Գլուխ 45
Հազարամյակ
Մարդիկ երկրի վրա Հազարամյակի ընթացքում
-
Ո՞վ է լինելու երկրի վրա Հազարամյակի ընթացքում:
Խաղաղության, սիրո և ուրախության հազար տարին երկրի վրա կսկսվի Հիսուս Քրիստոսի Երկրորդ Գալստով: Այդ հազարամյա ժամանակահատվածը կոչվում է Հազարամյակ: Սուրբ գրություններն ու մարգարեները օգնում են մեզ հասկանալ, թե ինչպիսին կլինի կյանքը երկրի վրա Հազարամյակի ընթացքում:
Քանի որ Փրկչի Երկրորդ Գալուստի ժամանակ ամբարիշտները կործանվելու են, Հազարամյակի սկզբում միայն արդարակյաց մարդիկ կապրեն երկրի վրա: Նրանք կլինեն այն մարդիկ, ովքեր առաքինի և ազնիվ կյանքով են ապրել: Այդ մարդիկ կժառանգեն թերեստրիալ կամ սելեստիալ արքայությունը:
Հազարամյակի ընթացքում մահկանացուները դեռևս կապրեն երկրի վրա, և նրանք կշարունակեն երեխաներ ունենալ, ինչպես այժմ մենք ենք ունենում (տես ՎևՈւ 45.58): Ջոզեֆ Սմիթն ասել է, որ անմահ էակները հաճախ կայցելեն երկիր: Այդ հարություն առած էակները կօգնեն կառավարման և այլ գործերում: (Տես Teachings of the Prophet Joseph Smith, sel. Joseph Fielding Smith [1976], 268:)
Մարդիկ դեռևս կունենան իրենց ազատ կամքը, և որոշ ժամանակով շատերը ազատ կլինեն հարելու իրենց կրոնական դավանանքներնին ու գաղափարներին: Ի վերջո, ամեն ոք կխոստովանի, որ Հիսուս Քրիստոսը Փրկիչն է:
Հազարամյակի ընթացքում, Հիսուսը «անձամբ կթագավորի երկրի վրա» (Հավատո Հանգանակ 1.10): Ջոզեֆ Սմիթը բացատրել է, որ Հիսուսը «կթագավորի Սրբերի վրա և ներքև կգա ու կսովորեցնի» (Teachings of Presidents of the Church: Joseph Smith [2007], 258):
Եկեղեցու աշխատանքը Հազարամյակի ընթացքում
-
Որո՞նք են այն երկու մեծ գործերը, որ կկատարվեն Հազարամյակի ընթացքում:
Հազարամյակի ընթացքում Եկեղեցու անդամների համար երկու մեծ աշխատանք կլինի կատարելու՝ տաճարային աշխատանքը և միսիոներական աշխատանքը: Տաճարային աշխատանքը ներառում է արարողություններ, որոնք կարևոր են վեհացման համար: Դրանք ներառում են՝ մկրտությունը, ձեռնադրումով Սուրբ Հոգու պարգևը և տաճարային արարողությունները, որոնք են օժտումը, տաճարային ամուսնությունը և որպես ընտանեկան միավոր միասին կնքվելը:
Շատ մարդիկ մահացել են առանց նման արարողություններ ստանալու: Երկրի վրա մարդիկ պետք է կատարեն այդ արարողությունները նրանց համար: Այս աշխատանքը այժմ կատարվում է Տիրոջ տաճարներում: Շատ աշխատանք կա կատարելու նախքան Հազարամյակի սկսվելը, և Հազարամյակի ընթացքում ամբողջ աշխաատանքը պետք է ավարտվի: Հարություն առած էակները կօգնեն մեզ շտկել մեր մահացած նախնիների համար արված հետազոտության ընթացքում կատարված սխալները: Նրանք նաև կօգնեն մեզ գտնել անհրաժեշտ տեղեկություն՝ մեր գրառումներն ավարտելու համար: (Տես Joseph Fielding Smith, Doctrines of Salvation, comp. Bruce R. McConkie, 3 vols. [1954–56], 2:167, 251–52:)
Հազարամյակի ընթացքում մյուս մեծ աշխատանքը կլինի միսիոներական աշխատանքը: Ավետարանը մեծ զորությամբ կուսուցանվի բոլոր մարդկանց: Ի վերջո, կարիք չի լինի մյուսներին ուսուցանել ավետարանի առաջին սկզբունքը, որովեհտև «նրանք ամենքը պիտի ճանաչեն ինձ, նրանց փոքրերիցը մինչև նրանց մեծերը, ասում է Տերը» (Երեմիա ԼԱ.34):
-
Ինչպե՞ս կարող ենք այժմ պատրաստվել Հազարամյակի աշխատանքին:
Հազարամյակի պայմանները
-
Ինչո՞վ է կյանքը Հազարամյակի ընթացքում տարբերվելու ներկայիս երկրային կյանքից:
Մարգարե Ջոզեֆ Սմիթն ուսուցանել է, որ Հազարամյակի ընթացքում «երկիրը կնորանա և կընդունի իր դրախտային փառքը» (Հավատո Հանգանակ 1.10):
Սատանան կապված
Հազարամյակի ընթացքում սատանան կկապվի: Դա նշանակում է՝ նա զորություն չի ունենա գայթակղելու նրանց, ովքեր կապրեն այդ ժամանակ (տես ՎևՈւ 101.28): «Երեխաները պիտի մեծանան առանց մեղքի՝ ի փրկություն» (ՎևՈւ 45.58): «[Տիրոջ] ժողովրդի արդարակեցության պատճառով, Սատանան զորություն չունի. այդ պատճառով նա չի կարող արձակվել, շատ տարիների ընթացքում. քանի որ զորություն չունի մարդկանց սրտերի վրա, քանզի նրանք կենում են արդարության մեջ և Սուրբն է Իսրայելի թագավորում» (1 Նեփի 22.26):
Երկրի վրա խաղաղություն
Հազարամյակի ընթացքում պատերազմ չի լինի: Մարդիկ միմյանց հետ կապրեն խաղաղության և ներդաշնակության մեջ: Այն, ինչ օգտագործվում էր պատերազմի համար, օգտակար նպատակներով կօգտագործվի: «Նրանք կձուլեն իրանց սուրերը խոփեր, և իրանց նիզակները՝ հոտոցներ. ազգ ազգի վրա սուր չի բարձրացնիլ, և այլևս պատերազմի չեն վարժուիլ» (Եսայիա Բ.4; տես նաև Եսայիա ԺԱ.6–7; ՎևՈւ 101.26):
Արդար կառավարում
Նախագահ Ջոն Թեյլորն ուսուցանել է. «Տերը թագավոր կլինի ողջ երկրի վրա, և ողջ մարդկությունը բառացիորեն կլինի նրա ղեկավարության ներքո, և երկնքի տակ ամեն ազգ կընդունի նրա իշխանությունը, և կխոնարհվի նրա առաջ: Նրանք, ովքեր արդարակեցորեն կծառայեն նրան, կհաղորդակցվեն Աստծո հետ, և Հիսուսի հետ, կունենան հրեշտակների սպաասավորումը, և կիմանան անցյալը, ներկան և ապագան, իսկ նրանք, ովքեր ողջ հնազանդությամբ չեն ենթարկվի նրա օրենքներին, ոչ էլ լիովին կուսուցանվեն նրա ուխտերը, այնուամենայնիվ, լիովին կհնազանդվեն նրա կառավարմանը: Քանզի կլինի Աստծո թագավորումը երկրի վրա, և նա կկիրառի իր օրենքները և աշխարհի ազգերից կպահանջի այն հնազանդությունը, որը օրինական իր իրավունքն է» (Teachings of Presidents of the Church: John Taylor [2001], 225):
Մահ չի լինի
Հազարամյակի ընթացքում մահ չի լինի, ինչպես որ մենք գիտենք այն: Երբ մարդիկ ապրեն մինչև ծերություն, նրանք չեն մահանա և թաղվի: Այլ, «մեկ ակնթարթում» նրանք մահկանացու վիճակից կփոխվեն անմահ վիճակի: (Տես ՎևՈւ 63.51; 101.29–31:)
Բոլոր բաները կհայտնվեն
Որոշ ճշմարտություններ չեն հայտնվել մեզ: Բոլոր բաները կհայտնվեն Հազարամյակի ընթացքում: Տերը ասել է, որ Նա «հայտնի կդարձնի բոլոր բաները,–բաներ, որոնք անցած են, և թաքնված բաներ, որոնք ոչ մի մարդ չի իմացել, երկրի բաները, որոնցով այն արարվել էր, և նրա նպատակն ու վախճանը,– բաներ՝ շատ թանկարժեք, բաներ, որոնք վերևում են, և բաներ, որոնք ներքևում են, բաներ, որ երկրի մեջ են, և երկրի վրա, և երկնքում» (ՎևՈւ 101.32–34):
Այլ Հազարամյա ապրելակերպ
Շատ բաներով կյանքը նման կլինի այժմյան կյանքին, բացի այն որ ամեն ինչ կարվի արդարակեցության մեջ: Մարդիկ կուտեն և կխմեն, կհագնվեն: (Տես Teachings of Presidents of the Church: Brigham Young [1997], 333:) Մարդիկ կշարունակեն տնկել և բերք հավաքել, տներ կառուցել (տես Եսայիա ԿԵ.21):
-
Որո՞նք են ձեր մտքերն ու զգացումները Հազարամյակի ընթացքում գոյություն ունեցող պայմանների վերաբերյալ:
Մեկ վերջին ճակատամարտ Հազարամյակից հետո
-
Ի՞նչ է լինելու երկրի վերջնական ճակատագիրը:
1000 տարիների վերջում սատանան ազատ կարձակվի մի փոքր ժամանակով: Որոշ մարդիկ կհեռանան Երկնային Հորից: Սատանան կհավաքի իր բանակը, իսկ Միքայելը (Ադամ) կհավաքի երկնային զորքերը: Այդ մեծ ճակատամարտում, սատանան և նրա հետևորդները հավիտյան դուրս կգցվեն: Երկիրը կփոխվի սելեստիալ արքայության: (Տես ՎևՈւ 29.22–29; 88.17–20, 110–15:)
Լրացուցիչ սուրբ գրություններ
-
Զաքարիա ԺԴ.4–9; 1 Նեփի 22.24–25 (Հիսուսը կթագավորի երկրի վրա)
-
Դանիել Է.27 (Սրբերին կտրվի թագավորությունը)
-
ՎևՈւ 88.87–110 (Հազարամյակի պայմանները)
-
Հայտնություն Ի.1–3; 1 Նեփի 22.26 (Սատանան կկապվի)
-
ՎևՈւ 101.22–31 (թշնամությունը կդադարի, մահ չի լինի, սատանան գայթակղելու զորություն չի ունենա)
-
Եսայիա ԺԱ.1–9 (գայլն ու գառը կապրեն միասին)
-
ՎևՈւ 43.31; Հայտնություն Ի.7–10 (Սատանան կարձակվի մի փոքր ժամանակով)