“Si Sidney kag Phebe Rigdon,” Mga Sugilanon sa Doktrina kag mga Kasugtanan (2024)
“Si Sidney kag Phebe Rigdon,” Mga Sugilanon sa Doktrina kag mga Kasugtanan
Oktubre–Nobyembre 1830
Sidney kag Phebe Rigdon
Pagliwat sang ila kabuhi para batunon ang ebanghelyo
Malakat si Parley Pratt kag iban pa sa Tumandok nga mga Taga-Amerika para ipakigbahin ang ebanghelyo. Sang nagapakadto na sila, gusto ni Parley nga magpundo anay kag bisitahan ang iya amigo nga si Sidney Rigdon. Si Sidney ang manugwali nga nagtudlo kay Parley parte kay Jesucristo sa Biblia. Karon gusto ni Parley nga tudloan si Sidney parte kay Jesus sa Libro ni Mormon.
Doktrina kag mga Kasugtanan 32; Saints, 1:99
Gin-istorya ni Parley kay Sidney ang parte sa Libro ni Mormon kag ginhagad sia nga basahon ini. Indi sigurado si Sidney, pero tungod amigo niya si Parley, nagpromisa sia nga basahon niya.
Saints, 1:100
Sang mabasa ni Sidney ang Libro ni Mormon, nabal-an niya nga halin ini sa Dios. Ginhambal niya ang iya balatyagon sa iya asawa nga si Phebe.
Saints, 1:101
Pero indi sigurado si Sidney kon ano ang dason nga himuon. Kon magpabunyag sia, madulaan sia sang obra bilang manugwali sa iya ginasimbahan. Paano niya maatipan si Phebe kag ang anom nila ka bata? Ano ang mabatyagan sang mga tawo sa ila simbahan? Nangamuyo sia sang bulig sa Amay nga Langitnon, kag nakabaton sia sang katawhay sang buot.
Saints, 1:101; Doktrina kag mga Kasugtanan 19:23
Ginpamangkot ni Sidney si Phebe kon handa sia nga ibaylo ang komportable nila nga pangabuhi kag magpamiyembro sa sining bag-o nga simbahan upod sa iya. “Handum ko nga himuon ang pagbuot sang Dios,” siling niya, “bisan sa kabuhi ukon kamatayon.” Nagdesisyon sila nga magpabunyag.
Saints, 1:101
Sang ulihi, nakilala ni Sidney si Propetang Joseph Smith. Naghatag ang Ginuo sang mensahe kay Sidney paagi kay Joseph. Siling Niya nga nakita Niya ang maayo nga hinimuan ni Sidney kag nabatian ang iya mga pangamuyo. Siling sang Ginuo kay Sidney nga may dako Sia nga ipabuhat sa iya. Magahimo si Sidney sang halangdon nga mga butang.