40-р бүлэг
Лемен үндэстэн Самуел Есүс Христийн тухай өгүүлсэн нь
Лемен үндэстэн бошиглогч Самуел ёс бус нифайчуудад номлохоор Зарахемла руу явлаа. Тэр тэдэнд наманчил гэж хэлэв.
Нифайчууд Самуелийг хотоос хөөн гаргахад тэр өөрийн нутгийг зүглэн явж эхлэв.
Гэвч Их Эзэн Самуелд Зарахемла руу эргэж очин, зүрх сэтгэлд нь Их Эзэний хэлсэн зүйлүүдийг хүмүүст хэл гэж хэллээ.
Нифайчууд Самуелийг хот руу нэвтрүүлээгүй тул тэр хотын хэрэм өөд авиран гарч, тэндээс хүмүүст номлов.
Тэр нифайчуудыг нүглээ наманчилж, Есүс Христэд итгэлтэй болохгүй л юм бол 400 жилийн дотор устгагдах болно гэж бошиглов.
Есүс Христ таван жилийн дараа төрж, өөрт нь итгэсэн бүх хүнийг аврах болно гэж Самуел нифайчуудад хэлэв.
Самуел тэдэнд Есүсийн төрөлтийн тэмдгүүдийг хэлж өгсөн. Шинэ од үзэгдэж, Есүсийг төрөхийн өмнөх шөнө харанхуй болохгүй байв.
Самуел тэдэнд Есүсийг нас барах үед үзэгдэх тэмдгүүдийн талаар хэлэв. Гурван өдрийн турш гүн харанхуй нөмөрч, нар, сар, одод гэрэлтэхгүй гэв.
Мөн газар хөдөлж, аянга бууж, цахилгаан цахих болно. Уулс нурж, олон хот сүйрнэ.
Зарим нифай хүн Самуелд итгэж, нүглээ наманчлав. Тэд өөрсдөд нь баптисм хүртээж чадах, зөв шударга нифай үндэстэн болох Нифайг олохоор явлаа.
Үлдсэн хэсэг нь Самуелд итгэсэнгүй. Тэд түүн рүү чулуу шидэж, нум сумаар харвав. Гэвч Их Эзэн түүнийг хамгаалсан тул чулуу, сумны аль нь ч түүнийг оносонгүй.
Түүнийг суманд оногдохгүй байгааг хараад улам олон хүн түүнд итгэж, баптисм хүртэхээр Нифай руу явлаа.
Нифай мөн хүмүүст Есүсийн тухай заав. Тэрээр тэднийг Есүст итгэж, наманчлан, баптисм хүртээсэй гэж хүсэж байв.
Гэвч ихэнх нифайчууд Самуелд итгэсэнгүй. Тэд түүнийг баривчлахыг оролдов.
Самуел хэрэмнээс үсрэн бууж, нутаг руугаа зугтав.
Самуел леменчүүдэд зааж эхлэв. Түүний тухай нифайчууд дахин сураг сонссонгүй.