30-р бүлэг
Алма хөвгүүддээ зөвлөсөн нь
Нифайчуудыг ямар их ёсон бус болсныг харахад Алмад гунигтай байлаа. Тэр хөвгүүн бүрдээ зөв шударга амьдрах тухай ярив.
Алма том хүү Хиламандаа Бурханд найдах тухай ярив. Тэр Сүмийг устгах оролдлогоо зогсоо гэж Алмад хэлүүлэхээр явуулсан Бурханы тэнгэр элчийн тухай хүүдээ хэлсэн.
Алма гэм нүглээсээ болж гурван өдрийн турш зовж шаналсан. Дараа нь тэр аавынхаа Есүсийн тухай заасан зүйлүүдийг санаж, гэм нүглээсээ өршөөгдөж болно гэдгээ мэдэв.
Алма өршөөл гуйн залбирч, бодгаль дахь зовлон шаналал нь баяр баяслаар солигдов. Тэр Есүс Христэд итгэж, нүглээ наманчилсан учраас өршөөл хүртсэн байлаа.
Үүнээс хойш Алма өөрийн мэдэрсэнтэй адил баяр баяслыг хүмүүст мэдрүүлэхийн тулд сайн мэдээг зааж байсан. Бурхан Алмаг Өөрт нь итгэсний төлөө адислав.
Алма Хиламанд ариун нандин цэдгүүдийг өгч, ард түмнийхээ түүхийг үргэлжлүүлэн бич гэж хэлжээ.
Хэрэв тэр Бурханы зарлигуудыг дагавал Бурхан түүнийг адисалж, цэдгүүдийг хамгаалахад тусална гэж Алма түүнд хэлэв.
Алма мөн өглөө, орой бүр залбирч, хийж байгаа бүх зүйлийнхээ тухай Бурхантай зөвлөлдсөнөөр Бурхан түүнд тусалж удирдах болно гэж Хиламанд хэлжээ.
Зорамчуудын дунд зоригтой номлосон хүү Шиблондоо Алма баяртай байв. Тэд түүн рүү чулуугаар шидсэн ч Шиблон итгэлтэй хэвээр үлдсэн билээ.
Аврагдах цорын ганц зам бол Есүс Христ юм гэдгийг Алма Шиблонд сануулав. Алма дараа нь хүүдээ сайн мэдээг үргэлжлүүлэн заахыг уриалав.
Алмагийн хүү Кориантон зарлигуудыг дагадаггүй байлаа. Тэр зорамчуудад зааж байхдаа итгэлтэй номлогч байсангүй.
Кориантоны хийсэн зүйлээс болж зорамчууд Алмагийн заасан сургаалд итгээгүй билээ.
Хүмүүс нүглээ Бурханаас нууж чаддаггүйг мөн Кориантоныг нүглээ наманчлах хэрэгтэй гэдгийг Алма Кориантонд хэжээ.
Хүн бүр амилуулагдах боловч зөвхөн зөв шударга хүмүүс л Бурхантай цуг амьдрах болно гэж Алма хүүдээ хэлэв.
Энэ амьдрал бол хүмүүсийн хувьд нүглээ наманчлан, Бурханд үйлчлэх цаг юм гэдгийг Алма хэллээ.
Тэр Кориантонд номлогчоор дуудагдсан гэдгийг нь сануулж, зорамчууд дээр эргэн очоод, хүмүүст наманчлахыг заа гэж хэлжээ.
Алма хөвгүүдийнхээ хамт сайн мэдээг үргэлжлүүлэн заасан. Тэд санваарын хүчээр заав.