15-р бүлэг
Алма хүмүүст зааж, баптисм хүртээв
Алма Ноа хааны зарц нараас зугтаж, олон хоног нуугджээ. Нуугдаж байхдаа тэрээр бошиглогч Абинадайн заасан зүйлсийг бичиж тэмдэглэсэн.
Алма нүглээ наманчлаад, нифайчууд дээр нууцаар очиж, тэдэнд Абинадайн захиасыг заав. Алма хүмүүст Есүс Христэд итгэж, наманчил гэж хэлсэн.
Алма өдрийн турш Мормоны ус гэдэг нэртэй цөөрмийн ойролцоо шугуйд нуугддаг байсан.
Алмагийн үгэнд итгэсэн хүмүүс Мормоны ус руу очиж, баптисм хүртэв. Алма Христийн Сүмд 204 хүнийг элсүүлэн, баптисм хүртээсэн.
Алма хүмүүст заах пристүүдийг томилов. Тэр Есүс Христэд итгэх итгэл, наманчлалын тухай заа хэмээн пристүүдэд хэлэв. Мөн тэднийг хоорондоо маргалдаж болохгүй, нэгдмэл байх ёстой гэж хэлжээ.
Алмагийн хүмүүс нэг нэгнээ хайрлан, бие биедээ үйлчилдэг байв. Тэд байгаа бүх зүйлээ хуваалцаж, өөрсдийн Гэтэлгэгч, Есүс Христийн тухай сурч авсандаа талархаж байлаа.
Алмаг хүмүүст зааж байгааг Хаан Ноагийн зарц нар харчихжээ. Алма нифайчуудыг өөрийнх нь эсрэг босгож байна гэж хаан хэлээд, түүнийг алуулахаар цэргүүдээ илгээв.
Хаан Ноагийн цэргүүд ирж байна гэж Бурхан Алмад сэрэмжлүүлжээ. Хүмүүс гэр бүл, мал сүрэг, бусад эд юмаа аваад, аглаг буйд руу зугтсан.
Бурхан Алмагийн хүмүүсийг Хаан Ноагийн цэргүүдээс зугтаалгахын тулд тэдэнд хүч тэнхээг өгөв. Цэргүүд тэднийг эрж хайсан боловч олсонгүй.
Аглаг буйдад найман өдөр аялсны эцэст Алмагийн хүмүүс цэвэр ус урссан нэгэн сайхан нутагт ирэв. Тэнд тэд үр тариа тарьж, байшин барилга барьсан.
Хүмүүс Алмаг хаанаа болгохыг хүссэн ч Бурхан тэднийг хаантай байлгахыг хүсэхгүй байгаа гэж Алма хэлэв. Бурхан тэднийг эрх чөлөөтэй байлгахыг хүсэж байв.