Գլուխ 4
Արույրե թիթեղները
Արույրե թիթեղները շատ կարևոր գրառումներ էին պարունակում։ Նրանք պատմում էին Լեքիի նախահայրերի մասին և պարունակում էին Աստծո խոսքերը, որոնք Նա հայտնել էր մարգարեների միջոցով։
Լամանն ու Լեմուելը չկամեցան հետ դառնալ արույրե թիթեղների համար: Նրանք ասացին, որ դա շատ դժվար է։ Նրանք հավատ չունեին Տիրոջ հանդեպ։
Նեփին ցանկանում էր հնազանդվել Տիրոջը։ Նա գիտեր, որ Տերը կօգներ իրեն ու իր եղբայրներին Լաբանից վերցնել արույրե թիթեղները:
Լամանը, Լեմուելը, Սամն ու Նեփին վերադարձան Երուսաղեմ՝ արույրե թիթեղների հետևից։
Լամանը գնաց Լաբանի մոտ ու նրանից խնդրեց արույրե թիթեղները։
Լաբանը զայրացավ ու չկամեցավ Լամանին տալ արույրե թիթեղները։ Լաբանն ուզում էր սպանել Լամանին, բայց Լամանը փախուստի դիմեց։
Լամանն իր եղբայրներին պատմեց պատահածի մասին։ Նա վախեցած էր և ցանկանում էր վերադառնալ անապատ՝ իր հոր մոտ։
Նեփին ասաց, որ իրենք չեն կարող վերադառնալ առանց արույրե թիթեղների։ Նա ասաց իր եղբայրներին, որ ավելի շատ հավատ ունենան առ Տերը, և այդ ժամանակ կկարողանան վերցնել արույրե թիթեղները։
Նեփին և նրա եղբայրները գնացին Երուսաղեմի իրենց հին տունը և հավաքեցին իրենց ոսկիներն ու արծաթները, որպեսզի դրանք փոխանակեին թիթեղների հետ։
Նրանք ցույց տվեցին Լաբանին իրենց հարստությունները և առաջարկեցին փոխանակել դրանք թիթեղների հետ։ Երբ Լաբանը տեսավ նրանց ոսկին ու արծաթը, ցանկացավ վերցնել դրանք, իսկ նրանց դուրս հանեց։
Լաբանը կարգադրեց իր մարդկանց սպանել Լեքիի որդիներին։ Նեփին և նրա եղբայրները փախան ու թաքնվեցին քարայրում։ Լաբանը պահեց նրանց ոսկին ու արծաթը։
Լամանն ու Լեմուելը բարկացան Նեփիի վրա։ Նրանք փայտով ծեծեցին Նեփիին ու Սամին։
Մի հրեշտակ հայտնվեց Լամանի ու Լեմուելի առաջ ու ասաց նրանց, որ դադարեցնեն ծեծելը։ Նա ասաց, որ Տերը կօգնի նրանց վերցնել թիթեղները: Նա նաև ասաց, որ Նեփին պետք է դառնար իր եղբայրների առաջնորդը։
Նեփին հորդորեց իր եղբայրներին հավատալ Տիրոջը և չվախենալ Լաբանից ու նրա մարդկանցից։ Նեփին խրախուսեց իր եղբայրներին վերադառնալ Երուսաղեմ։
Այդ գիշեր Նեփիի եղբայրները թաքնվեցին քաղաքից դուրս՝ պարիսպի տակ, իսկ Նեփին գաղտագողի քաղաք մտավ։ Նա գնաց դեպի Լաբանի տունը։
Մոտենալով Լաբանի տանը, նա տեսավ գետնին պառկած մի հարբած մարդու։ Դա Լաբանն էր։
Նեփին տեսավ Լաբանի սուրը և վերցրեց այն։ Սուրբ Հոգին ասաց Նեփիին, որ սպանի Լաբանին, բայց Նեփին չէր ցանկանում սպանել նրան։
Սուրբ Հոգին կրկին ասաց Նեփիին, որ սպանի Լաբանին, որպեսզի կարողանա վերցնել արույրե թիթեղները։ Լեքիի ընտանիքը պետք է ստանար թիթեղները, որպեսզի կարողանար սովորել ավետարանը։
Նեփին հնազանդվեց Սուրբ Հոգուն և սպանեց Լաբանին։ Այնուհետև Նեփին հագավ Լաբանի հագուստը և վերցրեց զենքերը։
Նեփին գնաց Լաբանի տուն, որտեղ նրան հանդիպեց Զորամը՝ Լաբանի ծառան։ Նեփին իր տեսքով ու ձայնով նման էր Լաբանին։
Նա ասաց Զորամին, որ բերի արույրե թիթեղները: Զորամը կարծեց, թե Նեփին Լաբանն է, և նրան տվեց թիթեղները։ Նեփին հրամայեց Զորամին հետևել իրեն։
Լամանը, Լեմուելն ու Սամը տեսան մոտեցող Նեփիին ու վախեցան, կարծելով, թե Լաբանն է։ Նրանք սկսեցին փախչել, սակայն կանգ առան՝ լսելով Նեփիի ձայնը։
Այդ ժամանակ Զորամը հասկացավ, որ Նեփին Լաբանը չէ, և փորձեց փախչել։ Նեփին բռնեց Զորամին և խոստացավ, որ չի վնասի նրան, եթե իր հետ անապատ գա։
Զորամը համաձայնեց։ Նեփին ու նրա եղբայրները Զորամի ու արույրե թիթեղների հետ վերադարձան Լեքիի ու Սարիայի մոտ։
Նրանք արույրե թիթեղները տվեցին Լեքիին։ Լեքին և Սարիան ուրախ էին, որ իրենց որդիները ողջ էին։ Նրանք բոլորն ուրախանում էին և շնորհակալություն հայտնում Աստծուն։
Լեքին սկսեց կարդալ արույրե թիթեղները։ Գրառումները պատմում էին Ադամի ու Եվայի և աշխարհի ստեղծման մասին։ Դրանք պարունակում էին շատ մարգարեների խոսքերը։
Լեքին և Նեփին երջանիկ էին, որովհետև հնազանդվեցին Տիրոջը և կարողացան վերցնել արույրե թիթեղները։
Լեքիի ընտանիքը փաթեթավորեց արույրե թիթեղները, որպեսզի տաներ իր հետ և իրենց զավակներին ուսուցաներ թիթեղների վրա գրված պատվիրանները։