Dugang nga mga Kapanguhaan alang sa Pagtudlo sa mga Bata
Leksyon 24: Sundon Nako ang Propeta

24

Sundon Nako ang Propeta

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Ang usa ka propeta mao ang usa ka tawo nga gitawag sa Dios nga mamulong alang Kaniya. Ang mga propeta makadawat sa mga pulong sa Dios pinaagi sa pagpadayag ug dayon gimandoan sa pagsangyaw ngadto sa mga katawhan (tan-awa sa Amos 3:7; 1 Nephi 22:2; D&P 1:38; Giya ngadto sa mga Kasulatan, “Propeta,” 222). Bulahan kita nga gigiyahan sa buhi nga mga propeta. Sama sa mga propeta sa karaan, ang mga propeta karon nagpamatuod ni Jesukristo ug nagtudlo sa Iyang ebanghelyo. Ang ilang mga pagtulun-an mao ang hunahuna ug kabubut-on sa Ginoo.

Pagpangandam

Pagdala og litrato sa Presidente sa Simbahan karon, kon anaa.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Dula

Dapita ang mga bata sa pagdula sa “sunod sa lider” uban kanimo. Pagpili og usa ka bata nga molakaw, mopakpak, o mobuhat og laing aksyon. Sultihi ang ubang mga bata sa pagsunod sa unang bata, mobuhat unsa ang iyang gibuhat. Balika hangtud ang matag bata nga gustong makaapil nga maoy mahimong lider nakahimo na. Hangyoa ang mga bata sa pagsunod kanimo ngadto sa lugar nga himoan sa leksyon, ug palingkura sila.

Intruksyon sa Doktrina

Sultihi ang mga bata nga kita adunay espesyal nga lider nga sundon, ang atong propeta. Ipasabut nga ang usa ka propeta mao ang usa ka tawo nga nakigsulti sa Dios—ang Dios mosulti sa propeta unsay atong buhaton. Sultihi ang mga bata nga kon kita mosunod sa propeta, kita magmalipayon ug ang Langitnong Amahan mopanalangin kanato. Ipasabut nga ang pagsunod sa propeta nagpasabut sa pagbuhat sa mga butang nga iyang isulti kanato nga buhaton.

Mga Litrato

Ipakita ang mga litrato ni Joseph Smith 102. Isulti, “Kini mao si Propeta Joseph Smith. Ang Langitnong Amahan ug si Jesus nakigsulti ni Joseph Smith.” Itunol ang litrato nga gunitan sa usa ka bata. Sultihi ang mga bata sa usa ka butang nga gisulti ni Propeta Joseph Smitn nga atong buhaton, sama sa pagbasa sa mga kasulatan. Sultihi ang mga bata nga magpakaaron-ingnon nga magbasa sa mga kasulatan, ug dapita sila nga moingon, “Sunda ang propeta.” Pagtunol og laing litrato ngadto sa laing bata ug balika ang kalihokan, mag-aksyon sa laing butang nga gitudlo sa Propeta, sama sa pag-ampo, pagkaon og maayong pagkaon, ug uban pa. Human sa matag aksyon, ipasulti sa mga bata, “Sunda ang propeta.” Ipadayon hangtud ang matag bata nakahigayon sa paggunit sa litrato.

Imahe
Prophet Joseph Smith

Pagdala og litrato sa Presidente karon sa Simbahan, kon anaa. Sultihi ang mga bata sa iyang pangalan ug sa pipila ka mga butang nga iyang gitudlo nga atong buhaton. Ipasabut nga kon buhaton nato kining mga butanga, kita mapanalanginan.

Role Play

Dapita ang mga bata sa pag-aksyon sa mga pamaagi nga atong masunod ang propeta.

Kanta

Dapita ang mga bata sa pagmartsa libut sa kwarto uban kanimo samtang kamo manganta o mosulti sa mga pulong sa koro sa “Follow the Prophet” [Sunda ang Propeta] Children’s Songbook, 111 [Songbook sa mga Bata].

Sundon’g propeta, sundon’g propeta,

Sundon’g propeta, di makasaag.

Sundon’g propeta, sundon’g propeta,

Sundon’g propeta, nasayud s’ya.

Dapita ang mga bata sa pagkanta uban kanimo. Balika, motugot sa mga bata sa pagpuli-puli nga mangulo sa pagmartsa. Ipasabut nga ang pagbiya nagpasabut sa pagbuhat sa sayop nga mga butang.

Panapos

Sultihi ang mga bata nga kamo nasayud nga kon kita mosunod sa propeta, kita mapanalanginan. Ipasulti sa mga bata, “Ako mosunod sa propeta,” pipila ka mga pulong matag higayon.

Pag-ampo

Pagdapit og usa ka bata nga mohatag sa panapos nga pag-ampo.

Opsyonal nga mga Kalihokan

Pagpangandam

  • Alang sa kalihokan ginamit ang larawan ug dula nga tag-an tag-an: Kopyaha ug guntinga ang mga larawan sa pahina 103. Kolori kini kon gusto. Pil-a subay sa tuldok-tuldok nga mga linya aron makahimo og mobarug nga larawan.

    Imahe
    coloring page, prophets book

    Ako mosunod sa propeta.

    Si Daniel mitudlo kanato nga kita kinahanglang mag-ampo.

    Si Juan Bautista mitudlo kanato nga magpabunyag.

    Si Samuel ang Lamanite mitudlo kanato sa pagsunod sa Langitnong Amahan.

    Si Propeta Joseph Smith mitudlo kanato sa pagbasa sa mga kasulatan.

  • Alang sa kalihokan sa pagkolor: Kopyaha ug guntinga ang larawan nga anaa sa pahina 103 nga koloran sa matag bata.

Mga Hulagway

Sultihi ang mga bata nga kamo motabang kanila nga makat-on mahitungod sa pipila ka mga propeta kinsa nagpuyo kaniadto. Ibutang ang mobarug nga mga larawan diha sa salog o lamesa. Papulipuliha ang mga bata sa pagpili og usa ka hulagway. Sultihi ang mga bata sa pangalan sa propeta ug basaha ang kapsyon. Dapita ang mga bata sa pagsulti og usab sa importante nga pulong sa kapsyon, sama sa “pag-ampo,” “pagbunyag,” “pagsunod,” ug “mga kasulatan.” Balika hangtud ang matag bata nga gusto makaapil nakahimo na.

Dula nga Tag-an Tag-an

Patabuni sa mga bata ang ilang mga mata o patalikda samtang inyong ibutang ang mga larawan nga mobarug bisan asa sa kwarto. Siguroha nga sayon ra kining makit-an. Hangyoa ang mga bata sa pagpangita sa mga hulagway. Kon ila kining makit-an, ipadala nila kini sa lugar nga himoan sa leksyon. Sultihi ang mga bata sa pangalan sa propeta ug basaha ang kapsyon ngadto kanila. Kini nga kalihokan angay alang sa mas dagko nga mga bata.

Pagkolor

Pakolori sa mga bata ang kopya sa mga hulagway sa pahina 103. Kon mahuman na sila, pil-a subay sa tuldoktuldok nga mga linya aron makahimo og mobarug nga larawan aron ilang madala sa ilang mga balay. Kon kamo walay panahon sa paghimo sa mga hulagway diha sa klase sa nursery, hangyoa ang mga ginikanan sa mga bata sa pagdala niini sa ila.