաժարվելով ամեն անմաքուր մտքից և արարքից, Սուրբ Հոգին կփոխի մեր սրտերը, այնպես որ մենք այլևս չենք ցանկանա մեղանչել (տես Մոսիա 5.2): Այնուհետև երբ մենք դատվենք, պատրաստ կլինենք մտնելու Աստծո ներկայություն:
-
Մտածեք, թե ինչ կարող եք անել բարելավելու համար ձեր մտքերը, խոսքերը և գործերը:
Մենք կդատվենք ըստ գրառումների
-
Ո՞ր գրառումներից մենք կդատվենք: Ո՞վ կդատի մեզ:
Մարգարե Ջոզեֆ Սմիթն ասել է, որ մահացածները կդատվեն երկրի վրա պահված գրառումներից: Մենք նաև կդատվենք «կյանքի գրքից», որը պահվել է երկնքում (տես ՎևՈւ 128.6–8):
«Ձեզանից յուրաքանչյուրը … պետք է կանգնի «Իսրայելի Սուրբի ատյանի առջև … և հետո պետք է նրանք դատվեն՝ ըստ Աստծո սուրբ դատաստանի» (2 Նեփի 9.15): Եվ ըստ Հովհաննեսի տեսիլքի, «գրքեր բացուեցան, և մի ուրիշ գիրք էլ բացուեցավ, որ է կեանքի գիրքը, և մեռելները դատուեցան այն գրքերում գրվածներից իրանց գործերի համեմատ» (Հայտն. Ի.12): «Գրքերը», որոնց մասին խոսվում է, վերաբերվում են «[ձեր գործերի] գրանցումներին, որոնք կատարվում են երկրի վրա: … Կյանքի գիրքն այն հիշատակարանն է, որ պահվում է երկնքում» (ՎևՈւ 128.7)» (Teachings of Presidents of the Church: Harold B. Lee [2000], 226–27):
Կա մեկ այլ հիշատակարան, որը կօգտագործվի մեզ դատելու համար: Պողոս Առաքյալն ուսուցանել է, որ մենք ինքներս մեր կյանքի մի հիշատակարան ենք (տես Հռովմեացիս Բ.15): Մեր մարմնում և մտքում պահված է մեր կատարած ամեն ինչի մասին մի լիակատար պատմություն: Նախագահ Ջոն Թեյլորն ուսուցանել է այս ճշմարտությունը. «[Անհատը] ինքն է պատմում պատմությունը, և վկայություն է բերում իր դեմ: … Այն գրառումը, որ գրանցվել է տվյալ մարդու կողմից իր մտքի տախտակների վրա, այդ գրառումը չի կարող խաբել այն օրը, երբ բացվի Աստծո, հրեշտակների և նրանց առաջ, ովքեր կնստեն որպես դատավորներ» (Deseret News, Mar. 8, 1865, 179):
Հովհաննես Առաքյալն ուսուցանել է, որ «Հայրը ոչ մեկին էլ չի դատում, այլ ամեն դատաստանը տուավ Որդուն» (Հովհաննես Ե.22): Որդին, իր հերթին, կկանչի մյուսներին, որպեսզի օգնեն Դատաստանի ժամանակ: Տասներկուսը, որ Նրա հետ էին Նրա ծառայության ժամանակ, կդատեն Իսրայելի տասներկու ցեղերին (տես Մատթեոս ԺԹ.28; Ղուկաս ԻԲ.30): Նեփիացի տասներկու աշակերտները կդատեն Նեփիացի և Լամանացի ժողովուրդներին (տես 1 Նեփի 12.9–10; Մորմոն 3.18–19):
Փառքի թագավորությունում մի վայր ժառանգելը
-
Երկրի վրա մեր կյանքի ընթացքում դրսևորած մեր հավատարմությունը ինչպե՞ս կազդի հավերժությունների ընթացքում մեր կյանքի վրա:
Վերջին Դատաստանի ժամանակ մենք կժառանգենք մի վայր այն թագավորությունում, որի համար պատրաստվել ենք: Սուրբ գրություններն ուսուցանում են փառքի երեք թագավորությունների մասին՝ սելեստիալ թագավորություն, թերեստրիալ թագավորություն և թելեստիալ թագավորություն (տես ՎևՈւ 88.20–32):
Վարդապետություն և Ուխտեր 76 բաժնում Տերը նկարագրել է, թե ինչպես ենք ընտրում ապրել մեր մահկանացու կյանքը: Նա բացատրել է, որ մեր ընտրությունները կորոշեն, թե որ թագավորության համար ենք մենք պատրաստվել: Մենք սովորում ենք այս հայտնությունից, որ նույնիսկ Եկեղեցու անդամները կժառանգեն տարբեր թագավորություններ, որովհետև նրանք հավասարապես հավատարիմ և անվեհեր չեն Քրիստոսին հնազանդվելիս:
Ստորև տրված են կյանքի տեսակները, որում մենք կարող ենք ընտրել ապրել, և այն թագավորությունները, որ կստանանք մեր ընտրությունների արդյունքում:
Սելեստիալ
«Այդ նրանք են, ովքեր ընդունեցին Հիսուսի մասին վկայությունը և հավատացին նրա անվանը, և մկրտվեցին … որպեսզի պատվիրանը պահելով՝ նրանք կարողանան լվացվել և մաքրվել իրենց բոլոր մեղքերից և ստանան Սուրբ Հոգին»: Այդ նրանք են, ովքեր իրենց հավատքով հաղթում են աշխարհը: Նրանք արդար են և ճշմարիտ, այնպես որ Սուրբ Հոգին կարող է կնքել նրանց օրհնությունները իրենց վրա: (Տես ՎևՈւ 76.51–53:) Նրանք, ովքեր ժառանգում են սելեստիալ թագավորության բարձրագույն աստիճանը, ովքեր դառնում են աստվածներ, պետք է նաև ամուսնանան հավերժության համար տաճարում (տես ՎևՈւ 131.1–4): Նրանք, ովքեր ժառանգում են սելեստիալ թագավորությունը, հավերժ կապրեն Երկնային Հոր և Հիսուս Քրիստոսի հետ (տես ՎևՈւ 76.62):
Տաճարներում կատարվող աշխատանքի շնորհիվ, բոլոր մարդիկ, ովքեր ապրել են երկրի վրա, կարող են ավետարանի լրիվությունը և փրկության արարողությունները ստանալու հավասար հնարավորություն ունենալ, այնպես որ նրանք կարող են մի վայր ժառանգել սելեստիալ փառքի բարձրագույն աստիճանում:
Թերեստրիալ
Այդ նրանք են, ովքեր երկրի վրա մերժել են ավետարանը, սակայն ընդունել են այն հոգևոր աշխարհում: Նրանք երկրի վրա պատվավոր մարդիկ են, ովքեր մարդկանց խորամանկության պատճառով կուրացել են Հիսուս Քրիստոսի ավետարանի հանդեպ: Այդ նաև նրանք են, ովքեր ընդունել են ավետարանը և Հիսուսի վկայությունը, սակայն այնուհետև անվեհեր չեն եղել: Նրանց կայցելի Հիսուս Քրիստոսը, սակայն ոչ մեր Երկնային Հայրը: (See ՎևՈւ 76.73–79:)
Թելեստիալ
Այս մարդիկ չընդունեցին Հիսուսի ավետարանը կամ վկայությունը ոչ երկրի վրա, ոչ էլ հոգևոր աշխարհում: Նրանք դժոխքում կտառապեն իրենց մեղքերի համար մինչև Հազարամյակի ավարտը, երբ նրանք հարություն կառնեն: «Այդ նրանք են, ովքեր ստախոսներ են, և կախարդներ, և շնացողներ, և անառակներ, և ովքեր սուտն են սիրում և գործում»: Այդ մարդիկ այնքան անհամար են, որքան երկնքի աստղերը և ծովափի ավազը: Նրանց կայցելի Սուրբ Հոգին, սակայն ոչ Հայրը և ոչ էլ Որդին: (See ՎևՈւ 76.81–88, 103–6, 109:)
Դրսի խավար
Այդ նրանք են, ովքեր ունեին Հիսուսի մասին վկայություն Սուրբ Հոգու միջոցով և գիտեին Տիրոջ զորությունը, սակայն թույլ տվեցին, որ Սատանան հաղթի իրենց: Նրանք ուրացան ճշմարտությունը և արհամարհեցին Տիրոջ զորությունը: Նրանց համար ներում չկա, քանզի նրանք ուրացան Սուրբ Հոգին այն ստանալուց հետո: Նրանք չեն ունենա փառքի թագավորություն: Նրանք սատանայի և նրա հրեշտակների հետ հավերժ կապրեն հավերժական խավարի, տանջանքի և թշվառության մեջ: (Տես ՎևՈւ 76.28–35, 44–48:)
-
Ըստ Վարդապետություն և Ուխտեր 76.50–53, 62–70 հատվածների, որո՞նք են այն մարդու հատկանիշները, որը հավատքով հաղթում է աշխարհին և անվեհեր է Հիսուսի վկայության մեջ:
Մենք այժմ պետք է պատրաստվենք Դատաստանին
-
Ի՞նչ պետք է մենք անենք, որպեսզի պատրաստվենք Վերջին Դատաստանին:
Իրականում, ամեն օր դատաստանի օր է: Մենք խոսում ենք, մտածում և գործում ըստ սելեստիալ, թերեստրիալ կամ թելեստիալ օրենքի: Առ Հիսուս Քրիստոս մեր հավատքը, ինչպես ցույց են տալիս մեր ամենօրյա գործերը, որոշում է, թե որ թագավորությունը մենք կժառանգենք:
Մենք ունենք Հիսուս Քրիստոսի վերականգնված ավետարանն իր լրիվությամբ: Ավետարանը սելեստիալ թագավորության օրենքն է: Մեր առաջընթացի համար անհրաժեշտ քահանայության բոլոր արարողությունները հայտնվել են: Մենք մտել ենք մկրտության ջրերը և Քրիստոսանման կյանքով ապրելու ուխտ ենք կապել: Եթե մենք հավատարիմ ենք և պահում ենք մեր կապած ուխտերը, Տերն ասել է մեզ, թե ինչպիսին կլինի մեր դատաստանը: Նա կասի մեզ. «Եկեք, ով իմ Հոր օրհնածները, ժառանգեցեք աշխարհքի սկզբից ձեզ համար պատրաստուած թագավորությունը» (Մատթեոս ԻԵ.34):
Լրացուցիչ սուրբ գրություններ
-
Հռովմայեցիս Բ.6–9; Հայտնություն Ի.12–13 (Դատաստանը)
-
Ալմա 11.41, 45; Մորմոն 7.6; 9.13–14 (մենք կդատվենք հարություն առնելուց հետո)
-
2 Նեփի 29.11; 3 Նեփի 27.23–26 (Դատաստանի ժամանակ օգտագործվող գրքերը)
-
Ալմա 41.2–7 (մեր դատաստանը որոշվում է մեր գործերով, մեր սրտերի ցանկություններով, ապաշխարությամբ, մինչև վերջ համբերելով)
-
Մորմոն 3.22 (ապաշխարեք և պատրաստվեք կանգնելու դատաստանի ատյանի առաջ)
-
Ղուկաս ԺԲ.47–48; ՎևՈւ 82.3 (ում շատ տրված է, նրանից շատ պահանջվում է)
-
ՎևՈւ 88.16–33 (մենք յուրաքանչյուրս ստանում ենք այն, ինչին արժանի ենք)