15

Ako Magmapasalamaton

Pasiuna alang sa Magtutudlo

Aron sa pag-andam sa imong kaugalingon nga espiritwal nga motudlo niini nga leksyon, palihug basaha ug palandonga ang mosunod:

Ang Ginoo misugo, “Kamo mopasalamat sa Ginoo nga inyong Dios sa tanan nga mga butang” (D&P 59:7). Kinahanglang mopasalamat kita ngadto sa Dios sa daghang mga panalangin nga Iyang gihatag kanato. Kinahanglang magpasalamat usab kita ngadto sa mga ginikanan, mga titser, mga higala, ug sa uban kinsa mitabang kanato sa bisan unsa nga paagi. (Tan-awa usab sa Salmo 100:3–4.)

Pagpangandam

• Basaha ang Lucas 17:11–19, ug pag-andam sa pagtingob sa istorya sa 10 ka mga sanglahon.

• Pagdala og kopya sa Biblia. Markahi ang Lucas 17:11–19 aron sayon ra nimo kini nga mapakli.

Mga Kalihokan sa Pagkat-on

Sugdi pinaagi sa sa kalihokan sa panagpundok. Alang sa mga ideya, tan-awa sa pahina 3.

Pag-ampo

Pagdapit og usa ka bata nga mohatag sa pangbukas nga pag-ampo.

Instruksyon sa Doktrina

Sultihi ang mga bata nga ang Langitnong Amahan mihatag kanato og daghang mga panalangin, sama sa atong mga lawas, mga tanom ug mga hayop, sa atong mga pamilya, ug sa Simbahan. Ipasabut nga atong mapakita ang atong gugma alang Kaniya pinaagi sa pagsulti og “salamat kanimo” ug nga kita usab makaingon “salamat kanimo” sa among pamilya ug mga higala ug ni bisan kinsa nga nakahimo og kaayohan alang kanato.

Istorya sa Kasulatan

Ipakita ang litrato sa pahina 66. Itudlo si Jesus ug ang mga tawo nga masakiton. Ablihi ang Biblia sa Lucas 17:11–19 ug isaysay ang istorya sa 10 ka mga sanglahon. Sa ubos mao ang usa ka ehemplo:

Dihay 10 ka mga tawo nga masakiton. Giayo sila ni Jesus ug mihimo kanila nga mahimsog (itudlo si Jesus sa litrato). Silang tanan malipayon kaayo (itudlo ang mga sanglahon diha sa litrato). Apan usa lamang ka tawo ang miingon og “salamat” ngadto ni Jesus (itudlo ang mapasalamaton nga sanglahon diha sa litrato). Makasulti kita og “salamat” (dapita ang mga bata nga mosulti og “salamat”).

Jesus with grateful leper

Litrato

Ipakita ang larawan sa pahina 67. Sultihi ang mga bata nga kita mopakita sa atong gugma sa Langitnong Amahan pinaagi sa pagpasalamat Kaniya alang sa tanang mga butang nga Iyang gihatag kanato. Itudlo ang usa sa mga larawan ug dapita ang mga bata sa paghimo og aksyon kalabut niana nga aytem (sama sa pagpataas sa kamot ibabaw sa ilang mga ulo aron maghimo og atop sa usa ka balay, magpakaaron-ingnon nga mamu-po og prutas sa kahoy ug kan-on kini, magpakaaron-ingnon nga magsul-ob og sapatos, ug uban pa). Balika alang sa matag larawan.

coloring page, I Am Thankful

Mapasalamaton ako sa akong pamilya.

Mapasalamaton ako sa akong mga sinina.

Mapasalamaton ako sa akong panimalay.

Mapasalamaton ako sa pagkaon nga gikaon.

Kanta

Kantaha o isulti ang mga pulong sa mga bersikulo 1 ug 2 sa “Thanks to Our Father” [Salamat sa Atong Amahan] Children’s Songbook, 20 [Songbook sa mga Bata] ug buhata ang mga aksyon sa ubos. Dapita ang mga bata sa pag-apil kanimo.

Salamat sa Amahan maoy among halad, (ikyugpos ang mga bukton)

Kay tanang mga butang Iyang gihatag. (ilugway ang mga bukton)

Kamot ug tiil, mata ug ang dalunggan (itudlo ang mga mata, mga dalunggan, ug mga tiil)

Sinina nga isul-ob, (itudlo ang mga sinina) mga pagkaon (pagpakaaron- ingnon nga nagkaon)

Panapos

Hangyoa ang mga bata sa pagsulti og “salamat.” Sa daklit ipakigbahin ang imong mga pagbati sa pagpasalamat alang sa Langitnong Amahan ug ni Jesukristo.

Pag-ampo

Pagdapit og usa ka bata nga mohatag sa panapos nga pag-ampo.

Mga Tip sa Pagtudlo

Mga Kalihokan sa Panagpundok: Ang mga bata dili kuyawan kon adunay naandang mga buluhaton ug pamilyar nga pag-usab-usab sa usa ka kalihokan ngadto sa lain. Makatabang kini kanila nga maminaw ug moapil.

Mga Istorya: Pagmabination sa abilidad sa mga bata sa pagsabut. Likaye ang pagbinata o mga pulong nga lisud kaayo. Pananglit, gamita ang “mga tawo nga masakiton kaayo” imbis “mga sanglahon.”

Opsyonal nga mga Kalihokan

Pagpangandam

• Alang sa mga kalihokan ginamit ang litrato: Pagdala og mga litrato sa mga butang nga ikaw mapasalamaton, mahimo nimong gamiton ang mga litrato niini nga manwal o sa mga magasin sa Simbahan, o mahimo kang mag-drowing og imoha.

• Alang sa kalihokan sa pagkolor ug sa dula sa pagpares-pares: Kopyaha ang mga larawan sa pahina 67 nga koloran sa matag bata. Pagdala og mga piraso sa papel o butang nga susama nga gamiton sa mga bata isip mga marker alang sa matching game, pagdala og igo alang sa matag bata nga adunay dili mominos upat ka mga marker.

Mga Balak o Kanta-Kanta nga Kalihokan

Sultihi ang mga bata nga kita mapasalamaton sa Langitnong Amahan sa atong mga lawas. Dapita ang mga bata nga mobarug ug mobuhat sa mosunod nga mga balak o kanta-kanta nga kalihokan uban kaninyo. Paghimo-himo og mga aksyon nga gisugyot sa mga pulong.

Hikapa ang imong mga mata, hikapa ang imong ilong,

Hikapa ang imong mga dunggan, hikapa ang imong mga tudlo sa tiil.

Ipataas pag-ayo ang inyong mga kamot,

Mas taas pa, ngadto sa panganud.

Ibutang ang mga kamot sa inyong buhok.

Lingkod sa hilom sa inyong lingkuranan.

Itudlo ang inyong ba-ba ug sulti, “Mapasalamaton ako sa akong ba-ba.” Ipasulti pag-usab sa mga bata ang mga pulong ug ang aksyon. Balika alang sa mga mata, ilong, mga dalunggan, mga kamot, ug mga tiil. Dapita ang mga bata sa pagsugyot og mga butang nga sila mapasalamaton, ug balika pagsulti ang mga butang nga ilang gihisgutan.

Mga Litrato

Ipakita sa mga bata ang mga litrato nga imong gidala ug ipasabut sa lakbit ngano nga ikaw mapasalamaton niining mga butanga. Dapita ang mga bata sa paghingalan og butang nga sila mapasalamaton.

Pagkolor

Pakolori sa mga bata ang kopya sa pahina 67. Samtang sila nagkolor, itudlo ang mga detalye diha sa mga litrato ug ipasabut ngadto sa mga bata unsay ilang gikoloran. Basaha ang mga pulong nga anaa sa larawan ngadto kanila.

Dula nga Pagpares-Pares [Matching Game]

Hatagi ang matag bata og upat ka gagmayng piraso sa papel. Ipakita ang mga larawan nga anaa sa pahina 67, itudlo ang larawan sa pamilya, ug basaha ang kapsyon ngadto sa mga bata. Dapita ang mga bata sa pagbutang og piraso sa papel diha sa pamilya sa ilang kaugalingong kopya. Dapita sila sa pagsulti og usab sa pulong nga anaa diha sa larawan dungan kanimo. Balika kini nga kalihokan alang sa ubang mga larawan.

Mga Tip sa Pagtudlo

Gagmay nga mga bata dili tingali molahutay sa tibuok leksyon. Hinoon, uban sa gugma ug pag-awhag, ikaw makatudlo kanila sa pagsunod unsay imong gibuhat. Tabangi sila nga mosulti “salamat” sa tukmang higayon. Ang imong ehemplo maoy imong labing importante nga himan sa pagtudlo. Ang mga bata makakat-on og mga kinaiya, pamatasan, ug pinulongan sa pag-obserbar kanimo. (Tan-awa sa Pagtudlo, Walay Labaw ka Mahinungdanon nga Tawag, 109.)

Pagbalik-balik makatabang sa mga bata nga makat-on, ug kini makalingaw kanila. Gusto silang makadungog og mga butang nga balik-balikon. Makat-unan nila ang mubo nga mga pulong nga mabalikbalik ug matag-anan.