25

Ako Nahisakop sa Ang Simbahan ni Jesukristo sa mga Santos sa Ulahing mga Adlaw

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Sa dihang si Jesukristo dinhi pa sa yuta, Iyang gitukod ang Iyang Simbahan. Human sa Pagkalansang ni Kristo ug sa kamatayon sa mga Apostoles, ang kahingpitan sa ebanghelyo nawala, ug ang tinuod nga Simbahan gikuha gikan sa yuta. Pinaagi ni Propeta Joseph Smith, ang kahingpitan sa ebanghelyo gipahiuli, ug ang tinuod nga Simbahan ni Jesukristo ania na usab sa yuta. (Tan-awa sa D&P 1:15–30; Joseph Smith—Kasaysayan 1:68–72.)

Pagpangandam

• Pagdala og kopya sa mga kasulatan. Markahi ang D&P 115:4 aron sayon ra nimo kini mapakli.

• Pagdala og litrato sa Presidente sa Simbahan karon, kon anaa.

Mga Kalihokan sa Pagkat-on

Sugdi pinaagi sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Litrato

Ipakita ang litrato sa pahina 106. Sultihi ang mga bata nga kini mao ang litrato ni Jesukristo ug kita nahisakop sa Iyang Simbahan. Itudlo ang litrato ug pangutana, “Kinsa kini?”

Tubag: “Jesukristo.”

Jesus Christ

Kasulatan

Sultihi ang mga bata nga si Jesus misulti kanato sa pangalan sa Simbahan diha sa mga kasulatan. Ablihi ang mga kasulatan ug basaha ang D&P 115:4: “Kay sa ingon ang akong Simbahan pagatawgon, bisan Ang Simbahan ni Jesukristo sa mga Santos sa Ulahing mga Adlaw.” Dapita ang mga bata sa pagsulti og usab sa pangalan sa Simbahan uban kanimo pipila ka pulong matag higayon.

Gunite ang imong kopya sa mga kasulatan. Sultihi ang mga bata nga si Jesus misulti kanato kon unsay Iyang gusto nga atong mahibaloan diha sa mga kasulatan ug nga sa Simbahan ni Jesukristo kita adunay mga kasulatan. Ipaabli sa mga bata ang ilang mga kamot ingon og nagbasa sa mga kasulatan. Dapita sila sa pagsulti “ang Simbahan ni Jesukristo.”

Ipasabut nga si Jesus namulong ngadto sa Iyang mga propeta ug nga sa Simbahan ni Jesukristo kita adunay mga propeta. Dapita ang mga bata sa pagsulti “ang Simbahan ni Jesukristo.” Pagdala og litrato sa Presidente karon sa Simbahan. Ipasabut nga siya ang atong propeta karon. Dapita ang mga bata sa pagsulti sa iyang pangalan uban kanimo.

Kanta

Dapita ang mga bata sa pagmartsa uban kanimo libut sa kwarto samtang inyong kantahon o isulti ang mosunod nga mga pulong sa “The Church of Jesus Christ” [Ang Simbahan ni Jesukristo] Children’s Songbook, 77 [Songbook sa mga Bata]

Nahisakop ko sa Ang Simbahan ni Jesukristo.

Nasayud ko sa plano sa Dios.

Motuo gyud ko

Ako Motuo ni Jesukristo.

Panapos

Sa laktud ipaambit ang imong pagpamatuod nga kita nahisakop sa tinuod nga Simbahan ni Jesukristo.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Mga Litrato: Sa pagtudlo sa mga litrato, sultihi og una ang mga bata kon unsa o kinsa ang anaa sa litrato. Itudlo ang mga detalye diha sa litrato aron makuha ang atensyon sa mga bata. Dapita sila sa pagsulti og usab sa usa o duha ka pulong dungan kanimo. Samtang ang mga bata makadungog ug mosulti niini nga mga pulong samtang magtanaw sa litrato, nagsugod sila sa pagkat-on sa bokabularyo sa ebanghelyo.

Paglihok: Ang mga bata sa nursery aktibo kaayo. Gamita ang mga kalihokan nga adunay pagpamakmak, pagmartsa, ug paglakaw aron ang mga bata magpadayon sa pag-apil.

Opsyonal nga mga Kalihokan

Pagpangandam

• Alang sa kalihokan sa pagkolor ug sa dula nga pares-pares: Kopyaha ang mga larawan sa pahina 107 nga koloran sa matag bata. Pagdala og mga piraso sa papel o butang nga susama nga gamiton sa mga bata isip mga marker alang sa matching game, pagdala og igo alang sa matag bata nga adunay dili mominos sa tulo ka mga marker.

  coloring page, the Church of Jesus Christ

  Ako nahisakop sa Ang Simbahan ni Jesukristo sa mga Santos sa Ulahing mga Adlaw

  Ang Simbahan ni Jesukristo adunay mga propeta.

  Ang Simbahan ni Jesukristo adunay mga kasulatan.

Pagkolor

Pakolori sa mga bata ang kopya sa pahina 107. Samtang ang mga bata nagkolor, ribyuha ang mga baruganan nga gitudlo sa leksyon. Itudlo ang mga detalye diha sa mga litrato, ug ipasabut ngadto sa mga bata unsay ilang gikoloran. Basaha ang mga pulong nga anaa sa larawan ngadto kanila.

Dula nga Pagpares-Pares

Hatagi ang matag bata og tulo ka piraso sa papel. Ipakita ang larawan sa pahina 107. Itudlo ang drowing ni Jesus ug isulti, “Kini mao ang litrato ni Jesukristo. Kita nahisakop sa Iyang Simbahan.” Dapita ang mga bata sa pagbutang og piraso sa papel diha sa litrato ni Jesus sa ilang mga kopya.

Dayon itudlo ang litrato sa propeta ug basaha ang kapsyon. Ipasulti sa mga bata ang “propeta” ug pabutangi og piraso sa papel ang ilang drowing. Balika alang sa drowing sa mga kasulatan. Dayon ipasulti sa mga bata uban kanimo, “Ako nahisakop sa Ang Simbahan ni Jesukristo sa mga Santos sa Ulahing mga Adlaw,” pipila ka mga pulong matag higayon.

Ribyu

Pagpili og kalihokan gikan sa leksyon 23 ug ang usa gikan sa leksyon 24 aron sa pagtabang sa mga bata nga makaribyu unsay ilang nakat-unan mahitungod sa mga kasulatan ug mga propeta. Human makahimo niini nga mga kalihokan, pahinumdumi ang mga bata nga sa Simbahan ni Jesukristo kita adunay mga kasulatan ug mga propeta.

Mga Tip sa Pagtudlo

Pagkolor: Dili ang tanang mga bata malingaw sa pagkolor. Ang uban tingali mohimo lamang og usa o duha ka marka sa pahina. Ang katuyoan sa mga kalihokan sa pagkolor niini nga mga leksyon mao ang paghatag sa mga bata og biswal nga pagpakita sa leksyon nga ilang magunitan ug madala sa ilaha. Importante nga ilang tarungon pagkolor ang larawan.

Ribyu: Ang mga bata makaton gikan sa pagbalik-balik. Balika ang mga istorya o ubang mga kalihokan nga diin sila malingaw. Mahimo nimo kini bisan unsang higayona panahon sa klase sa nursery, sama sa panahon sa pag-snack o samtang ang mga bata naghulat sa ilang mga ginikanan.