Marso 1836

Gindedikar ang Templo sang Kirtland

Pagbatyag sang Espiritu sang Ginuo sa Iya balay

Pagkatapos sang halos tatlo ka tuig sang pagpangabudlay, natapos gid man ang Templo sang Kirtland. Gin-imbitar ni Propeta Joseph ang mga Santos sa espesyal nga miting para idedikar ang templo. Mahambal sia sang espesyal nga pangamuyo kag ihalad ang templo sa Ginuo. Mangin balaan ini nga balay sang Ginuo.

Saints, 1:235

Temprano pa sang aga sang miting, ginatos ka Santos ang nagtililipon sa templo. Sang mapuno ang tanan nga bangko, nagtilindog ang mga tawo sa alagyan kag sa gwa, nga nagatan-aw sa mga bintana. Ang tanan gusto gid nga makakita sang templo nga ginadedikar.

Saints, 1:235–36

Nagbasa sang pangamuyo si Joseph para idedikar ang templo. Ginhambal niya sa Ginuo nga gintuman Sia sang mga Santos. Ginpangabay niya ang Ginuo nga batunon ang templo bilang Iya balay.

Doktrina kag mga Kasugtanan 109:1–5

Nangamuyo si Joseph nga ang tanan nga magsulod sa templo makabatyag sang gahum sang Ginuo kag makahibalo nga Iya ini balay.

Doktrina kag mga Kasugtanan 109:13

Nangamuyo man si Joseph nga kon makasala ang mga Santos, mahinulsol sila dayon. Ginpangabay niya sa Ginuo nga hatagan sila sang gahum sa pagpakigbahin sang Iya ebanghelyo sa bilog nga kalibutan. Pagkatapos sang pangamuyo, ang koro nagkanta sang bag-o nga kanta nga ginatawag “The Spirit of God.” Napuno sang kalipay ang mga tawo. Nagtindog sila kag nagdayaw sa Ginuo.

Doktrina kag mga Kasugtanan 109:21–32; Hymns, no. 2; Saints, 1:237

Madamo ang nakakita sang mga anghel sa templo sina nga adlaw. Nakakita sila sang kasanag nga nagapanaog halin sa langit pakadto sa templo. Ang iban nga tawo nagsiling nga daw panganod ini tan-awon; ang iban nagsiling nga daw kalayo ini. Nabatyagan nila tanan nga ang templo isa ka balaan nga lugar. Matuod gid nga balay na ini sang Ginuo.

Saints, 1:237