Mga Sugilanon sa Balaan nga mga Kasulatan
Gin-organisar ang Simbahan ni Jesucristo

“Gin-organisar ang Simbahan ni Jesucristo,” Mga Sugilanon sa Doktrina kag mga Kasugtanan (2024)

“Gin-organisar ang Simbahan ni Jesucristo,” Mga Sugilanon sa Doktrina kag mga Kasugtanan

Abril 1830

Gin-organisar ang Simbahan ni Jesucristo

Malipayon nga Pagtililipon sa Simbahan

Si Joseph Smith nga ginatamyaw ang mga tawo pasulod sa balay sang pamilya Whitmer sa una nga miting sang Simbahan.

Naimprinta na karon ang Libro ni Mormon, kag ang gahum sang priesthood sang Dios ara na liwat sa duta. Ginhambalan sang Ginuo si Joseph Smith nga oras na para i-organisar ang Simbahan ni Jesucristo.

Saints, 1:84

Ginaalsa sang mga tawo ang ila mga kamot para sakdagon si Joseph kag Oliver bilang mga lider sang Simbahan.

Sang Abril 6, 1830, mga 40 ka babayi kag lalaki ang nagkadto sa balay sang pamilya Whitmer para i-organisar ang Simbahan. Gintawag sang Ginuo si Joseph kag Oliver para pangunahan ang Iya Simbahan. Ginpangabay ni Joseph kag Oliver nga alsahon sang mga tawo ang ila mga kamot para ipakita nga ginasakdag nila sila bilang ila mga lider.

Doktrina kag mga Kasugtanan 20:1–3; Saints, 1:84

Malipayon ang bag-o nga mga miyembro sang Simbahan nga makaambit sang sakramento.

Dason, ginbendisyonan ni Joseph kag Oliver ang sakramento. Ginpanagtag nila ini sa mga tawo para buligan sila nga dumdumon si Jesucristo. Dayon ginbutang ni Joseph kag Oliver ang ila mga kamot sa ulo sang mga tawo nga ginbunyagan. Ginkompirma nila sila nga mga miyembro sang Simbahan kag ginhatag sa ila ang dulot sang Balaan nga Espiritu.

Doktrina kag mga Kasugtanan 20:75–79; Saints, 1:85

Si Joseph nga ginatudloan ang bag-o nga mga miyembro sang Simbahan.

Naghatag ang Ginuo sang mensahe kay Joseph para sa bag-o nga Simbahan. Ginhambalan Niya sila nga isulat ang nagakatabo sa Simbahan. Siling Niya nga si Joseph Smith ang Iya propeta. Ginpromisahan Niya ang mga miyembro sang Simbahan nga kon sundon nila ang mga kasuguan nga Iya ginhatag kay Joseph, bugayan Niya sila. Ang yawa wala sang gahum sa ila.

Doktrina kag mga Kasugtanan 21:1–6; Saints, 1:85

Si Joseph Smith kag ang iya tatay nga nagahaksanay.

Malipayon gid katama ang mga tawo nga may Simbahan ni Jesucristo! Pagkatapos sang miting, mas damo pa nga tawo ang ginbunyagan, upod ang nanay kag tatay ni Joseph. Sang magtakas ang iya tatay sa tubig, ginhakos sia ni Joseph. “Nakita ko ang akon tatay nga nabunyagan sa matuod nga simbahan ni Jesucristo nga buhi pa ako!” siling niya.

Saints, 1:86

Dako ang pagpasalamat ni Joseph nga nakabulig sia sa pagpanumbalik sang Simbahan.

Sina nga gab-i, nagkadto si Joseph sa kakahuyan para mag-isahanon. Puno sang kalipay ang iya tagipusuon. 10 na katuig halin sang makita niya ang Amay nga Langitnon kag si Jesucristo. Kadamo na sang nagkalatabo halin sadto. Dako kaayo ang pagpasalamat ni Joseph nga nakabulig sia sa pagpanumbalik, ukon pagbalik, sang Simbahan ni Jesucristo!

Saints, 1:86