Disyembre 1830–Agosto 1831

Ang Pamilya Knight kag Iban Pa Nagtipon sa Sion

Pagsunod sa tawag sang Ginuo

Si Polly kag Joseph Knight nagaestar sa New York upod sa ila pamilya. Kilala gid nila si Propeta Joseph. Pagkatapos nga tun-an ang ebanghelyo, ginpili nila nga magpamiyembro sa Simbahan. Sang ginhambalan sang Ginuo ang mga Santos nga magsaylo sa Ohio, nagsunod ang pamilya Knight.

Doktrina kag mga Kasugtanan 37; Saints, 1:33, 94, 109–110

Malipayon ang pamilya Knight sang mag-abot sila sa Ohio. Siling ni Leman Copley, isa ka miyembro sang Simbahan, nga ang iban nga mga Santos pwede mag-estar sa iya duta. May lugar sila didto para mananom kag magpatindog sang mga balay. Nagtrabaho todo si Joseph Knight kag ang iya mga bata nga lalaki para ihanda ang mga uma para tamnan.

Saints, 1:126–27

Pero isa ka adlaw, nagbag-o ang pensar ni Leman parte sa iya duta. Indi na sia gusto nga mag-estar ang mga Santos didto. Ginhambalan niya ang pamilya Knight kag ang iban pa nga maghalin.

Saints, 1:127

Nabalaka ang mga Santos. Wala sila sang maestaran. Ginpamangkot nila si Propeta Joseph kon ano ang ila himuon.

Doktrina kag mga Kasugtanan 54; Saints, 1:127

Siling sang Ginuo nga dapat magkadto sa Missouri ining mga Santos kag tukuron ang Sion. Ang Sion mangin siyudad kon diin magatipon ang katawhan sang Ginuo. Sa Sion, mapatindog sila sang templo kon diin sila maghimo sang mga kasugtanan, ukon mga promisa sa Dios. Bugayan Niya sila kon tumanon nila ini nga mga kasugtanan. Nalipay nga maglakat ang pamilya Knight.

Doktrina kag mga Kasugtanan 29:1–8; 42:30–36; 45:59–66; 54:6–9; 57:1–2; Saints, 1:128

Samtang nagabiyahe ang pamilya Knight pa-Missouri, nagmasakit si Polly. Si Joseph nga iya bana, kag ang ila mga bata nga lalaki nabalaka nga basi indi na sia maglawig. Pero siling ni Polly sa iya pamilya nga gusto niya nga makalab-ot sa Sion antes sia mapatay. Amo gid ini ang iya gusto!

Saints, 1:128

Pagkatapos sang malawig nga biyahe, nag-abot ang pamilya Knight sa Missouri. Grabe ang pagpasalamat ni Polly sa Ginuo nga nakalab-ot sia didto nga buhi. Nakita sang pamilya Knight nga katahum sang lugar. May pagtuo sila nga sarang nila tumanon ang kasuguan sang Ginuo nga magtukod sang Sion didto.

Saints, 1:132

Naghatag sang espesyal nga pangamuyo ang mga Santos kag gintawag ang lugar nga Sion, kon diin ang katawhan sang Dios magakadto. Ginbutangan ni Propeta Joseph sang bato nga tanda kon diin iplastar ang kanto sang templo. Pagligad sang pila ka adlaw, napatay si Polly. Ginpromisa sang Ginuo nga ang mga Santos nga nagkadto sa Sion kag napatay magapahuway sa langit.

Doktrina kag mga Kasugtanan 59:1–2; Saints, 1:132–33