Nobyembre 1833–Pebrero 1835

Ang Kampo sang Israel

Pagtuon nga magsalig sa Ginuo

Ang mga Santos nga nagaestar sa Independence, Missouri, nagakinahanglan sang bulig. Nagpangabudlay sila sang todo para tukuron ang Sion suno sa ginpangayo sang Dios. Pero indi gusto sang iban nga mga tawo sa banwa nga didto sila mag-estar. Ginpahalin nila ang mga Santos sa ila mga balay.

Saints, 1:195

Si Joseph Smith nagaestar sa Kirtland. Nabatian niya ang natabo sa mga Santos sa Missouri, kag nasubuan sia. Nangamuyo sia para mabal-an kon ano ang himuon. Ginhambalan sang Ginuo si Joseph nga magpangita sang mga tawo nga mag-upod sa iya pakadto sa Missouri. Nagalaum sila nga buligan sang gobyerno ang mga Santos nga mabawi ang ila mga balay.

Doktrina kag mga Kasugtanan 103:1–2, 11–20, 30–34; Saints, 1:195–96

May mga 100 ka tawo nga nagboluntaryo nga mag-upod sa iya. Gintawag sang Propeta ining grupo nga Kampo sang Israel. Malipayon sila nga maglakat para buligan ang mga Santos sa Missouri.

Saints, 1:197–99

Si Brigham kag ang iya amigo nga si Heber Kimball upod sa grupo. Isa ka lamharon nga soltero nga ginatawag Wilford Woodruff naghalin pa sa New York para magbulig.

Saints, 1:197–98

Nadugangan ang mga tawo nga nag-entra sa kampo. Nagmartsa sila bilog nga bulan kag nagtabok sa malapad nga suba pakadto sa Missouri. Kapoy na sila kag nagapalanakit ang lawas. Ang iban nga mga tawo nag-ugtas tungod sa kalawig sang pagpanglakaton. Kalayo pa sang ila lakton para makalab-ot sa siyudad sang Independence.

Saints, 1:200–201

Samtang nagapadayon sila sa paglakat, may babayi nga nagtawag sa ila. Siling niya nga may mga lalaki nga maabot para pamatyon sila.

Saints, 1:203

Nagpundo ang Kampo sang Israel sang isa ka gab-i sa bungyod sa ibabaw sang suba. Samtang nagaplastar sila sang kampo, lima ka lalaki nga nagasakay sa kabayo ang nagpalapit sa ila. Gintikal nila nga may manug-abot pa nga 300 ka lalaki para atakehon ang kampo. Madamo nga miyembro sang Kampo sang Israel ang nabalaka. Ginhambalan sila ni Joseph nga magtuo lang sila nga buligan sila sang Dios.

Saints, 1:203

Wala magdugay nagdulom ang langit. Nagsugod sa pagbundak ang makusog nga ulan. Nagdalom ang suba. Nagkalatumba ang mga kahoy tungod sa hangin. Nagakurit ang kilat sa langit. Nakakita si Joseph kag ang iban pa sang gamay nga simbahan kon diin makapasilong sila. Nagkinanta sila sang mga himno bilog nga gab-i. “Ang Dios nagaupod sa sining bagyo!” Siling ni Joseph.

Saints, 1:203–4

Napunggan sang bagyo ang mga tawo nga gusto mag-atake sa ila. Hilway na sa katalagman ang kampo. Pero siling sang gobyerno nga indi sila magbulig sa mga Santos. Ginhambalan sang Ginuo si Joseph nga pwede na magpauli ang Kampo sang Israel. Dapat nga tukuron sang mga Santos ang Sion paagi sa pagsunod sang mga kasuguan sang Dios. Nagpromisa Sia nga Iya “ipakig-away ang mga away sang Sion.”

Doktrina kag mga Kasugtanan 105:1–19; Saints, 1:204–5

Ang iban nga mga miyembro sang kampo nangakig sang mabatian nila ini. Nasubuan sila nga wala sila makatigayon nga makig-away para sa Sion. Abi sang iban nga mga tawo nga nagpalya ang Kampo sang Israel. Pero ang iban, pareho kay Brigham Young, Heber, kag Wilford, nagpasalamat sa tsansa nga makaupod si Propeta Joseph kag magtuon sa Iya.

Saints, 1:205–6

Wala madugayi, ginhambalan sang Ginuo si Joseph Smith nga magtawag sang Dose ka Apostoles para magbulig sa pagpamuno sa Iya Simbahan. Ang mga Apostoles amo ang mangin espesyal nga mga saksi sang ngalan ni Jesucristo sa bilog nga kalibutan. Walo sa Dose ka Apostoles nagmartsa sa Kampo sang Israel. Ang pagserbisyo upod kay Joseph nagbulig sa paghanda sa ila para sa sining importante nga tulumanon.

Doktrina kag mga Kasugtanan 18:26–27; 107:23; Saints, 1:214–17