Dugang nga mga Kapanguhaan alang sa Pagtudlo sa mga Bata
Pasiuna

Pasiuna

Ang Klase sa Nursery

Katuyoan

Ang katuyoan sa klase sa nursery mao ang pagtabang sa mga bata nga makat-on sa gipahiuli nga ebanghelyo ni Jesukristo ug mosunod niini. Ang klase sa nursery kinahanglan nga motabang sa mga bata nga madugangan ang ilang panabut ug gugma alang sa Langitnong Amahan ug ni Jesukristo, magbaton og positibo nga mga kasinatian diha sa palibut sa Simbahan, ug motubo diha sa pagbati sa kaugalingong katakus.

Sulat ngadto sa mga Ginikanan

Pipila ka mga semana sa dili pa magsugod ang bata sa pagtambong sa klase sa nursery, kinahanglan nga usa ka miyembro sa kapangulohan sa Primary mohatag sa mga ginikanan sa bata og kopya sa sulat diha sa pahina 7.

Mga Lider sa Nursery

Dili mominos sa duha ka mga tawo (usa ka lider sa nursery ug usa ka luyo-luyo nga lider sa nursery) kinahanglan nga tawagon alang sa kada klase sa nursery. Kon ang mga lider sa nursery dili bana ug asawa, kinahanglan nga sila pareha og gender. Ang mga lider sa nursery kinahanglan nga magtambayayong sa pagtrabaho atol sa tibuok klase sa nursery aron sa pagsiguro sa kaluwasan ug pagkabutang sa mga bata.

Pisikal nga Kahimtang

Ang klase sa nursery kinahanglan nga mosangkap og usa ka mahigugmaon, luwas, organisado nga kasinatian sa pagkat-on alang sa mga bata. Ang mga kwarto kinahanglan nga limpyo, masadyaon, ug madanihon ug nahimutang duol sa kasilyas kon mahimo. Ang mga dulaan kinahanglan nga limpyo, luwas, ug maayo og kondisyon. Ang mga ekipo sa pagkatkat kinahanglan nga dili gamiton.

Iskedyul

Ang klase sa nursery sa kasagaran molungtad sa tibuok panahon nga giiskedyul alang sa Primary. Kini nga panahon kinahanglan nga bulagon ngadto sa pipila ka mga bahin, sama sa panahon sa leksyon, panahon sa snack, panahon sa musika, ug panahon sa pagdula.

Ang mga panginahanglan sa mga bata makatabang kaninyo sa pagdesisyon pinaagi sa han-ay sa mga pagbahin ug sa gidugayon sa kada bahin. Ang mga bata mas ganahan nga motubag kon imong balik-balikon ang leksyon, mao nga sunda ang sama nga han-ay kada semana.

  • Leksyon: Sugdi ug tapusa ang leksyon sa untop nga panahon uban sa pag-ampo, nga kinahanglan sa kasagaran ihatag sa usa sa mga bata (uban sa panabang sa usa sa mga lider sa nursery kon gikinahanglan). Panahon sa leksyon, ipakita ang bisan unsa o tanang mga kalihokan gikan sa usa ka leksyon niini nga manwal. Mahimo nga ibalik nimo kini nga mga kalihokan sa tibuok klase sa nursery. Uban nga mga kapanguhaan nga gihimo sa Simbahan, sama sa Children’s Songbook [Songbook sa mga Bata] ug mga magasin sa Simbahan makatabang usab.

  • Dula: Padulaa lang ang mga bata sa mga dulaan, mga puzzle, ug mga libro. Ang mga bata makat-on pinaagi sa pagdula. Human sa panahon sa pagdula, tabangi ang mga bata sa paghipos sa mga butang.

  • Snack: Panghatag og masustansyang snack nga sayon ra nga manihoon. Pangutan-a ang mga ginikanan kon aduna bay bisan unsa nga mga pagkaon nga dili nila gustong ipakaon sa ilang mga anak. Tabangi ang mga bata sa paghugas sa ilang mga kamot ug mohangyo og panalangin sa pagkaon sa dili pa sila mokaon. Ang kwarta alang sa mga snack kinahanglan nga gikan sa badyet sa Primary.

  • Musika: Pag-awit og mga kanta, duyugi sa simple nga mga instrumento sa musika, o maglihok o magmartsa nga musika (tan-awa sa “Musika sa Klase sa Nursery,” sa pahina 4). Kini nga bahin sa klase sa nursery mahimo nga parte sa panahon sa leksyon, o mahimo kini nga nahimulag nga bahin nga gipahinungod sa musika.

Pagkahuman sa klase sa nursery, ang mga magtutudlo kinahanglan nga mosiguro nga kuhaon ang mga bata sa ila lamang nga mga ginikanan o ubang mga miyembro sa ilang suod nga pamilya. Kinahanglan nga dili nila tugutan ang bisan kinsa nga mokuha sa mga bata gawas kon ang mga ginikanan mihatag sa ilang pagtugot.

Mga Pagbalhin

Hatagi ang mga bata og buluhaton nga makatabang kanila nga makabalhin gikan sa usa ka bahin ngadto sa uban. Sama pananglit, makakanta ikaw og awit sama sa “Fun to Do” [Makalingaw nga Buhaton] Children’s Songbook, 253 [Songbook sa mga Bata], paggamit sa mga pulong sama sa, “Pagpunit sa mga dulaan makalingaw nga buhaton” o “Paghugas sa atong mga kamot makalingaw nga buhaton,” ug uban pa.

Mahitungod sa mga Leksyon Niini nga Manwal

Ang katuyoan sa mga leksyon niini nga manwal mao ang pagtabang sa mga bata nga nursery pa ang edad nga makat-on sa sukaranan nga mga doktrina sa gipahiuli nga ebanghelyo ni Jesukristo. Pagampo alang sa giya ug tinguhaa ang impluwensya sa Espiritu samtang ikaw mangandam sa pagtudlo niini nga mga leksyon (tan-awa sa Pagtudlo, Walay Labaw ka Mahinungdanon nga Tawag, 97–99). Ikaw makahimo sa pagtudlo kanila sa bisan unsa nga han-ay, ug ikaw makahimo sa pagtudlo og parehas nga leksyon sa magsunodsunod nga mga semana. Makahimo usab ikaw sa pagtudlo og parehas nga leksyon makaduha sulod sa usa ka klase sa nursery, mag-agad sa mga panginahanglan ug mga interes sa mga bata.

Paggamit lamang og mga kapanguhaan nga gihimo sa Simbahan diha sa klase sa nursery. Agig dugang sa mga kalihokan niini nga manwal, makahimo ikaw sa paggamit og mga dula, mga litrato, mga kanta, mga istorya, ug ubang mga kalihokan gikan sa mga magasin sa Simbahan.

Gamit sa mga kasulatan samtang ikaw magtudlo sa mga bata. Kon ang leksyon nagsugyot nga moasoy ikaw og istorya gikan sa mga kasulatan, pag-abli og mga kasulatan ug itudlo ang dapit diin ang istorya makit-an. Makatabang kini sa mga bata nga makasabut nga ang imong gitudlo naggagikan sa mga kasulatan. Tudloi sila sa pagpasalamat ug mohatag og balaan nga pagtahud sa mga kasulatan. Kon ikaw walay kaugalingon nga kopya sa mga kasulatan, pangutana sa imong bishop o presidente sa branch kon unsaon nimo nga makakuha og kopya.

Samtang ikaw nagtudlo niini nga mga leksyon, pagmabination sa mga sitwasyon sa panimalay ug pamilya sa mga bata. Kon ang leksyon nagpasabut sa mga ginikanan sa mga bata o mga pamilya, hunahunaa ang mga balatian ni bisan kinsa nga mga bata nga kinsa gipadako sa usa ka ginikanan lamang, sa mga apohan, o sa ubang mga miyembro sa pamilya.

Pagmabination ngadto sa mga balatian ni bisan kinsa nga mga bata sa imong nursery nga kinsa adunay pisikal nga mga kakulangan. Hatagi og pagtagad ang mga butang nga mahimong buhaton sa mga bata, dili ang unsay dili nila mahimo. Alang sa dugang nga kasayuran mahitungod sa pagtudlo niadtong adunay mga kakulangan, tan-awa sa Pagtudlo, Walay Labaw ka Mahinungdanon nga Tawag, 38–39.

Ang pinakamahinungdanong bahin sa mga leksyon mao ang gihulagway sa ubos:

Pasiuna alang sa Magtutudlo:

Ang kada leksyon magsugod uban sa mubo nga pagpasabut sa doktrina nga itudlo, lakip na ang mga kapanguhaan sa kasulatan. Ang pagbasa ug pagpamalandong niini nga pasiuna ug ang may kalabutan nga mga kasulatan makatabang kanimo nga makaandam sa imong kaugalingon aron espiritwal ang pagtudlo sa doktrina ngadto sa mga bata pinaagi sa Espiritu. Dili katuyoan niini nga kining pasiuna pagabasahon ngadto sa mga bata sa nursery.

Mga Kalihokan sa Pagkat-on

Ang katuyoan sa mga kalihokan sa pagkat-on mao ang pagtudlo sa mga bata sa ebanghelyo pinaagi sa paghatag kanila og mga kahigayunan sa:

  • Pagpaminaw mahitungod sa doktrina.

  • Pagtan-aw sa biswal nga may kalabutan sa doktrina.

  • Pagkanta (o pagpaminaw sa usa ka awit) mahitungod sa doktrina.

  • Pagbuhat og pisikal nga kalihokan nga may kalabutan sa doktrina.

  • Pagsulti og usa ka butang mahitungod sa doktrina.

Pag-andam og usa ka espesyal nga dapit sa kwarto sa nursery diin mahimo nimong pundokon ang mga bata nga duol kanimo alang sa mga kalihokan sa pagkat-on. Mahimo kini ginamit ang usa ka habol o banig diha sa salog, o diha sa mga lingkuranan nga giporma og lingin. Lingkod o luhod aron ikaw maduol sa mga bata ug matupong sa ilang mga mata. (Pahimangno: Palihug pagsul-ob og angay nga sinina alang sa pagluhod, paglingkod sa salog, ug pagtuwad.)

Imahe
nursery leader teaching

Kalihokan sa Panagpundok: Sugdi ang kada leksyon pinaagi sa pagpundok sa mga bata uban sa gitugotan sa Simbahan nga kanta o uban nga kalihokan. Sa imong paggamit sa mao gihapon nga kalihokan sa panagpundok, ang mga bata makaila sa kalihokan isip usa ka timaan nga ang panahon sa leksyon magsugod na, ug makatabang kini kanila nga mangandam alang sa leksyon. Ang kalihokan sa panagpundok mahimo nga simple sama sa pagpakpak sa imong mga kamot sa pinakompas nga paagi ug modapit sa mga bata sa pagpakpak uban kanimo. Hapit tanan nga bisan unsang gitugotan sa Simbahan nga awit o kalihokan mahimo kon kini simple ug kanunay kini nimo nga gamiton kada semana.

Aniay pipila sa ubang mga ehemplo sa mga kalihokan sa panagpundok:

  • Ang pagpanganta makalingaw sa mga bata, sama sa “I am a child of God” [Ako Anak sa Dios] Children’s Songbook, 2–3 [Songbook sa mga Bata] o “Love One Another” [Maghigugmaay] Children’s Songbook, 136 [Songbook sa mga Bata]:

  • Kantaha ang “If You’re Happy” [Kon Ikaw Malipayon] Children’s Songbook, 266 [Songbook sa mga Bata, ], ginamit ang mosunod nga mga pulong:

    Kon kamo andam na, manglingkod na.

    Kon kamo andam na, manglingkod na.

    Kon kamo maminaw, panalangin moabut.

    Kon kamo andam na, panglingkod na.

  • I-recite ang mosunod nga balak o kanta-kanta nga kalihokan, ug dapita ang mga bata sa paglihok uban kanimo:

    Nalipay ako nga nakasimba karon, (ihugpong ang mga tudlo aron moporma og usa ka tore)

    Aron mahibalo kabahin ni Jesus, magkanta, (ikumkom ang mga kamot palibut sa baba) ug mag-ampo. (ikyugpos ang mga bukton)

Opsyonal nga mga Kalihokan

Ang kada leksyon nagsugyot og 2 ngadto sa 4 ka opsyonal nga mga kalihokan nga mahimo nimong kapilian gikan sa dugang nga leksyon kon ganahan. Mahimo usab nga gamiton kini nga mga kalihokan sa laing higayon sulod sa klase sa nursery. Daghan niining mga kalihokan nagkinahanglan og dugang nga pagpangandam. Kon ang mga kagamitan alang niini nga mga kalihokan dili nimo magamit, mahimo nimong ilisan og sama nga mga kagamitan. Ang kwarta alang niini nga mga kagamitan mahimong makuha gikan sa badyet sa Primary.

Mga Biswal

Ang kada leksyon naglakip og duha ka mga pahina sa mga biswal: usa ka kinoloran nga litrato ug usa ka linya nga drowing. Ang katuyoan niini mao ang pagpakita nga malig-on ang mga baruganan nga gitudlo diha sa leksyon. Mga sugyot alang sa paggamit sa mga biswal gilakip niini nga mga leksyon.

Mga Tip sa Pagtudlo

Sa tuo nga bahin sa kada pahina mao ang mga sugyot ug mga ideya aron pagtabang kanimo nga magtudlo sa leksyon sa malampuson nga paagi. Pipila niini mga sugyot mahitungod sa pagpresentar og piho nga kalihokan, apan kadaghanan mao ang kinatibuk-an nga mga baruganan nga magamit sa bisan unsang higayon sa imong pagtudlo sa gagmay nga mga bata.

Musika Diha sa Klase sa Nursery

Mga bata nga nag-edad og nursery andam ug maikagon sa pagkat-on mahitungod sa Langitnong Amahan ug ni Jesukristo, ug ang musika makatabang kanila nga makat-on. Ang musika modapit sa Espiritu, ug makamugna kini og mainiton ug mahigugmaon nga kahimtang, nga naghimo sa klase sa nursery nga alegre.

Ayaw kabalaka kon ikaw walay talento sa pagkanta. Ang mga bata maminaw sa mga pulong, bantayi ang ekspresyon sa imong panagway, ug paglingaw sa honi kaysa magtagad sa imong abilidad sa pagkanta.

Mga Paagi sa Paggamit og Musika

Ang musika mahimong makahatag og nagkalainlaing mga katuyoan diha sa klase sa nursery. Mahimo nimo kining gamiton sa:

  • Pag-abi-abi sa mga bata. Sama pananglit, mahimo ikaw nga magbaton og ligdong nga pagpatukar sa musika samtang ang mga bata manulod sa nursery.

  • Pagtudlo sa mga baruganan sa ebanghelyo. Kadaghanan sa mga leksyon niini nga manwal nagsugyot og mga kanta nga may kalabutan sa hilisgutan sa leksyon.

  • Pagtabang sa mga bata nga mangandam sa pagsugod og lahi nga kalihokan—sama pananglit, paghimo og kahimtang nga may balaang pagtahud sa pagpangandam alang sa panahon sa leksyon.

  • Hatagi ang mga bata og higayon sa paglihok ug paglingaw sa ilang kaugalingon.

  • Paanara ang mga bata uban sa mga awit nga ilang kantahon sa Primary.

Pagtabang sa mga Bata nga Moapil

Tudloi ang mga bata og usa ka awit, pagkanta og mubo nga linya sulod sa pipila ka mga higayon ug dayon dapita sila pagkanta niini uban kanimo. Dayega sila sa ilang mga paninguha. Sa sinugdan mahimo nga mokanta sila og usa o duha ka pulong lamang, ug ang gagmay nga mga bata tingali dili gayud mokanta, apan mahimo gihapon sila nga makat-on ug malingaw nga maminaw kanimo magkanta. Mahimo usab sila nga malingaw sa pagbuhat og simple nga mga lihok nga moduyog uban sa mga awit. Sa katapusan makakat-on sila sa mga pulong ug mosugod sa pagkanta uban kanimo, ilabi na kon imong balikon ang mga awit.

Imahe
children singing

Ubang mga Kapanguhaan

Ang mga pulong sa daghang mga awit gilakip diha sa mga leksyon niini nga manwal. Makahimo usab ikaw sa paggamit sa:

  • Children’s Songbook [Songbook sa mga Bata] ug mga audio recording sa mga awit sa Primary. Simple nga mga awit ug nga adunay nagbalikbalik nga mga hugpong sa mga pulong mao ang pinakaangay alang sa mga bata nga nag-edad og nursery. Makahimo ikaw sa pagdugang og simple nga mga lihok nga gisugyot sa mga pulong.

  • Ang music Web site sa Simbahan, www.lds.org/churchmusic. Dinhi imong madungog ang musika sa mga awit diha sa Children’s Songbook [Songbook sa mga Bata] ug sa hymnbook.

  • Panabang gikan sa imong lider sa musika sa Primary.

Kalagmitan nga mga Problema ug Posible nga mga Solusyon

Ang mosunod mao ang pipila sa kasagaran nga mga problema nga mahimong mahinabo diha sa klase sa nursery ug pipila ka mga sugyot alang sa pagsulbad niini. Sa tanang mga sitwasyon, dayega sa kinasingkasing ang bata kon siya nagbinuotan gayud. Pagpugos sa mga bata sa pagsunod dili mao ang sulusyon sa mga problema sa pamatasan. Hinumdumi nga importante kini alang sa kada bata nga makabaton og mahigugmaon, makalingaw nga kasinatian diha sa klase sa nursery.

Problema

Posible Nga Solusyon

Usa ka ginikanan nagdala og bata ngadto sa klase sa nursery, ug ang bata mohilak sa diha nga ang ginikanan mosulay sa pagbiya.

Dapita ang ginikanan sa pagpabilin hangtud nga ang bata mokalma ug mahimutang na. Sulayi nga mainteresado ang bata sa kalihokan nga nahitabo diha sa klase sa nursery, ug dapita siya sa pag-apil.

Usa ka bata daw mahadlok kanimo o sa ubang mga bata, magsuroysuroy nga walay tumong palibut sa nursery o dili makigsulti sa bisan kinsa.

Magmapailubon; ayaw pugsa ang bata sa pag-apil. Hatagi siya og higayon nga makaila kanimo, sa ubang mga bata, ug sa palibut. Pasaliga panagsa ang bata, ug padayon sa pagdapit kaniya sa pag-apil sa kalihokan. Tabang sa pagpasabut nga ang klase sa nursery usa ka mahigugmaon, makalingaw nga kasinatian alang sa bata.

Ang bata mokapyot kanimo ug mangayo sa imong pagtagad pirme.

Gagmay nga mga bata nagkinahanglan og kainit ug pagtagad. Pagpakig-istorya ug pagpakig-uban sa bata sa mahigugmaon nga paagi sa kasagaran makatagbaw kaniya. Dayon dasiga ang bata nga moapil sa mga kalihokan sa nursery.

Usa ka bata dili magtinarung sa paglingkod ug sa pagpaminaw panahon sa leksyon. Siya makabalda o makapalagot sa ubang mga bata.

Usa ka lider sa nursery makahimo sa pagderikta sa pagtagad sa bata ngadto sa kalihokan samtang ang lain nga lider magdumala. Paghatag sa bata og usa ka butang nga kagunitan makatabang kaniya nga aktibong maapil sa leksyon. Mahimo nga palingkuron nimo ang bata uban sa ikaduhang magtutudlo aron matugotan ang ubang mga bata nga makabaton og luwas, mabungahong kasinatian sa leksyon. Hinumdumi kanunay sa pagpakig-uban sa mga bata sa mahigugmaon, mabuligon nga paagi.

Usa ka bata mobarug ug mobiya sa dili pa mahuman ang kalihokan.

Pagmabinantayon ug pagmatngon sa mga panginahanglan, mga kaikag, ug lugway sa pagtagad sa bata. Paniid og timailhan kon kanus-a dili siya mahimutang aron makahimo ikaw sa pagpahimutang sa kalihokan nga haum sa mga panginahanglan sa bata. Samtang ang usa ka magtutudlo nagdumala sa kalihokan, ang lain nga magtutudlo mahimo nga moawhag ug modasig sa bata nga nawad-an og interes. Ayaw pugsa ang bata sa pag-apil sa bisan unsang kalihokan.

Ang mga bata nagsugod og away tungod sa usa ka dulaan.

Ang batan-ong mga bata maglisud sa pagpakig-ambit. Mahimo nga manginlabut ka aron pagtabang kanila nga masulbad ang problema o pagpugong kanila nga makasakit sa usag usa. Pagsugyot og mga paagi nga makahimo silang duha sa pagdula sa mga dulaan, o itunong ang ilang pagtagad ngadto sa ubang mga dulaan ug mga kalihokan. Pagsiguro nga adunay igong dulaan alang sa kada bata. Dayga ang mga bata tungod sa hapsay nga pagdula.

Usa ka bata nagsugod sa binagis nga pagdula—nanglabay, nanglabyog, o nangdukdok sa mga dulaan.

Kinahanglan nga pugngan nimo kini nga pamatasan. Ang klase sa nursery kinahanglan nga mahimong usa ka luwas nga palibut alang sa mga bata. Sa mahigugmaong paagi ipasabut ngadto sa bata nga siya dili mahimong modula niini nga paagi, ug dayon itunong ang pagtagad sa bata ngadto sa pipila ka laing matang sa dula. Dayga ang bata sa sakto nga pamatasan.

Usa ka bata nagsugod sa paghilak ug pagdanguyngoy. Sa dihang sulayan nimo sa paghupay, siya mosulti og usa ka butang nga sama sa, “Wala ko ka gusto nimo” o “Dili ikaw akong inahan” ug dayon mopalayo.

Itunong ang pagtagad sa bata ngadto sa mga butang nga nahitabo diha sa nursery o ngadto sa usa ka dulaan o libro. Mahimo nga makatabang kini nga mokalma ang bata. Kon siya dili mohilom, dad-a ang bata ngadto sa iyang ginikanan.