Oktubre 1830–Pebrero 1831

Nakilala ni Newel kag Ann Whitney si Propeta Joseph

Ang mga pangamuyo nga may pagtuo ginasabat sang Ginuo

Si Ann kag Newel Whitney may tindahan sa Kirtland, Ohio. Wala magdako si Ann nga nagasimba ukon nagatuon parte sa Ginuo, pero gusto niya nga makilala Sia. Sang makasal sia kag si Newel, nangamuyo sila sing madamo nga a beses kag nangabay sa Ginuo nga giyahan sila.

Saints, 1:111–12

Isa ka gab-i samtang nagapangamuyo sila, nakakita si Ann kag Newel sang isa ka palanan-awon. Sa ila palanan-awon, may panganod nga nagatungtong sa ila balay. Napuno sila sang Espiritu sang Dios. Ginpalibutan sila sang panganod. Dayon nakabati sila sang tingug halin sa langit. Ginhambalan sila sini nga, “Maghanda kamo sa pagbaton sang pulong sang Ginuo, kay maabot na ini.”

Saints, 1:111

Sa kadugayan, nagkadto si Parley Pratt sa Kirtland. Sia kag ang iya mga upod nagtudlo sang ebanghelyo ni Jesucristo. Sang mabatian ni Ann ang ila ginatudlo, kahibalo sia nga matuod ini. Nagpauli sia para ibalita ini kay Newel. Wala madugayi ginbunyagan sila.

Saints, 1:112

Duha ka bulan ang nagligad, may lalaki kag babayi nga nagkadto sa tindahan ni Newel. Indi sila kilala ni Newel, pero ginkamusta sang tawo si Newel kag gintawag si Newel sa iya ngalan. Siling sang tawo, “Ako si Joseph nga propeta.” Ginpaathag niya nga ginasabat sang Ginuo ang mga pangamuyo ni Newel. Ginpadala Niya si Emma kag Joseph para makilala si Ann kag Newel.

Saints, 1:113

Kahibalo si Newel kag Ann nga mangin matuod ang ila palanan-awon. Ginpangabay nila si Joseph kag Emma nga mag-istar upod sa ila sa ila balay. Palangga ni Ann kag Newel si Jesus kag ang Iya ebanghelyo. Ginhatag nila ang tanan nga ara sa ila sa mga Santos kag sa Simbahan sang Manluluwas.

Doktrina kag mga Kasugtanan 38:23–27, 34–42; Saints, 1:114